ވެލެންސިޔާ އަކީ ތާރީޚެއް އޮތް ކުލަބެއް، ނަތީޖާ ބުރަވަނީ އީގަލްސް ކޮޅަށް: ސާންތީ

މިއަހަރުގެ ޕެރްޒިޑެންޓްސް ކަޕްގެ ފުރަތަމަ މެޗުގައި އެންމެ ފަހުގެ ޗެމްޕިއަން ކުލަބް ވެލެންސިޔާއާ ދެކޮޅަށް ނިކުންނައިރު އެ ޓީމަކީ މުބާރާތުގެ ތާރީޚެއް އޮތް ޓީމެއް ކަމަށާއި، ނަމަވެސް ނަތީޖާ ބުރަ ވަނީ ކުލަބް އީގަލްސް ކޮޅަށް ކަމަށް އީގަލްސްގެ ކޯޗު އިޙުސާން ޢަބްދުލް ޣަނީ (ސާންތީ) ބުނެފިއެވެ.

ވެލެންސިޔާ މެޗުގެ ކުރިން ރާއްޖެ އެމްވީ އިން ކުރި ސުވާލަކަށް ޖަވާބު ދެމުން ސާންތީ ބުނީ، މެޗުގެ ކުރިން ޓީމެއްގެ ގޮތުގައި ރަނގަޅަށް ފަރިތަކޮށްފައި އޮތީވެސް އީގަލްސް ކަމަށެވެ. މެޗަށް ފުރިހަމަ އަށް ތައްޔާރުވީ ނަމަވެސް ސާންތީ ފާހަގަ ކުރި ގޮތުގައި ބޮޑު ޗެލެންޖެއްވެސް އެބައޮތެވެ. އެއީ މިހާރު ވެލެންސިޔާ ގައި ތިބީ ކޮން ކުޅުންތެރިންނެއްކަން ނޭނގުމާއި، އެ ޓީމުން މިހާރު ކުޅޭނެ ވައްޓަފާޅި އެނގިފައި ނެތުމުން ކަމަށެވެ. މެޗުގައި ބަދަލެއް ގެންނާނެ ގޮތްވެސް އިނގޭނީ މެޗުގެ އޮއިވަރު ދާ ގޮތަކަށް ބެލުމަށްފަހުކަން ފާހަގަކޮށް ސާންތީ ބުނީ، ވެލެންސިޔާ އަކީ މިކަހަލަ މުބާރާތްތަކުގައި ތާރީޚެއް އޮތް ބައެއް ކަމަށެވެ. ގިނަ ކާމިޔާބީތަކެއް ހޯދާފައިވާ އަދި އެންމެ ފަހުގެ ޗެމްޕިއަނުންނާ ދެކޮޅަށް ނިކުންނައިރު، އީގަލްސްގެ އަމާޒަކީ މެޗު އެއްވެސް ވަރަކަށް ފަސޭހަ ނުކޮށް މެޗުން މޮޅުވުން ކަމަށްވެސް ސާންތީ ބުންޏެވެ.

މީގެ އިތުރުން ސާންތީ ބުނީ ސީޒަން ފެށުމުގެ ގޮތުން މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅުނު ޗެރިޓީ ޝީލްޑު މެޗުގައި އީގަލްސްގެ ކުޅުންތެރިން ދެއްކި ކުޅުމަށް ބަލާއިރު، ވެލެންސިޔާ އަތުން މޮޅު ނުވެވެންވީ އެއްވެސް ސަބަބެއް ނެތް ކަމަށެވެ. އެކަން ފާހަގަކޮށް ސާންތީ ބުނީ އީގަލްސް އަކީ އަބަދުވެސް ހުރިހާ ކުޅުންތެރިން ކުރާ މަސައްކަތުން ނަތީޖާ ނެރޭ ޓީމެއް ކަމަށާއި، ކުޅުންތެރިން ބުނާގޮތް ހެދުމާއި މަސައްކަތަށް ބަލާއިރު މެޗުން މޮޅުވެވޭނެ ކަމަށެވެ. އޭނާ ބުނީ އީގަލްސް އަށް ގިނަ ފަރިތަކުރުންތަކެއް ކުރެވިފައި އޮތުމުން އެކަމުގެ ފައިދާތަކެއް އޮންނާނެ ކަމަށާއި، ނަމަވެސް ވެލެންސިޔާ މެޗުގައި ކޯޗެއްގެ ހައިސިއްޔަތުން ޗެލެންޖުތަކެއް އޮތް ކަމަށެވެ. އެގޮތުން އީގަލްސްގެ އެންމެ މުހިންމު އެއް ކުޅުންތެރިޔާ އަޙުމަދު ރިޒްވާން (ރިޒޭ) ވެލެންސިޔާއާ ދެކޮޅަށް ނުކުޅެވޭނެ ކަމަށެވެ. ސަބަބަކީ މިވަގުތު ރިޒޭ އަށް ކޮންމެވެސް ވަރެއްގެ އަނިޔާއެއް ލިބިފައި ވުމާއި، ސީޒަންގެ ބާކީ އޮތް ބަޔަށް ވިސްނާފައި ރިޒޭ މެޗުގައި ނުފެނުމަކީ ގާތް ކަމެއް ކަމަށް ސާންތީ ބުންޏެވެ. މީގެ އިތުރުން އީގަލްސްގެ ބިދޭސީ ޑިފެންޑަރު ވެސް އެ މެޗުގައި ކުޅެވޭނެ ކަމުގެ ޔަޤީންކަމެއް ނެތް ކަމަށް ވެސް އޭނާ ބުންޏެވެ.

ސާންތީ ބުނީ ކޮންމެ ގޮތެއްވީ ނަމަވެސް މުބާރާތުގެ ފުރަތަމަ މެޗަކީ ވެސް ޕްރެޝަރު ބޮޑު މެޗަކަށް ވާނެ ކަމަށެވެ. އަނެއްކޮޅުން ވެލެންސިޔާގެ އެއްވެސް މައުލޫމާތެއް ނެތި، ކުޅުންތެރިންގެ އެއްވެސް ކަމެއް ދެނެނުގަނެ ކުޅުމަކީ ޕްރެޝަރެއް ކަމަށެވެ. ނަމަވެސް މެޗުގެ ކުރިން އީގަލްސް އިން ކުރި ފަރިތަކުރުމާއި، އީގަލްސްގެ ކުޅުންތެރިންގެ ބުންވަރާއި، މަސައްކަތަށް ބަލާއިރު އެކަންކަން ފަހަތަށް ޖައްސާލެވޭނެ ކަމަށް ވެސް ސާންތީ ވަނީ ބުނެފަ އެވެ.

އީގަލްސް އިން އެންމެ ފަހުގެ ޗެމްޕިއަން ވެލެންސިޔާއާ ދެކޮޅަށް ކުޅޭނީ އާދިއްތަ ދުވަހުގެ ރޭ 22:00 ގައެވެ.