ގިނަ ބަދަލުތަކަކާއެކު ނުކުމެވެސް، މާޒިޔާއަށް ބޮޑު މޮޅެއް!

ލީގުގެ ޗެމްޕިއަންކަން ހޯދައިދިނުމަށްފަހު މާޒިޔާގެ ކޯޗު ކްލަބް ދޫކޮށްދިޔަ ފަހުން ކުޅުނު ފުރަތަމަ މެޗު ބަދަލުތަކަކާއެކު ނުކުމެ ކާމިޔާބުކޮށްފިއެވެ.

އެސިސްޓެންޓް ކޯޗު އަހުމަދު ސުޒޭރުގެ އިރުޝާދުގެ ދަށުން ޔުނައިޓެޑް ވިކްޓްރީއާ ދެކޮޅަށް މާޒިޔާ ނުކުތީ ގިނަ ބަދަލުތަކަކާއެކުއެވެ. މެޗަށް މާޒިޔާ ނުކުތީ ޒުވާން ކީޕަރު އިޔާން އަބްދުލްއަލީމް ފުރަތަމަ އެގާރައިގައި ހިމަނައިގެންނެވެ. އަދި ދެވަނަ ހާފްގައި ގޯލް ހަވާލުކުރީ ހުސެއިން ޝަރީފާއެވެ. ފުރަތަމަ އެގާރައިގައި އާއްމުކޮށް ނުކުޅޭ ކުޅުންތެރިންގެ ތެރެއިން މިއަދު ފުރަތަމަ އެގާރައިން ސުޒޭރު ފުރުސަތުދިން ކުޅުންތެރިންގެ ތެރޭގައި؛ އަސަދުﷲ އަބްދުﷲ, ޑިފެންޑަރ އަހުމަދު އަބްދުﷲ (ލިލީ), އަކްރަމް އަބްދުލްޣަނީ, އިބްރާހީމް ވަހީދު ހަސަން, އަދި މޫސާ ޔާމީން ހިމެނެއެވެ.

މެޗު މާޒިޔާއިން ކާމިޔާބުކުރީ 4-0ންނެވެ. ފުރަތަމަ ހާފްގައި މާޒިޔާއިން ތިން ލަނޑު ޖެހިއެވެ. ފުރަތަމަ ލަނޑު 14 ވަނަ މިނިޓްގައި ޖެހީ ނާއިޒް ހަސަން (ދާދު)އެވެ. އޭގެ މިނިޓެއް ފަހުން ދެވަނަ ލަނޑު ޖެހީ ކެޕްޓަން ބޭންޑް އަޅައިގެން ކުޅުނު ހަމްޒާ މުހާއްމަދު (ހަމްޕު)އެވެ. ފުރަތަމަ ހާފް ނިމެން ފަސް މިނިޓަށް ވެފައިވަނިކޮށް ތިންވަނަ ލަނޑުޖެހީ އިބްރާހީމް ވަހީދު ހަސަންއެވެ. ދެވަނަ ހާފްގައި މާޒިޔާގެ ލަނޑު ޖެހީ މޫސާ ޔާމީންއެވެ.

މިމޮޅާއެކު ޗެމްޕިއަން މާޒިޔާ އެއްވަނާގައި އޮތީ 57 ޕޮއިންޓާއެކުއެވެ. ޔުނައިޓެޑް ވިކްޓްރީ އޮތީ 26 ޕޮއިންޓާއެކުއެވެ. ލީގުގައި ދެޓީމަށްވެސް ބާކީ އޮންނާނީ އެއް މެޗެވެ. ލީގުގައި އަންގާރަ ދުވަހުގެރޭ ވާދަކުރާނީ ކްލަބް އީގަލްސްއާއި ވެލެންސިޔާއެވެ.