އެމެރިކާގެ ކުރީގެ ރައީސް ޑޮނަލްޑް ޓްރަމްޕްގެ ފްލޮރިޑާގައި ހުންނަ އެސްޓޭޓް މަރ އަ ލާގޯއަށް ވަދެ މިމަހުގެ ކުރީކޮޅު އެފްބީއައި އިން ގެންދިޔަ ފައިލްތައް ބެލުން ހުއްޓުވާ ދިނުމަށް އެދިވަޑައިގެން، ޑޮނަލްޑް ޓްރަމްޕް ކޯޓަށް ވަޑައިގެންފިއެވެ.
ޓްރަމްޕްގެ ގާނޫނީ ވަކީލުން ވަނީ އެފައިލްތައް ތަހުޤީޤުކުރުމުގެ މައްސަލަ މިނިވަން ވަކީލެއްގެ ބެލުމުގެ ދަށުން ކުރިޔަށް ދާ ގޮތަށް ނިންމާ ދިނުމަށް ވެސް ކޯޓުގައި އެދިފައެވެ.
އޮގަސްޓް 8 ވަނަ ދުވަހު އެފްބީއައިގެ ޚާއްސަ އޭޖެންޓުންގެ 24 މެމްބަރުންގެ ގްރޫޕަކުން ވަނީ ކުއްލި ގޮތަކަށް ޓްރަމްޕްގެ ބިޔަ ގަނޑުވަރު މަރ އަ ލާގޯއަށް ވަދެ، އެތަން ބަލާ ފާސްކޮށް، އެގާރަ ސެޓުގެ "ކްލެސިފައިޑް" ޑޮކިއުމަންޓުތަކެއް އެތާ ހުއްޓާ ނަގާފައެވެ. ރިޔާސީ ގަނޑުވަރުގެ ޑޮކިއުމަންޓެއް އެއްވެސް ގޮތަކަށް އެތަނުން ނެރުމަކީ އެމެރިކާގައި ގާނޫނީ ކުށެކެވެ. އެހެންކަމުން ޑޮކިއުމަންޓުތަކަށް ފަރުވާކުޑަކުރެއްވި ކަމުގެ ދައުވާ ވަނީ ޓްރަމްޕްގެ މައްޗަށް ކުރެވިފައެވެ.
އެމެރިކާގެ ގާނޫނުގެ ދަށުން ހުރިހާ ރައީސުން ވެސް އެބޭފުޅުން ގެންގުޅުއްވި ޑޮކިއުމަންޓުތަކާއި އީމެއިލްތައް ސަރުކާރުން ބަލަހައްޓާ ނެޝަނަލް އާކައިވްއަށް ބަދަލު ކުރަން ޖެހެއެވެ. އެފްބީއައިގެ ތަހުޤީޤަކީ ޑޮނަލްޑް ޓްރަމްޕްގެ މަގާމުގެ މުއްދަތު ހަމަކުރައްވާ ވަޑައިގެންނެވިއިރު، މިގޮތަށް އާކައިވް އަށް ނުވައްދަވާ އަމިއްލަ ގަނޑުވަރަށް ޑޮކިއުމަންޓްތައް ގެންދެވި މައްސަލަ އެވެ.
ޓްރަމްޕް ވަނީ އޭނާ ކުށެއް ނުކުރައްވާ ކަމަށާއި އޭނާ ގެންދެވި ޑޮކިއުމަންޓުތަކަކީ ކްލެސިފައިޑް ނޫން ޑޮކިއުމަންޓުތަކެއްގެ ގޮތަށް ބަދަލުކޮށްފައިވާ ލިޔުންތަކެއް ކަމަށް ވިދާޅުވެފައެވެ.
ފްލޮރިޑާގެ ކޯޓަށް ހޯމަ ދުވަހު ޓްރަމްޕްގެ ފަރާތްޕުޅުން ހުށައެޅި 27 ސަފުހާގެ ޑޮކިއުމަންޓްގައި ވަނީ ޖަސްޓިސް ޑިޕާޓްމަންޓުން އެކުރާކަމަކީ ޓްރަމްޕް އަލުން ރައީސް ކަމަށް ކުރިމަތިލެއްވުން ހުއްޓުވާލެވޭނެ ސަބަބެއް ހޯދުން ކަމަށް ތުހުމަތުކޮށްފައެވެ. ޑޮނަލްޑް ޓްރަމްޕްއަކީ ރިޕަބްލިކަން ޕާޓީގެ ޕްރައިމަރީގެ އެންމެ އިސްކޮށް ވާދަކުރައްވާނެ، އަދި 2024ގެ އެމެރިކާގެ ރިޔާސީ އިންތިޚާބުގައި ވެސް އެންމެ ކުރީގައި ވާދަކުރައްވާނެ ކެންޑިޑޭޓު ކަން ވަރަށް ސާފުކޮށް ފެންނަ ކަމަށް ގާނޫނީ ވަކީލުން ކޯޓަށް ހުށަހެޅި ލިޔުންތަކުގައި ބުނެފައިވެއެވެ.
