މި އަހަރުގެ މިހާތަނަށް ދައުލަތުގެ ބެލުމުގެ ދަށަށް 26 ކުދިން ވަނީ ގެންގޮސްފައި!
19 އޯގަސްޓު 2022 | ހުކުރު 13:18ދައުލަތުގެ ބެލުމުގެ ދަށަށް މި އަހަރު ގެންގޮސްފައި ވަނީ 16 އަންހެން ކުދިންނާއި 10 ފިރިހެން ކުދިން
މިނިސްޓަރ އޮފް ސްޓޭޓް ފޯރ ޖެންޑަރ އެންޑް ސޯޝަލް ސަރވިސަސް މުހައްމަދު ޝިޔާމް
މި އަހަރު ދައުލަތުގެ ބެލުމުގެ ދަށަށް ގެންދިޔައީ 26 ކުދިން ކަމަށް ޖެންޑަރ މިނިސްޓްރީ އިން ހާމަ ކޮށްފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުން ޖެންޑަރ މިނިސްޓްރީގެ ސްޓޭޓް މިނިސްޓަރ ފެމިލީ އެންޑް ސޯޝަލް ސަރވިސަސް މުހައްމަދު ޝިހާބު ވިދާޅުވީ ދައުލަތުގެ ބެލުމުގެ ދަށަށް މި އަހަރު ގެންގޮސްފައި ވަނީ 16 އަންހެން ކުދިންނާއި 10 ފިރިހެން ކުދިން ކަމަށެވެ. ދައުލަތުގެ ބެލުމުގެ ދަށަށް ގެންދާ ކުދިން ދައުލަތުގެ ބެލުމުގެ ދަށަށް ނަގަނީ ވަރަށް ގިނަ ކަންކަން ބެލުމަށް ފަހު ކުދިންގެ ރައްކާތެރިކަމާއި މެދު ސުވާލު އުފެދޭ ހާލަތުގައިކަން އޭނާ ފާހަގަކުރެއްވިއެވެ.
އަދި ދައުލަތުގެ ބެލުމުގެ ދަށަށް ގެންދާ ކުދިން އަނބުރާ އާއިލާ އާއި ހަވާލުކުރުމުގެ ކުރިން އެ ކުދިންގެ ރައްކާތެރިކަން ފުރިހަމަ އަށް ޔަގީންކުރާ ކަމަށް ވެސް އޭނާ ވިދާޅުވިއެވެ. ޝިހާބު ވަނީ އެ މަރުހަލާ ދިގުލައިގެން ދަނީ އެ މަރުހަލާގައި ބަލަން ޖެހޭ ކަންކަން ގިނަވުމުން ކަމަށް ވެސް ފާހަގަކުރައްވާފައެވެ.
މީގެ އިތުރުން ދައުލަތުގެ ބެލުމުގެ ދަށުގައި ތިބި ކުދިންގެ ތެރެއިން މި އަހަރުގެ މިހާތަނަށް 6 ކުއްޖަކު ފޮސްޓަރ ކުރެވިފައިވާ ކަމަށް ވެސް އޭނާ ވިދާޅުވިއެވެ. އަދި އިތުރު 3 ކުއްޖަކު ފޮސްޓަރކުރުމުގެ މަސައްކަތް ކުރިއަށްދާ ކަން އޭނާ ވަނީ ފާހަގަކުރައްވާފައެވެ.
