ނޭޕާލްވެސް ދެ މެޗުން މޮޅު

އިންޑިޔާގައި މިހާރު ކުރިއަށްދާ 20 އަހަރުން ދަށުގެ ސާފް ޗެމްޕިއަންޝިޕްގައި ނޭޕާލްވެސް ކުޅުނު ދެވަނަ މެޗު ކާމިޔާބުކޮށްފިއެވެ.

ފުރަތަމަ މެޗުގައި ރާއްޖެ ބަލިކުރި ނޭޕާލުން ދެވަނަ މެޗުގައި ބަލިކުރީ ސްރީލަންކާއެވެ. ރާއްޖެ އަތުން ނޭޕާލް މޮޅުވީ 4-0 ނެވެ. ސްރީލަންކާ އަތުން ނޭޕާލް މޮޅުވީ 3-0 ނެވެ. ސްރީލަންކާ ކޮޅަށް ނޭޕާލްގެ ލަނޑުތައް ޖެހީ ކެޕްޓަން އަޔޫޝް ގާލަން, ކްރިޓިޝް ރަނާ, އަދި މަނަގްޔާ ނަކާމީއެވެ. ނޭޕާލުން ވަނީ ދެ މެޗުން ހަ ޕޮއިންޓް ހޯދާފައެވެ. ނޭޕާލްގެ ތިންވަނަ މެޗުގައި އާދިއްތަ ދުވަހު ވާދަކުރާނީ އިންޑިޔާއާއެވެ. އިންޑިޔާ ވަނީ ފުރަތަމަ މެޗުގައި ބަންގްލަދޭޝް އަތުން ބަލިވެފައެވެ.

ނޭޕާލްގެ އިތުރުން ދެ މެޗުން މޮޅުވެފައިވަނީ ބަންގްލަދޭޝްއެވެ. ބަންގްލަދޭޝް މޮޅުވީ ސްރީލަންކާއާއި އިންޑިޔާ އަތުންނެވެ. ބަންގްލަދޭޝްއަށް ކުރިއަށް އޮތީ ހުކުރު ދުވަހު ރާއްޖެއާ ވާދަކުރާ މެޗެވެ.