ހުނަރުހުރި ކުޅުންތެރިން އަތޮޅުތަކުން ފާހަގަކޮށް, އެކުދިން މޮނީޓަރުކޮށްގެން ނޫނީ ފުޓުބޯޅަ ކުރިއެރުވެން ނެތްކަމަށް ކޯޗު އިހުސާން އަބްދުލްޣަނީ (ސާންތި) ބުނެފިއެވެ.
ޔޫތު ޑިވެލޮޕްމަންޓަށް މަސައްކަތްކުރަމުން އައި ކޯޗު ބުނީ ޔޫތު ޓީމުތަކުގެ ނަތީޖާ ރަނގަޅުކުރަން ވެސް އަދި ފުޓްބޯޅައިގެ ކުރިމަގަށްވވެސް ކުރަން އޮތް އެންމެ މުހިއްމު އެއްކަމަކީ ސަރަހައްދުތަކުގައި ސެންޓަރުތައް ޤާއިމްކޮށް, ކޯޗުން ބައިތިއްބައިގެން މަސައްކަތްކުރުންކަމަށެވެ. އަދި އަތޮޅުތަކުގައި ކުޑަ ބަޖެޓަކުން ޔޫތު މުބާރާތްތައް ބާއްވާ, ހުނަރުވެރި ކުޅުންތެރިން މޮނީޓަރުކުރަމުން ގޮސްގެން ނޫނީ ކާމިޔާބުނުވާނެކަމަށެވެ.
ކުޑަކުޑަ އޮފީހަކާއެކު ކޯޗެއް ބަހައްޓައިގެން މަސައްކަތްކުރަންވީ, ޓެލެންޓު އައިޑެންޓިފައިކުރަން. ކުޑަ ބަޖެޓަކުން އަތޮޅުތަކުގައި ވެސް ޔޫތު މުބާރާތްތައް ބާއްވަންވީ. އޭރުން މާލެއަށް ބަރޯސާވާކަށް ނުޖެހޭނެ. އަތޮޅުތަކުގައި ހުންނަ 19 އަހަރުން ދަށުގެ ކުއްޖާ މޮނީޓަރުކުރެވޭނެ. އެކުދިން ގޮވައިގެން މުބާރާތަށް ދިޔައީމަ ކްލަބްތަކުގެ ކުޅުންތެރިންނަށް ބަރޯސާވުން ކުޑަކުރެވޭނެ.އިހުސާން ޢަބްދުލްޣަނީ (ސާންތި)/ ފުޓްބޯޅަ ކޯޗެއް
ސާންތި ބުނީ ހަތަރު ފަސްއަހަރުގެ ތުއްތު ކުދިންނަށް ވެސް މުބާރާތްތަކާއި އެއްޗިހި ތަޢާރަފު ކުރަންޖެހޭކަމަށެވެ. އެކަމަކު އެކުދިންނަށް ކޯޗުކޮށްދީގެން ޕްރެޝަރު ދީގެން ނަތީޖާއަށް ފޯކަސްކޮށްގެން ޑިވެލޮޕްމަންޓު ނުގެނެވޭނެކަމަށާއި, ޖެހޭނީ ހުނަރު ފާހަގަކުރަންކަމަށް ސާންތި ބުންޏެވެ. ސާންތި ބުނީ ޑިވެލޮޕްމަންޓަކީ ވަރަށް ކެތްތެރިކަމާއި ޝައުޤުވެރިކަމާއެކު ކުރަންޖެހޭކަމެއްކަމަށެވެ. އަދި ޑިވެލޮޕްމަންޓް ކޯޗުންނަކީ ވަކި ވިސްނުމެއްގެ ވަކިގޮތަކަށް މަސައްކަތްކުރަންޖެހޭ ކޯޗުންކަން އޭނާ ފާހަގަކުރިއެވެ.
ސާންތިގެ ވާހަކަތަކާއި ގުޅިގެން އެފްއޭއެމްގެ ޓެކްނިކަލް ޑައިރެކްޓަރު އަހުމަދު ޝަރީފް (ޑުންގާ) ވިދާޅުވީ އެފްއޭއެމްގެ ވިސްނުމަކީ އެއީ ކަމަށާއި, ސަލްގާޑޯ އެކެޑަމީން ރާއްޖޭގެ އަށް ސަރަހައްދެއްގައި މަސައްކަތްކުރާނެކަމަށެވެ. އެކަމަކު މިވަގުތަށް ގޮންޖެހުންތަކެއް ހުރިކަން ފާހަގަކުރެއްވިއެވެ. އަތޮޅުތަކުގެ އެކެޑަމީތަކުން ވެސް މިހާރުވެސް އެހީތެރިކަމަށް އެދޭކަމަށާއި, އެފްއޭއެމްގެ ޤާބިލްކަން ހުރިވަރުން ދެވެނީ ޓެކްނިކަލް އެހީތެރިކަންކަމަށް ޑުންގާ ވިދާޅުވިއެވެ.
