20 އަހަރުން ދަށުގެ ސާފް ޗެމްޕިއަންޝިޕްގައި ދިވެހިރާއްޖެ ބަލިކޮށް, ބަނގްލަދޭޝްއިން ތިންވަނަ މެޗުވެސް ކާމިޔާބުކޮށްފިއެވެ.
ބަނގްލަދޭޝް ރާއްޖެ އަތުން މޮޅުވީ 4-1 ނެވެ. ބަނގްލަދޭޝް ވަނީ ރާއްޖެ އަތުން މޮޅުވުމުގެ ކުރިން ސްރީލަންކާއާއި, ސަރަހައްދުގެ ގަދަބާރު އިންޑިޔާ ބަލިކޮށްފައެވެ. ރާއްޖެ އަތުން މޮޅުވި މެޗުގައި މިރާޚުލް އިސްލާމް ފުރަތަމަ ހާފްގައި ހެޓްރިކް ހެދިއެވެ. އެޓީމްގެ އަނެއް ލަނޑު ޖަހަން ރަފީގުލް އިސްލާމްއަށް ފުރުޞަތު ފަހިކޮށްދިނީވެސް އޭނާއެވެ. އޭނާ ވަނީ މުބާރާތުގައި ލަންކާ ކޮޅަށްވެސް ލަނޑު ޖަހާފައެވެ. މުބާރާތުގެ ފައިނަލުން ޖާގަ ހޯދަން ބަނގްލަދޭޝްއަށް އަންގާރަ ދުވަހު ނޭޕާލް އަތުން ބޭނުންވަނީ ޕޮއިންޓެކެވެ. އޭގެކުރިންވެސް އާދިއްތަ ދުވަހު ނޭޕާލްއާއި އިންޑިޔާ އެއްވަރުވެއްޖެނަމަ ބަނގްލަދޭޝްއަށް ފައިނަލުން ޖާގައެއް ޔަޤީންވާނެއެވެ. ނޭޕާލްވެސް ވަނީ ކުޅުނު ތިން މެޗުން މޮޅުވެފައެވެ.
އިންޑިޔާ ވަނީ މިއަދު ސްރީލަންކާ ބަލިކޮށްފައެވެ. ލަންކާ އަތުން އިންޑިޔާ މޮޅުވީ 4-0 ނެވެ. ރާއްޖެ މުބާރާތުގައި މިހާތަނަށް ކުޅުނު ދެ މެޗުންވެސް ވަނީ ބަލިވެފައެވެ. ކޮންމެ މެޗެއްގައި ހަތަރު ގޯލް ބައިކޮޅަށް ވަނެވެ. ފުރަތަމަ މެޗުގައި ބަލިވީ ނޭޕާލް އަތުންނެވެ.
