ޔުނައިޓެޑް ވިކްޓްރީ ނޫން ކްލަބަކުން ވާހަކަދައްކަމުންދާކަމަށް ކޯޗު އިހުސާން އަބްދުލްޣަނީ (ސާންތި) ބުނެފިއެވެ.
ޔުނައިޓެޑް ވިކްޓްރީއާއެކު ލީގުގައި ރަނގަޅު ނަތީޖާތަކެއް ހޯދި ކޯޗު ބުނީ، ކުރިމަގާމެދު އަދި ގޮތެއް ނުނިމޭކަމަށާއި, ޔުނައިޓެޑް ވިކްޓްރީންވެސް އަދި އެވާހަކަ ނުދައްކާކަމަށެވެ. އެހެން ކްލަބަކުން ނުސީދާކޮށް ވާހަކަދައްކަމުންދާކަން ސާންތި ޔަގީންކޮށްދިންނަމަވެސް އެކަމާމެދު ގޮތެއް ނިންމަން އަދި ތަންކޮޅެއް އަވަސްކަމަށް ސާންތި ބުންޏެވެ. ޔޫވީއާއެކު ސާންތި ލީގު ނިންމާލީ ހަވަނައިގައެވެ. އެކަމަކު ޔޫވީއާ އޭގެ ކުރިއަށް އޮތް ތިން ޓީމާ ދެމެދުވެސް ބޮޑު ފަރަގެއްނެތެވެ.
ޔުނައިޓެޑް ވިކްޓްރީގައި މިކުރި މަސައްކަތަކީ މުސްތަގުބަލަށް ކުރި މަސައްކަތެއް. ޚާއްސަކޮށް 19 އަހަރުން ދަށުގެ ޓީމެއް ބިނާކޮށްފަ މުސްތަގުބަލުގަ އެޓީމް ކޮންޓިނިއު ކުރެވޭނެ ގޮތްތަކެއްވެސް ހަދާފަ އޮންނާނީ. އެކަމަކު ކަންކަން ދެން ޑިޕެންޑްވާނީ ކްލަބްގެ މެނޭޖްމަންޓަށް.އިހުސާން އަބްދުލްޣަނީ/ ޔުނައިޓެޑް ވިކްޓްރީގެ ކޯޗު
ސާންތި ބުނީ އޭނާ ޔުނައިޓެޑް ވިކްޓްރީގައި ހުރުމާއި ނުހުރުން އެއީ ކްލަބްގެ މެނޭޖްމަންޓްގެ ނިންމުމެއްކަމަށެވެ. ސީޒަން ނިމުނުއިރު ކޯޗެއް ނެތި އޮތީ މާޒިޔާއެވެ. މާޒިޔާގެ ހެޑްކޯޗު، ލީގު ޔަގީންކޮށްދިނުމަށްފަހު ވަނީ ކްލަބް ދޫކޮށް ސައުދީއަރަބިއްޔާގެ ކްލަބަކާ ހަވާލުވެފައެވެ. ވެލެންސިޔާއާއި ޓީސީއާއި ގްރީން ސްޓްރީޓްސްއިން މަސައްކަތްކުރަނީ ދިގު މުއްދަތެއްގައި އެކްލަބްތަކާއެކު މަސައްކަތްކުރަމުން އަންނަ ކޯޗިންގ ޓީމާއެކުއެވެ. ސާންތިގެ ކުރިން ހުރި ކޯޗު މުހައްމަދު އާތިފް އީގަލްސްގެ ކޯޗުކަމާ ހަވާލުވިފަހުން ޓީމްގެ ނަތީޖާތައް ދަށެވެ.
ސަސްގެ ކޯޗަކީ އިސްމާއީލް މަހުފޫޒް (އިންމަ)އެވެ. ދަ ގްރާންޑޭގައި ހުރީ އަހުމަދު ނާޝިދު (ނާދު)އެވެ. އެ ދެޓީމް ލީގުގައި ދެމިއޮތުމަށް ކޮލިފިކޭޝަން ކުޅެން ޖެހޭނެއެވެ.
