.ދުނިޔޭގެ 50 އަށްވުރެ ގިނަ ގައުމުގައި ކުރިއަށްގެންދާ ޔަންގް އިންޖިނިއާރސް ޕްރޮގްރާމް ރާއްޖޭގައި އިފްތިތާހުކޮށްފިއެވެ.
މި ޕްރޮގްރާމް ރާއްޖޭގައި އިފްތިތާހުކުރީ ކުޅުދުއްފުށީ ސިޓީގައި ހިންގާ ސްމާޓް ވޭލީ އިންސްޓިޓިއުޓުގެ ފަރާތުންނެވެ. އެގޮތުން ރާއްޖޭގައި މިހަރަކާތް ފުރަތަމަ އިފްތިތާހުކޮށްފައި މިވަނީ ކުޅުދުއްފުށީ ސިޓީގައެވެ. އަދި ކުރިއަށް އޮތްތަނުގައި މާލެ ސަރަހައްދުގައި އާއި އަތޮޅުތެރޭގެ އެހެން ހިސާބުތަކުގައި މި ޕްރޮގުރާމް ކުރިއަށްދާނެކަމަށް ސްމާޓް ވެލީން މައުލޫމާތުދެ އެވެ.
ޔަންގް އިންޖިނިއާރސް ޕްރޮގްރާމް އިފްތިތާހްކޮށްދެއްވީ ބުރާސްފަތި ދުވަހު ހެނދުނު މިކަމަށްޓަކައި ބޭއްވި ރަސްމިއްޔާތެއްގައި ކުޅުދުއްފުށީ ސިޓީ މޭޔަރު މުހައްމަދު އާތިފް އާއި އެސިޓީގެ ސްކޫލުތަކުގެ ޕްރިންސިޕަލުންނެވެ.
މި ޕްރޮގުރާމް ހުޅުވާލެވިފައިވަނީ އުމުރުން 6-12 އަހަރާ ދެމެދުގެ ކުދިންނަށެވެ. ޔަންގް އިންޖިނިއާރސް ޕްރޮގްރާމްތަކަކީ ހަވާރޑް ސްކޫލް އޮފް އެޑިއުކޭޝަން އަދި ޔޫރަޕިއަން ޔޫނިއަނުންވެސް ބަލައިގަނެފައިވާ ޕްރޮގްރާމެކެވެ.
މިރަސްމިއްޔާތު ޝަރަފްވެރިކޮށްދެއްވާ ވާހަކަ ދައްކަވަމުން ކުޅުދުއްފުށި ސިޓީގެ މޭޔަރ މުހައްމަދު އާތިފް ވިދާޅުވީ މުސްތަގުބަލު ބިނާކުރުމަށް އެންމެ މުހިންމުކަމަކީ އީޖާދީ އިންސާނީ ޖީލެއް އުފެއްދުންކަމަށެވެ.
މީގެއިތުރުން މޭޔަރު ވިދާޅުވީ، ޅަފަތުގެ ދުވަސްވަރު ތުއްތު ކުދިންނަށް ކްރިޓިކަލް ތިންކިންގ ނުވަތަ އެ ކުދިންގެ ވިސްނުން އެހެން ގޮތްގޮތަށް ބޭނުންކުރަން ދަސްކުރެވޭނެ ކަހަލަ ޕްރޮގްރާމްތައް ހިންގުމަކީ ކުދިންގެ ސިކުނޑި އިތުރަށް ތަރައްޤީވެ ކުދިން ވިސްނާ ގޮތް ބަދަލުކޮށް ތައުލީމު ހާސިލުކުރުމުގައި ކުދިން ކުރިއަށްދިޔުމަށްޓަކާ އެ ކުދިންނަށް ލިބޭ ވަރަށް ބޮޑު ފުރުޞަތެއްކަމަށެވެ. ދުނިޔޭގެ ކުރިއަރާފައި ހުރި ހަލޯރަތްތައް ކުރިއަރާފައި ހުރި އެންމެ ބޮޑު ސަބަބެއްކަމުގައި ތާރީހު ދައްކާ ހަގީގަތަކީ އެތަނެއްގެ އިންސާނުންގެ ވިސްނުން ކުރިއަރާ ދިޔުމާއި އެތަނެއްގެ ތައުލީމީ ފެންވަރު ކުރިއަރާ ދިޔުންކަން މޭޔަރު ވިދާޅުވި އެވެ.
2008 ވަނަ އަހަރު އުފެދިފައިވާ ޔަންގް އިންޖިނިއާރސް ޕްރޮގްރާމް ކުރިއަށްގެންދާ މަޝްހޫރު ގައުމުތަކުގެ ތެރޭގައި އެމެރިކާ، އިނގިރޭސި ވިލާތް، ޖަރުމަނު، އިޓަލީ ޖަޕާން، ސިންގަޕޫރު އަދި މެލޭޝިއާ ފަދަ ގައުމުތައް ހިމެނެ އެވެ.
މިރަސްމިއްޔާތުގެ ސްމާޓް ވެލީ އިންސްޓިޓިއުޓްގެ ވެރިންނާއި ޓީޗަރުން އަދި ކުޅުދުއްފުށީގައި ހުންނަ ސަރުކާރުގެ އިދާރާތަކުގެ ވެރިން ބައިވެރިވެވަޑައިގެންނެވި އެވެ. ސްމާޓް ވެލީ އިންސްޓިޓިއުޓްގެ ދަށުން މިހާރުވެސް ކުޅުދުއްފުށީގައި އަންނަނީ ޕްލޭ ސްކޫލެއް ހިންގަމުންނެވެ.
