އިންޑިޔާގައި މިއަދު ފެށި 20 އަހަރުން ދަށުގެ ސާފް ޗެމްޕިއަންޝިޕްގައި ނޭޕާލް އަތުން ބަލިވެ، ރާއްޖޭގެ ފެށުން ގޯސްވެއްޖެއެވެ.

ފައިނަލް ކުޅުމުގެ އުއްމީދުގައި މުބާރާތަށް ދިޔަ ޒުވާން ޓީމް ފުރަތަމަ މެޗުގައި ނޭޕާލް އަތުން ބަލިވީ 4-ންނެވެ. މެޗުގެ ފުރަތަމަ ހާފްގައި ނޭޕާލުން އެއްގޯލް، އަދި ދެވަނަ ހާފްގައި ތިން ގޯލް ޖެހިއެވެ ނޭޕާލުން ކުރި ހޯދީ ފުރަތަމަ ހާފް ނިމެން ތިން މިނިޓަށް ވެފައިވަނިކޮށް ދިޕޭޝް ގުރުންގްއެވެ. ދެވަނަ ގޯލް ދެވަނަ ހާފް ފަށައިގެން 12 ވަނަ މިނިޓްގައި ޖެހީ ސުގަމް ސުވާލްއެވެ. ތިންވަނަ ލަނޑު ޖެހީ ކްރިތިޝް ރަތުނާއެވެ. ފަހު ލަނޑު މެޗުގެ އިތުރު ވަގުތުގައި ޖެހީ މަނަގްޔާ ނަކާމީއެވެ.

ފަސް ޓީމް ވާދަކުރާ މުބާރާތުގެ ފައިނަލުން ޖާގަ ލިބޭނީ، ލީގު ބުރެއް ނިމޭއިރު އެންމެ ގިނަ ޕޮއިންޓް ހޯދާ ދެޓީމަށެވެ. ރާއްޖެއާއި ނޭޕާލްގެ އިތުރުން މުބާރާތުގައި ވާދަކުރަނީ އިންޑިޔާއާއި ބަނގްލަދޭޝްއާއި ސްރީލަންކާއެވެ. ރާއްޖޭގެ ޒުވާން ޓީމް ދެވަނަ މެޗުގައި މިމަހުގެ 29 ވަނަ ދުވަހު ވާދަކުރާނީ ބަންގްލަދޭޝްއާއެވެ. މުބާރާތް ކުރިއަށްގެންދަނީ އިންޑިޔާގެ އޮޑިޝާ ސްޓޭޓްގެ ބުބަނޭޝްވަރު ސިޓީގައެވެ.