ޓައިވާން މައްސަލައާއި ޔޫކްރެއިން މައްސަލައިގައި ބައިޑަން އާއި ޝީ ވާހަކަފުޅުދައްކަވަނީ
27 ޖުލައި 2022 | ބުދަ 03:32ދެގައުމުގެ އިގްތިސާދާއި ގުޅޭ ގޮތުން މަޝްވަރާކުރައްވާނެ
ޓައިވާނާއި ޔޫކްރެއިންގެ މައްސަލަައިގައި ބައިޑަން އާއި ޝީ ވާހަކަފުޅުދެއްކެވުމަށް ވަނީ ހަމަޖެހިފައި | ރޮއިޓާސް
ޓައިވާންގެ މައްސަލައިގައި އުފެދިފައިވާ ނުތަނަވަސް ކަމާއި ރަޝިއާ ޔޫކްރެއިން މައްސަލައިގައި ދުނިޔޭގެ ދެ ބާރުކަމުގައިވާ ޗައިނާގެ ރައީސް ޝީ ޖިންޕިންގ އަދި އެމެރިކާގެ ރައީސް ޖޯ ބައިޑެން ވާހަކަފުޅު ދައްކަވަން ހަމަޖެހިފައިވާ ކަމަށް ބައިނަލްއަގުވާމީ މީޑިއާތަކުގައި ރިޕޯޓްކޮށްފިއެވެ.
ރޮއިޓަރސްގައި ބުނެފައިވަނީ ޓައިވާން އަދި ޔޫކްރެއިން މައްސަލައިގައި ބުރާސްފަތި ދުވަހުގެ ވަގުތެއްގައި ދެ ރައީސުން ވާހަކަފުޅު ދައްކަވާނެ ކަމަށެވެ. ވައިޓް ހައުސްގެ ނޭޝަނަލް ސެކިއުރިޓީ ސްޕޯކްސްޕާސަން ޖޯން ކަރބީ އަންގާރަ ދުވަހު ނޫސްވެރިންނަށް ވިދާޅުވެފައިވަނީ މި މަޝްވަރާގެ ތެރެއިން ދެގައުމުގެ ދެމެދުގައި އޮތް އިގްތިސާދީ އަރައިރުމުގެ މައްސަލައިގައި ހައްލު ހޯދުމާއި ގުޅޭގޮތުން ވެސް ވާހަކަފުޅު ދައްކަވާނެ ކަމަށެވެ.
މިއީ ދެބޭފުޅުންގެ މެދުގައި ބޭއްވޭ ފަސް ވަނަ މަޝްވަރާ ބައްދަލުވުމެވެ. ދެ ރައީސުން ވާހަކަފުޅު ދައްކަވަން ހަމަޖެހިފައިވާއިރު، އެމެރިކާގެ ގާނޫނު ހަދާ މަޖިލީހުގެ ހައުސް އޮފް ރެޕްރެޒެންޓޭޓިވްގެ ސްޕީކަރ ނޭންސީ ޕެލޮސީ ޓައިވާނަށް ކުރެއްވުމަށް ހަމަޖެހިފައިވާ ދަތުރުފުޅާއި ގުޅިގެން ޗައިނާއިން ވަނީ ބައިޑެންގެ ސަރުކާރަށް ވަރުގަދަ އިންޒާރެއް ވެސް ދީފައެވެ. ޗައިނާއިން ބުނާގޮތުން ޓައިވާނަކީ އެގައުމުގެ ބާރު ހިނގާ އެގައުމުގެ ސަރަހައްދެކެވެ.
މިއާއެކު، ޓައިވާންގެ މައްސަލައިގައި އުފެދިފައިވާ ނުތަނަވަސް ކަމާއި، ޔޫކްރެއިން ހަނގުރާމަ އަދި ދެގައުމުގެ ދެމެދުގައި އިގްތިސާދީގޮތުން އުފެދިފައިވާ ނުވަތަނަވަސްކަން މެނޭޖް ކުރާނެ ގޮތްތާއި ގުޅޭ ގޮތުން މަޝްވަރާކުރާނެ ކަމަށް ކަރބީ ވަނީ ވިދާޅުވެފައެވެ.
އޭނާ ވިދާޅުވީ މި ކޯލް ޝެޑިއުލް ކުރެވިފައިވާތާ ވަރަށް ދުވަސްވެއްޖެ ކަމަށާއި، ދެ ރައީސުން މަޝްވަރާ ކުރައްވާނެ ވަރުގަދަ ކަންތައްތަކެއް އެޖެންޑާ ކުރެވިފައިވާ ކަމަށެވެ.
ޗައިނާގެ ވަން-ޗައިނާ ޕޮލިސީގެ ދަށުން އެމެރިކާއާއި ޓައިވާނާ ދެމެދު ސިޔާސީ ގުޅުމެއް ގާއިމްވެފައި ނެތް ނަމަވެސް، އެމެރިކާގެ ގާނޫނުގެ ދަށުން ޓައިވާނަށް ދިފާއީ އެހީތެރިކަން ދިނުން ހިމެނެއެވެ. ދެ ރައީސުން ވާހަކަފުޅު ދެއްކެވުމަށް ހަމަޖެހިފައިވާ އިރު، ވައިޓް ހައުސްއިން ވަނީ ނޭންސީ ޕެލޮސީގެ ދަތުރުފުޅާއި ގުޅޭގޮތުން އެމެރިކާގެ ސްޓޭންޑަށް ބަދަލެއް ނާންނަކަމަށް ބުނެފައެވެ.
ސްޕޯކްސްޕާސަން ކަރބީ ވިދާޅުވީ ޕެލޯސީއަކީ ހާލަތެއް މެދުވެރިވެއްޖެނަމަ ރައީސްކަމާއި ހަވާލުވެވަޑައިގަންނަވާނެ ބޭފުޅެއް ކަމަށާއި، އެކަމަނާ ގައުމުން ބޭރަށް ކުރައްވާ ދަތުރުފުޅުތަކަކީ އެމެރިކާގެ ނޭޝަނަލް ސެކިއުރިޓީއާ ގުޅުން ހުރި ކަމެއް ކަމަށެވެ. ނަމަވެސް އެކަމަނާގެ ދަތުރުފުޅުތަކާއި ގުޅިގެން ގޮތް ނިންމެވޭނީ ޕެލޯސީއަށް އެކަނި ކަމަށް ވެސް ކަރބީ ވިދާޅުވިއެވެ.
ޗައިނާގެ މުދަލަށް އެމެރިކާއިން އަޅާފައިވާ ބައެއް ޓެރިފްތައް އުވާލާ އެމެރިކާގެ އިގްތިސާދު ކުރިއެރުވުމާއި ގުޅޭގޮތުން ސަރުކާރުގައި ބަހުސް ކުރެވެމުން އަންނަ އިރު، މި ނިންމުން ދެ ރައީސުންގެ ވާހަކަފުޅުގެ ކުރިން ނުނިންމޭނެކަމަށް ވެސް ކަރބީ ވިދާޅުވިއެވެ.
ދެ ރައީސުން ފޯން މެދުވެރިކުރައްވާ ވާހަކަފުޅު ދައްކަވަން ހަމަޖެހިފައިވާ އިރު، އެމެރިކާގެ ކޮންގްރެސްއިން ވަނީ ޗީޕްސް އެކްޓްގެ ނަމުގައި ގާނޫނެއް ހަދާ މި ގާނޫނުގެ ދަށުން ސެމީކޮންޑަކްޓަރ އިންޑަސްޓްރީއަށް ސަބްސިޑީގެ ގޮތުގައި 52 ބިލިއަން އެމެރިކާ ޑޮލަރު ދިނުމާއި، ޗިޕް ޕްލާންޓްތަކަށް އިންވެސްޓްމަންޓް ޓެކްސް ކްރެޑިޓްގެ ގޮތުގައި 24 ބިލިއަން ޑޮލަރު ދިނުމަށް ނިންމާފައެވެ.
ކުރިންވެސް ރާވާފައިވާ ކޯލް ރައީސް ޝީ އާއެކު ބޭއްވެވުމަށް ނިންމަވާފައިވާކަން އެމެރިކާގެ ރައީސް ބައިޑެން ހާމަކުރައްވަފައިވަނީ މި ގާނޫނާއި ގުޅޭގޮތުން ހޯމަ ދުވަހު ނޫސްވެރިންނާ ވާހަކަފުޅު ދައްކަވަމުންނެވެ. ނަމަވެސް އެއީ އެމަނިކުފާނު އުއްމީދުކުރައްވާ ގޮތް ކަމަށާއި، އެކަން ހަމަޖެހިގެން ދިއުމުން އެ މައުލޫމާތު ދެއްވާނެކަމަށް އޭރު ވަނީ ވިދާޅުވެފައެވެ. މި ގާނޫނަށް ސެނެޓުގައި ކުރިއަށް އޮތް ދުވަސްތަކުގައި ވޯޓަށް އަހާނެކަމަށް މައުލޫމާތު ލިބިފައިވެއެވެ.
