ޚާއްސަ އެހީ އަށް ބޭނުންވާ މީހުންގެ މަރުކަޒުގައި ދޭ ޚިދުމަތުގެ ފެންވަރު މިދިޔަ 3 އަހަރު ރަނގަޅުވެއްޖެ: މިނިސްޓަރ
ޚާއްސަ އެހީ އަށް ބޭނުންވާ މީހުންގެ މަރުކަޒުގައި މި ވަގުތު ޚާއްޞަ ރައްކާތެރިކަމާއި އަޅައިލުން ބޭނުންވާ 191 މީހުން ބަލަހައްޓަމުންދޭ
ޖެންޑަރ މިނިސްޓަރ އާއިޝަތު މުހައްމަދު ދީދީ
ޚާއްސަ އެހީ އަށް ބޭނުންވާ މީހުންގެ މަރުކަޒުގައި ދޭ ޚިދުމަތުގެ ފެންވަރު މި ސަރުކާރުން ވަނީ ރަނގަޅުކޮށްފައި ކަމަށާއި، މިދިޔަ 3 އަހަރު ތެރޭގައި ތަފާތު ފެންނަ ފަދަ ރަނގަޅު މަސައްކަތްތަކެއް ކުރެވިފައިވާކަމަށް ޖެންޑަރ މިނިސްޓަރ އާއިޝަތު މުހައްމަދު ދީދީ ވިދާޅުވެއްޖެއެވެ.
އެކަމަނާ އެފަދައިން ވިދާޅުވީ ގުރައިދޫގައި ގާއިމްކޮށްފައިވާ ހާއްސަ އެހީއަށް ބޭނުންވާ މީހުންގެ މަރުކަޒުގެ މެޑިކަލް ވޯޑު މަރާމާތުކުރުމަށްފަހު އެވޯޑަށް ބޭނުންވާ ވަސީލަތްތަކާއެކު ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުންނެވެ. އެ ރަސްމިއްޔާތުގައި މިނިސްޓަރ ވަނީ ޚާއްސަ އެހީ އަށް ބޭނުންވާ މީހުންގެ މަރުކަޒު ޤާއިމް ކުރީއްސުރެ މިހާހިސާބަށް އައި އިރު ގިނަ ގޮންޖެހުންތަކާއި ދިމާވެފައިވާ ކަމަށް ފާހަގަކުރައްވާފައެވެ. އެގޮތުން ޚާއްސަ އެހީ އަށް ބޭނުންވާ މީހުންގެ ބެލެނިވެރިކަން އެކި ވުޒާރާތަކުގެ ބެލުމުގެ ދަށަށް އެކި ފަހަރު މަތިން ބަދަލުކުރުމުގެ ސަބަބުން އެ ތަން ރަނގަޅަށް ހިންގުމަށް ދަތިވެފައިވާ ކަމަށް މިނިސްޓަރ ފާހަގަކުރެއްވިއެވެ. ދިމާވެފައިވާ ގޮންޖެހުންތަކާއި އެކު ވެސް އެ ތަނުގެ ޚިދުމަތުގެ ފެންވަރު ރަނގަޅުކުރެވިފައިވުމަކީ އުފާކުރައްވާ ކަމެއް ކަމަށް މިނިސްޓަރ ފާހަގަކުރެއްވިއެވެ.
މިނިސްޓަރ ވަނީ ހާއްސަ އެހީއަށް ބޭނުންވާ މަރުކަޒަކީ އާއިލާތަކަށް އުމުރުން ދުވަސްވީ މީހުންނާއި ހާއްސަ އެހީއަށް ބޭނުންވާ މީހުން ބަލަހައްޓަން ގޮންޖެހުންތަކާއި ކުރިމަތިވާ އިރު އެ ފަދަ ފަރާތްތަކުގެ ދެ ވަނަ ގެއެއް ކަމަށް ސިފަކުރައްވާފައެވެ. އަދި އެފަދަ ފަރާތްތަކަށް ބޭނުންވާ އަޅާލުމާއި ފަރުވާ ފޯރުކޮށްދިނުމަށް ފަހު އަނބުރާ އެ މީހުން މުޖުތަމައު އަށް ފޯރުކޮށްދެއްވަން ބޭނުންވާ ކަމަށް މިނިސްޓަރ ވަނީ ފާހަގަކުރައްވާފައެވެ.
އެ މަރުކަޒުގައި މި ވަގުތު ޚާއްޞަ ރައްކާތެރިކަމާއި އަޅައިލުން ބޭނުންވާ 191 މީހުން ބަލަހައްޓަމުންދެއެވެ. ކ.ގުރައިދޫގައި ގާއިމްކޮށްފައިވާ ޚާއްޞަ އެހީއަށް ބޭނުންވާ މީހުންގެ މަރުކަޒުގެ މެޑިކަލް ވޯޑު މަރާމާތްކުރުމަށާއި މެޑިކަލް ވޯޑަށް ބޭނުންވާ ވަސީލަތްތަކަށް ޖަޕާން ސަރުކާރުން 86,961 އެމެރިކާ ޑޮލަރު (1.3 މިލިއަން ދިވެހި ރުފިޔާ) ހޭދަކޮށްފައި ވާއިރު، އެ އެހީ ދިނުމުގެ އެއްބަސްވުމުގައި 9 ޖަނަވަރީ 2020 ގައި ވަނީ ސޮއިކޮށްފައެވެ. އެހެންނަމަވެސް، ކޮވިޑް19ގެ ފުރަބަންދުގެ ސަބަބުން މި މަސައްކަތްކުރުމުގައި ވަނީ ދަތިތަކެއް ދިމާވެފައެވެ.
މި މަޝްރޫޢުގެ ސަބަބުން އެ މަރުކަޒުގައި ބަލަހައްޓަމުންދާ ފަރާތްތަކަށް ފޯރުކޮށްދޭ ޚިދުމަތުގެ ފެންވަރު ރަނގަޅުވެގެން ދާނެ ކަމަށް ޖެންޑަރ މިނިސްޓްރީ އިން ބުނެފައިވެއެވެ. އެގޮތުން، އެ މަރުކަޒުގެ މެޑިކަލް ވޯޑު މަރާމާތު ކުރުމުން ޖާގަ އިތުރުވެ، އިމަޖަންސީ ނުވަތަ ކުއްލި ޙާލަތްތަކުގައި މަރުކަޒުގައި ދިރިއުޅޭ ފަރާތްތަކަށް އަވަސް ފަރުވާދިނުމުގެ އިންތިޒާމް ހަމަޖެހިގެންދާނެ ކަމަށް އެ ވުޒާރާއިން ބުނެއެވެ.
