އޮފް ސީޒަން މާދިގު، ވޯލްޑްކަޕަށް ނޭދެވޭ އަސަރުކުރާނެ: އޮސްޓްރޭލިޔާ ކޯޗު
އޮސްޓްރޭލީގު އަލުން ފަށާނީ އޮކްޓޫބަރު ހަތެއްގައި
އޮސްޓްރޭލިޔާގެ ކޯޗު ގްރެހަމް އާނޯލްޑް: ލީގު ފަހުން ފަށާތީ ހުރީ ހިތްހަމަނުޖެހިފައި
އޮސްޓްރޭލިޔާގެ ފުޓްބޯޅައިގެ އޮފް ސީޒަން މާ ދިގު ކަމަށާއި މިހެންވެ ކުރިއަށްއޮތް ވޯލްޑްކަޕުގައި އޭގެ ނޭދެވޭ އަސަރު ގައުމީ ޓީމަށް ކުރާނެ ކަމަށް ކޯޗު ގްރެހަމް އާނޯލްޑް ބުނެފި އެވެ.
އޭނާ ބުނީ މިދިޔަ މޭމަހުގެ 28 ވަނަ ދުވަހު ނިމުނު ފުޓްބޯޅަ ސީޒަނަށް ފަހު އާ ސީޒަން އޮކްޓޫބަރު 7ގައި ފެށުމަކީ ބަލައިގަނެވޭނެ ކަމެއްނޫން ކަމަށެވެ.
އޭނާ އަދި ބުނީ ވޯލްޑްކަޕް ބާއްވާ ގަތަރަކީ ހޫނުގަދަ ގައުމަކަށްވުމުން ވޯލްޑްކަޕުގައި އާދަޔާހިލާފު ދަށް ނަތީޖާތަކެއް ބައެއް ގައުމުތަކުން ނެރުމަކީ ވެސް ކުރިމަތިވެދާނެ ކަމެއް ކަމަށެވެ.
ނަމަވެސް އޮސްޓްރޭލިޔާއިން ގަތަރުގައި އެންމެ ފަހުން ކުޅުނު ފަސް މެޗު ކާމިޔާބުކުރި ކަމަށާއި މިހެންވެ މުބާރާތް ކުޅޭ ގައުމުގެ މާހައުލާމެދު މާބޮޑު ކަންބޮޑުވުމެއް ނެތް ކަމަށް ވެސް ކޯޗު ބުންޏެވެ.
އެކަމަކު އޭޝިޔާއިން ވޯލްޑްކަޕުގައި ކުޅޭ ފަސް ގައުމުގެ ތެރެއިން އޮސްޓްރޭލިޔާ އަކީ އެންމެ އަވަހަށް މުބާރާތުން ކަޓާނެ އެއް ގައުމުކަމަށް ތަޖުރިބާކާރުން ގަބޫލުކުރެ އެވެ.
