ގަތަރުގައި މިއަހަރު ފަހުކޮޅު ބާއްވާ ވޯލްޑްކަޕް ފުޓްބޯޅަ މުބާރާތައް ތައްޔާރުވުމަށް ގަތަރުގެ ވެރިރަށް ދޯހާ އިންޓަނޭޝަނަލް އެއާޕޯޓް ހުޅުވާލަން ނިންމައިފި އެވެ.
ގަތަރުގެ މައި އެއާޕޯޓެއްގެ ގޮތުގައި ކުރިން ބޭނުންކުރި ދޯހާ އެއާޕޯޓްގެ ބަދަލުގައި 2014ން ފެށިގެން ބޭނުންކުރަމުންދަނީ ހަމަދު އިންޓަނޭޝަނަލް އެއާޕޯޓެވެ. މި ދެ އެއާޕޯޓް ވެސް އޮންނަނީ މާދުރަކުނޫނެވެ. މިތަން އަލުން ބޭނުންކުރަން ނިންމީ ނޮވެމްބަރު އަދި ޑިސެމްބަރު މަހު ގަތަރުގައި ބާއްވާ ވޯލްޑަކަޕާ ދިމާކޮށް އެ ގައުމަށް ގިނައަދަދެއްގެ ބަޔަކު ޖަމާވާނެތީވެ މެހުމާނުންގެ ދަތުރު ފަސޭހަކޮށްދިނުމަށްޓަކަ އެވެ. އަދި އަލުން ހުޅުވަން ތައްޔާރުވާއިރު މިއެއާޕޯޓް ވަނީ ވަރަށް ބޮޑަށް މަރާމާތުކޮށް އާބާތުރަ ފިލުވައިފަ އެވެ.
ނަމަވެސް އެއާޕޯޓް ހުޅުވުމާމެދު ގަތަރުން އަދި ވަކިއެއްޗެއް ނުބުނެ އެވެ. އެހެން ނަމަވެސް ކުވޭތުގެ ޖަޒީރާ އެއާވޭޒް އާއި ޔޫއޭއީގެ ފްލައި ޑުބާއީ އާއި އޮމާންގެ ސަލާމްއެއާ އާއި ތުރުކީގެ ބައެއް އެއާލައިންތަކުން ވަނީ މި އެއާޕޯޓަށް ދަތުރުކުރުމަށް ޓިކެޓް ވިއްކަން ފަށައިފަ އެވެ.
ވޯލްޑްކަޕާ ދިމާކޮށް ގަތަރަށް 1.5 މިލިއަން މީހުން ޒިޔާރަތްކުރާނެ ކަމަށް ވަނީ އަންދާޒާކޮށްފަ އެވެ. ގަތަރުގެ މައި އެއާޕޯޓް ކަމަށްވާ ހަމަދު އިންޓަނޭޝަނަލް އެއާޕޯޓް މިދިޔަ ޖޫން މަހު އެކަނި ވެސް ތިން މިލިއަން މީހުން ބޭނުންކުރި އެވެ. އަދި މި އަހަރުގެ ދެ ވަނަ ކުއާޓާރަކުގައި އެކަނި ވެސް 8.42 މިލިއަން މީހުން މި އެއާޕޯޓް ބޭނުންކޮށްފައިވެ އެވެ.
