ފޭސްބުކް، ޓިކްޓޮކް މަނާ! ކުޅުންތެރިން ބަލަންވީ ޖޯކް ވީޑިއޯތައް: އޮސްޓްރޭލިޔާ ކޯޗު
1 ސެޕްޓެމްބަރު 2022 | ބުރާސްފަތި 04:08ކޯޗު ބޭނުންވަނީ އޮސްޓްރޭލިޔާ މުބާރާތުގެ ކުއާޓާ ފައިނަލަށް ދަތުރުކުރުމަށް
އޮސްޓްރޭލިޔާގެ ކޯޗު ގްރެހަމް އާނޯލްޑް: ސޯޝަލް މީޑިއާ މަނާކުރާނެ
ވޯލްޑްކަޕް ފުޓްބޯޅަ މުބާރާތުގެ ދުވަސްވަރު އޮސްޓްރޭލިޔާ ކުޅުންތެރިންނަށް ސޯޝަލް މީޑިއާ މަނާކުރާނެ ކަމަށް ކޯޗު ގްރެހަމް އާނޯލްޑް ބުނެފި އެވެ.
އޭނާ ބުނީ ވޯލްޑްކަޕުގެ އިތުރުންވެސް މުހިންމު މެޗުތައް ކުޅޭއިރު ކުޅުންތެރިންނަށް ފޭސްބުކާއި، އިންޓަގްރާމް އަދި ޓިކްޓޮކް ނުބެލުމަށް އިރުޝާދުދެނީ އޭގެ ސަބަބުން ނޭދެވޭ އަސަރު ޓީމަށް ކުރާތީ ކަމަށެވެ.
އޭނާ އަކީ އޮސްޓްރޭލިޔާ ވޯލްޑްކަޕުގައި ކުޅުނު ކޮންމެ ފަހަރަކު ވެސް ޓީމާއެކު ހަރަކާތްތެރިވި އޮފިޝަލެކެވެ. އަދި ގަތަރުގައި އަންނަ ނޮވެމްބަރު މަހު ފަށާ ވޯލްޑްކަޕުގައި އޭނާ ވަނީ މިހާތަނަށް ވޯލްޑްކަޕުގައި އޮސްޓްރޭލިޔާ އަށް ދެވިފައިނުވާ ހިސާބަކަށް ޓީމު ގެންގޮސްދިނުމަށް އަޒުމް ކަނޑައަޅައިފަ އެވެ. އެއީ މުބާރާތުގެ ކުއާޓާ ފައިނަލުން ޖާގަ ހޯދުމެވެ.
މި މަސައްކަތުގައި އޭނާ އަށް އެހީވާނެ އެންމެ އިސް މީހަކީ 2006 ވަނަ އަހަރުގެ ވޯލްޑްކަޕުގައި އޮސްޓްރޭލިޔާ އަށް ކޯޗުކޮށްދިން ގުސް ހިޑިންކެވެ. އޭނާ ބުނީ ހިޑިންކަކީ ދުނިޔޭގެ ފުޓްބޯޅައިގެ ތަޖުރިބާކާރެއް ކަމަށާއި އޮސްޓްރޭލިޔާ ޓީމަށް އޭނާގެ އެހީ ކޯޗިން ކޮންސަލްޓަންޓެއްގެ ގޮތުން ލިބޭކަމާމެދު އުފާކުރާ ކަމަށެވެ.
ނަމަވެސް ވޯލްޑްކަޕަށް ފަހު ގައުމީ ޓީމުގައި ދެމިހުރުމާމެދު އާނޯލްޑް އަދި ވަކިގޮތެއް ނުނިންމަ އެވެ.
