މިހާރު ކުރިއަށްދާ އަންހެނުންގެ ސާފް ޗެމްޕިއަންޝިޕް މުބާރާތުގައި ބަންގްލަދޭޝްއާއި ބައްދަލުކުރި މެޗުން ރާއްޖޭގެ އަންހެން ފުޓްބޯޅަ ޓީމު ބަލިވެއްޖެއެވެ.
ނޭޕާލުގެ ދަޝްރަތު ރަންގަސާލާ ސްޓޭޑިއަމްގައި ކުޅުނު މި މެޗުގައި ރާއްޖޭގެ މައްޗަށް ބަންގްލަދޭޝް ކުރިހޯދީ 3-0ންނެވެ. ބަންގްލަދޭޝްގެ ތިން ލަނޑުވެސް އެޓީމުން ޖެހީ ފުރަތަމަ ހާފުގައެވެ. މެޗުގެ 32 ވަނަ މިނެޓުގައި ބަންގްލަދޭޝްއަށް ލީޑު ނަގައިދިނީ ކެޕްޓަން ސަބީނާ ހާތުންއެވެ. އޭގެ ދެމިނެޓު ފަހުން ބަންގްލަދޭޝްއަށް ލީޑު ފުޅާކޮށްދިނީ މޮނިކާ ޗަމަކާއެވެ. ބަންގްލަދޭޝްގެ ތިންވަނަ ލަނޑުޖެހީ ފުރަތަމަ ލަނޑު ޖެހި ސަބީނާއެވެ.
ރާއްޖެއާއި ބަންގްލަދޭޝް ހިމެނޭ ގްރޫޕުގައި ދެން އޮތީ ޕާކިސްތާނާއި އިންޑިއާއެވެ. މި ދެޓީމު ބައްދަލުކުރި މެޗު އިންޑިއާއިން ކާމިޔާބުކުރީ 3-0ންނެވެ.
ރާއްޖެއިން މިފަހަރުގެ މުބާރާތަށް ދިޔައީ ސެމީ ފައިނަލް ކުޅުމުގެ އަޒުމުގައެވެ. ގްރޫޕް ސްޓޭޖުގައި ބާކީ އޮތް ދެމެޗުން ރަނގަޅު ނަތީޖާއެއް ހޯދައިގެން ސެމީއަށް ދިއުމުގެ ފުރުސަތު ރާއްޖެއަށް އެބައޮތެވެ. މުބާރާތުގައި ރާއްޖެ ދެން ވާދަކުރަން ޖެހޭނީ އެންމެ ފަހުގެ ޗެމްޕިއަން އިންޑިއާއާއެވެ.
ރާއްޖޭގެ 17 އަހަރުން ދަށުގެ ފިރިހެން ޓީމުވެސް މިހާރު އަންނަނީ ސްރީ ލަންކާގައި ކުރިއަށްދާ 17 އަހަރުން ދަށުގެ ސާފް ޗެމްޕިއަންޝިޕްގައި ވާދަކުރަމުންނެވެ. ފުރަތަމަ މެޗުގައި ބަންގްލަދޭޝް އަތުން ޒުވާން ޓީމު ބަލިވީ 5-0ންނެވެ.
