ބަންގްލަދޭޝް ބަލިކޮށް ޗެމްޕިއަންކަން ހޯދީ އިންޑިޔާ

ފައިނަލްގައި ބަންގްލަދޭޝް ބަލިކޮށް, 20 އަހަރުން ދަށުގެ ސާފް ޗެމްޕިއަންޝިޕްގެ ޗެމްޕިއަންކަން އިންޑިޔާއިން ހޯދައިފިއެވެ.

ލީގު ބުރުގައި ކުޅުނު ހަތަރު މެޗުވެސް ކާމިޔާބުކޮށް ފައިނަލަށް ދަތުރުކުރި ބަންގްލަދޭޝްގެ މައްޗަށް ފައިނަލްގައި އިންޑިޔާއިން ކުރި ހޯދީ 5-2 ނެވެ. ލީގު ބުރުގައި އިންޑިޔާ ބަލިވީ ހަމައެކަނި ބަންގްލަދޭޝް އަތުންނެވެ. އެކަމަކު ފައިނަލްގައި ބަދަލުހިފާ ތަށި ހޯދީ އިންޑިޔާއިންނެވެ. މެޗުގެ ތަރިއަކީ އިންޑިޔާގެ ގުރުކިރާތު ސިންގްއެވެ. މެޗުގައި އޭނާ ހަތަރު ގޯލް ޖެހިއެވެ. މުބާރާތުގެ އެންމެ ގިނަ ލަނޑު ޖެހި ކުޅުންތެރިއަކީވެސް އޭނާއެވެ. މުބާރާތުގައި އޭނާ 8 ގޯލް ޖެހިއެވެ.

މެޗުން އިންޑިޔާ މޮޅުވީ 90 މިނެޓްގެ ތެރޭގައި ދެޓީމް އެއްވަރުވުމުން ނަތީޖާ ނެރުމަށް ކުޅުނު 15 މިނިޓްގެ ދެހާފްގައި ތިން ގޯލް ޖަހައިގެންނެވެ. 90 މިނިޓް ނިމުނީ ދެޓީމް 2-2 ން އެއްވަރުވެގެންނެވެ.

މުބާރާތުގައި ވާދަކުރި ރާއްޖޭގެ ޓީމަށް ލިބުނީ އެއް ޕޮއިންޓެވެ. އެއީ ސްރީލަންކާއާ އެއްވަރުކޮށް ލިބުނު ޕޮއިންޓެވެ. ފަހު މެޗުގައި އިންޑިޔާއާ ރަނގަޅު ވާދައެއް ކުރިއެވެ. އެމެޗު އިންޑިޔާ ކާމިޔާބުކުރީ ފަހުވަގުތު ޖެހި ލަނޑުންނެވެ. އިންޑިޔާ ފައިނަލަށް ދަތުރުކުރީވެސް ރާއްޖެ ބަލިކޮށްގެންނެވެ.