ބާސެލޯނާއާއި އަލަށް ގުޅުނު ކުޅުންތެރިން ރަޖިސްޓްރީކޮށްފި
13 އޯގަސްޓު 2022 | ހޮނިހިރު 04:05ބާސާގެ ފުރަތަމަ މެޗު މިރޭ
ބާސެލޯނާގެ ތަމްރީނުތަކުގެ ތެރެއިން: ފޮޓޯ-ބާސެލޯނާ ޓްވީޓަރ
އާ ސީޒަން އަށް ބާސެލޯނާއާއި އަލަށް ގުޅުނު ކުޅުންތެރިން ރަޖިސްޓްރީކޮށްފިއެވެ.
ސީޒަން ފެށުމުގެ ކުރިން ކުޅުންތެރިން ރަޖިސްޓްރީ ކުރެވިދާނެތޯ އުފެދިފައިވާ ސުވާލަށް ޖަވާބު ލިބުނީ ހަތަރު ކުޅުންތެރިންވެސް ރަޖިސްޓްރީކޮށް ނިންމުމުންނެވެ. އެއީ ޕޮލެންޑްގެ ފޯވާޑް ރޮބާޓް ލެވާންޑޯސްކީއާއި, ބްރެޒިލްގެ ފޯވާޑް ރަފީނިއާއާއި, ފްރޭން ކެސީއާއި, އަންދްރޭސް ކްރިސްޓެންސެންއެވެ. ހަތަރު ކުޅުންތެރިންނަށްވެސް ލަލީގާގައި ބާސެލޯނާ ކުޅޭ ފުރަތަމަ މެޗުގައި ރަޔޯ ވަޔަކާނޯއާއި ދެކޮޅަށެ ކުޅެވޭނެއެވެ. އެކަމަކު ފްރާންސް ޑިފެންޑަރ ކޫންޑޭގެ ކަންކަން އަދިވެސް މުޅިން ހަމަނުޖެހެއެވެ.
ކްލަބްގައި ތިބި ކުޅުންތެރިންގެ ތެރެއިން އެއްބަސްވުން އާކުރި ކުޅުންތެރިން އަލުން ރަޖިސްޓްރީކުރުމުގައިވެސް ބަސާއަށް އުނދަގޫތަކެއް ކުރިމަތިވިއެވެ. އެކަމަކު ޑެމެބެލޭއާއި, ސާޖި ރޮބާޓޯވެސް މިހާރު ވަނީ ރަޖިސްޓްރީކޮށްފައެވެ. ކުޅުންތެރިން ރަޖިސްޓްރީ ކުރުމުގައި ބާސެލޯނާއަށް ކުރިމަތިވެފައިވާ ހުރަހަކީ ލަލީގާގެ ފައިނޭޝިއަލް އުސޫލުތަކަށް ފެތުމުގައި ހުރި ހުރަސްތަކެވެ. ކްލަބްގެ ޚަރަދުތައް ބޮޑުވުމުން ކުރިމަތިވެފައިވާ މައްސަލަތަކަށް ހައްލު ހޯދުމަށް ޓެލެވިޜަން ރައިޓްސްއާއި, މީޑިޔާ ޕްރޮޑަކްޝަން ޔުނިޓްގެ ޙިއްސާވެސް ކްލަބުން ވަނީ ވިއްކާލާފައެވެ.
ބާސެލޯނާގެ ފުރަތަމަ މެޗުގައި ރަޔޯ ވަޔަކާނޯއާއި ދެކޮޅަށް ނިކުންނާނީ ހޮނިހިރު ދުވަހުގެރޭ ރާއްޖެ ގަޑިން 00:00 ގައެވެ.
