މިއީ ރާއްޖޭގައިވެސް ފަސް ބަދަލު ގެނެވޭގޮތަށް ބަދަލުކުރަންވީ ވަގުތުކަމަށް ޔުނައިޓެޑް ވިކްޓްރީގެ ކޯޗު އިހުސާން އަބްދުލްޣަނީ (ސާންތި) ބުނެފިއެވެ.

އޭނާގެ އިރުޝާދުގެ ދަށުން މިސީޒަންގައި ޔުނައިޓެޑް ވިކްޓްރީން ދެއްކި ކުޅުމާއި, ނެރުނު ނަތީޖާތަކާ ގުޅޭގޮތުން ރައްޖެ ޓީވީގެ "ކުޅިވަރު ފައިލް" ގައި ވާހަކަދައްކަމުން ސާންތި ބުނީ ތިން ބަދަލު އިނުމުގެ ބަދަލުގައި މިހާރު ފަސްބަދަލަށް ދާންވެއްޖެކަމަށެވެ. ފަސް ބަދަލަށް ދިއުމުން މުބާރާތުގެ މެޗުތަކުގެ ފެންވަރުގެ ކޮލިޓީ ރަނގަޅުވާނެކަމަށާއި, ފްރެޝް ގިނަ ކުޅުންތެރިން ބޭނުން ކުރުމުން އޭގެ ފައިދާ ފެންނާނެެކަމަށެވެ.

މީގެއިތުރުން ސާންތި ފާހަގަކުރީ ޕްރެކްޓިސް ކުރަން ލިބޭ ވަގުތު މަދުވުމެވެ. އެކަމަށް ލިބެނީ ދޮޅުގަޑިއިރު ކަމަށާއި, އެއީ ޓީމެއް އެކުލަވާލަން ބަލާއިރު އެކަށީގެންވާ ވަގުތު ނޫންކަމަށް ސާންތި ބުންޏެވެ. ޔުނައިޓެޑް ވިކްޓްރީ ސީޒަން ނިންމާލީ ލީގުގެ 21 މެޗުން 26 ޕޮއިންޓާއެކު ހަވަނާގައެވެ. ސާންތި ބުނީ އަމާޒުކުރީ ހަތަރެއްގެ ތެރޭގައި ނިންމާލަން ކަމަށެވެ. ޕްރެޒިޑެންޓްކަޕް ބޭނުންކުރީ ކުޅުންތެރިންނަށް ފުރުޞަތުދީ ލީގަށް ތައްޔާރުވުމަށެވެ. ލީގުގެ ފަހުން އެފްއޭކަޕް ސެމީފައިނަލްގައި މާޒިޔާއާ ދެކޮޅަށް ރަނގަޅު ވާދައެއް ކުރިއެވެ. އެމެޗުން ބަލިވީ 2-1 ނެވެ.