މެންޗެސްޓަރ ސިޓީ ދޫކޮށް ރެކޯޑު އަގަކަށް ކެއިރާ ވަލްޝް ބާސެލޯނާއަށް

އަންހެނުންގެ ޔޫރޯ ފުޓުބޯޅަ މުބާރާތުގައި މޮޅު ކުޅުމެއް ދެއްކި އިންގްލެންޑުގެ ކެއިރާ ވަލްޝް ދުނިޔޭގެ ރެކޯޑު އަގަކަށް ބާސެލޯނާއަށް ބަދަލުވެއްޖެއެވެ.

ބާސެލޯނާއަށް ބަދަލުވުމުގެ ކުރިން ވަލްޝް ހުރީ މެންޗެސްޓަރ ސިޓީގައެވެ. ވަލްޝް ހޯދުމަށް ބާސެލޯނާއިން މީގެ ކުރިން ކުރި އެތައް ބިޑެއް ސިޓީން ރިޖެކްޓުކޮށްފައިވާ ކަމަށް މީޑިއާ ރިޕޯޓުތައް ބުނެއެވެ. ސިޓީއާއެކު ވަލްޝް ހަދާފައިވާ އެއްބަސްވުމުގައި ބާކީ އޮތީ އެންމެ އަހަރެކެވެ. ވަލްޝްގެ ބަދަލުގައި އެހެން ކުޅުންތެރިޔަކު ހޯދުމުގެ މަސައްކަތް ސިޓީން މިހާރު ކުރަމުން އަންނަ ކަމަށް ވެސް މީޑިއާ ރިޕޯޓުތައް ބުނެއެވެ.

މީގެ ކުރިން އަންހެން ފުޓުބޯޅައިގެ ރެކޯޑު އަގަކީ 2020 ވަނަ އަހަރު ވުލްވްސް ދޫކޮށް ޗެލްސީއަށް ބަދަލުވި ޕާނީލް ހާޑާއެވެ. އެއަހަރު އޭނާ ޗެލްސީއަށް ބަދަލުވެފައިވަނީ ތިން ސަތޭކަ ހާސް ޕައުންޑަށެވެ. ވަލްޝް ބާސެލޯނާއަށް ބަދަލުވާ އަގު ރަސްމީކޮށް އަދި ހާމަކޮށްފައެއްނުވެއެވެ. ނަމަވެސް ބޭރުގެ މީޑިއާތަކުގައި ވާގޮތުން އޭނާ ބާސެލޯނާއަސް ބަދަލުވާނީ އަންހެނުންގެ ފުޓުބޯޅައިގެ ދުނިޔޭގެ ރެކޯޑު އަގަކަށެވެ.

އުމުރުން 25 އަހަރުގެ ވަލްޝް ވަނީ ސިޓީގައި މޮޅު ކުޅުމެއް ދައްކާފައެވެ. މީގެ އިތުރުން އިންގްލެންޑުގައި ވެސް އޭނާ އަންނަނީ މޮޅު ކުޅުމެއް ދައްކަމުންނެވެ. އެގޮތުން މިއަހަރު އޮތް އަންހެނުންގެ ޔޫރޯ ފުޓުބޯޅަ މުބާރާތް އިންގްލެންޑަށް ކާމިޔާބުކޮށްދިނުމުގައި އޭނާ ވަނީ މުހިންމު ދައުރެއް އަދާކޮށްފައެވެ. މުބާރާތުގެ ފައިނަލް މެޗުގައި ވެސް މޮޅު ކުޅުމެއް އޭނާ ދެއްކިއިރު، އެ މެޗުގެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.

ވަލްޝް އޭނާގެ ސީނިއަރ ކެރިއަރު ފެށީ 2014 ވަނަ އަހަރު ސިޓީއިންނެވެ. އެ މުއްދަތުގައި އޭނާ ވަނީ ސިޓީއަށް ކުޅެދިން 211 މެޗުގައި ނުވަ ލަނޑޫ ޖަހާފައެވެ. މީގެ އިތުރުން އޭނާ ވަނީ ސިޓީއާއެކު އަންހެން އެފްއޭ ލީގު ކަޕާއި، އެފްއޭ އަންހެން ސުޕަ ލީގު އަދި އަންހެނުންގެ އެފްއޭ ކަޕް ކާމިޔާބުކޮށްފައެވެ.