ރެއާލްގައި ހަޒާޑްގެ ފުރަތަމަ ފައިނަލް މިރޭ

ރެއާލް މެޑްރިޑްގެ ކުޅުންތެރިއެއްގެ ގޮތުގައި އެޑެން ހަޒާޑް ކުޅޭ ފުރަތަމަ ފައިނަލް މެޗު މިރޭ އޮންނާނެއެވެ.

ހަޒާޑް ރެއާލް މެޑްރިޑަށް ބަދަލުވީ 2019 ވަނަ އަހަރުއެވެ. ނަމަވެސް ޗެލްސީގައި މޮޅު ކުޅުމެއް ދެއްކި ހަޒާޑަށް ރެއާލްގައި މިހާތަނަށް އޭނާގެ އެންމެ ރަނގަޅު ކުޅުން ނުދެއްކެއެވެ. އަނިޔާގެ ސަބަބުން ގިނަ ދުވަސްތަކެއް އޭނާ ހޭދަކުރަން ޖެހުނީ ކުޅުމާއި ދުރުގައެވެ. ނަތީޖާއަކަށްވީ އަނިޔާއިން ސަލާމަތްވެ ހުންނަ މަދު ދުވަސްތަކުގައިވެސް އޭނާއަށް ރެއާލްގައި ކުޅެން ލިބޭ ފުރުސަތު މަދުވުމެވެ. މިހާތަނަށް ހަޒާޑް ރެއާލްއަށް ކުޅެދިނީ 48 މެޗެވެ.

ރެއާލްއާއި ހަޒާޑް ގުޅުނު ފަހުން އެޓީމު ވަނީ ތިން ފައިނަލެއްގައި ވާދަކޮށްފައެވެ. އެންމެ ފުރަތަމަ ކުޅުނީ 2020 ވަނަ އަހަރު ސުޕަކޮޕާ ޑި އެސްޕާނާގެ ފައިނަލްގައެވެ. މި މެޗުގައި ޕެނަލްޓީ ޖަހައިގެން ރެއާލްއިން ވަނީ އެތުލެޓިކޯ މެޑްރިޑްގެ މައްޗަށް ކުރިހޯދާފައެވެ. ހަޒާޑަށް މި މެޗު ގެއްލުނީ ޗެމްޕިއަންސް ލީގުގައި ޕީއެސްޖީއާއި ދެކޮޅަށް ކުޅުނު މެޗުގައި ލިބުނު އަނިޔާގެ ސަބަބުންނެވެ.

އޭގެ ފަހުން ރެއާލް ވާދަކުރީ މިދިޔަ ސީޒަންގެ ދެފައިނަލެއްގައެވެ. އެއީ ސުޕަކޮޕާ ޑި އެސްޕާނާގައި އެތުލެޓިކް ކްލަބާއި ދެކޮޅަށް ކުޅުނު މެޗުގެ އިތުރުން ޗެމްޕިއަންސް ލީގުގެ ފައިނަލްގައި ލިވަޕޫލްއާއި ދެކޮޅަށް ކުޅުނު މެޗެވެ. މި ދެމެޗުގައިވެސް ހަޒާޑް ހުރީ ރަނގަޅު ފޯމެއްގައި ނޫންކަމުން އޭނާއަށް ޓީމު ލިސްޓުން ޖާގަ ނުލިބެއެވެ.

ކްލަބާއި ގުޅުނު ފަހުން ގާތްގަނޑަކަށް ތިން އަހަރު ވީއިރު، ޓީމާއެކު ފައިނަލެއްގައި ބައިވެރިވުމުގެ ފުރުސަތު ހަޒާޑަށް ލިބޭނީ މިރެއެވެ. މިރޭ ރާއްޖެ ގަޑިން ދަންވަރު 12 ޖަހާއިރު ޔުއެފާ ސުޕަ ކަޕްގެ ފައިނަލްގައި ރެއާލް ނުކުންނާނީ އެއިންޓްރެކް ފްރޭކްފާޓާއި ދެކޮޅަށެވެ. މި މެޗަށް ރެއާލްއިން ނެގި ސްކޮޑުގައި ހިމެނި، ހަޒާޑް ވަނީ ޓީމާއެކު މެޗު ކުޅުމަށް ހަމަޖެހިފައިވާ ހެލްސިންކީއަށް ދަތުރުކޮށްފައެވެ.