ޕެރިސް ސެއިންޓް ޖާމަން (ޕީއެސްޖީ) ދޫކޮށް އެހެން ޓީމަކަށް ބަދަލުވާން ބޭނުންނުވާ ކަމަށް އެ ޓީމަށް ކުޅެމުން އަންނަ ބްރެޒިލްގެ ތަރި ނޭމާ ޖޫނިއަރ ބުނެފިއެެވެ.

ބޭރުގެ ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި ނޭމާ ހޯދުމުގެ ޝައުގުވެރިކަން ފާޅުކޮށް، ބައެއް ކުލަބުތަކުން ވަނީ ޕީއެސްޖީއާ އެކަން ހިއްސާކޮށްފައެވެ. އެވާހަކަތައް ދެކެވެމުން ދަނިކޮށް، ޕީއެސްޖީގެ ކޯޗު ކްރިސްޓޮފް ގަލްޓިއޭ ބުނީ ނޭމާއަކީ އޭނާގެ ޕްލޭންގައި ހިމެނޭ މުހިންމު ކުޅުންތެރިއެއް ކަމަށާއި، އޭނާ ބޭނުންވަނީ ނޭމާ ޓީމުގައި މަޑު ކުރަން ކަމަށެވެ. ގަލްޓިއޭ ވަނީ ނޭމާއަކީ ދުނިޔޭގެ ހުރިހާ ކޯޗުން ވެސް ބޭނުންވާ ކަހަލަ ޓޮޕް ކުޅުންތެރިއެއް ކަމަށެވެ.

އެކަމާ ގުޅޭ ގޮތުން ދާދި ފަހުން ނޭމާ ބުނީ، އޭނާ ބޭނުންވަނީ ޕެރިސްގައި މަޑުކުރަން ކަމަށެވެ. އޭނާގެ މުސްތަޤުބަލާ ބެހޭ ގޮތުން ކުލަބުގެ އެއްވެސް މީހަކު އޭނާ ގާތު ވާހަކައެއް ނުދައްކާކަން ފާހަގަކޮށް ނޭމާ ބުނީ، ހާލަތު އަދި ބަދަލު ނުވާ ކަމަށެވެ. މީގެ އިތުރުން ނޭމާ ބުނީ ޕީއެސްޖީން އޭނާއާމެދު ގެންގުޅޭ ވިސްނުމެއް ނޭންގުނު ނަމަވެސް، އޭނާ ބޭނުންވަނީ ކުލަބުގައި މަޑުކުރަން ކަމަށެވެ.

ނޭމާ އަންނަނީ ޕީއެސްޖީއާއެކު ކުރިއަށް އޮތް ސީޒަންގެ ފަރިތަކުރުންތަކުގައި ބައިވެރިވެ، އެކުވެރިކަމުގެ މެޗުތަކުގައި ވެސް ކުޅެމުންނެވެ. ކުރިއަށް އޮތް ސީޒަނަށް ޕީއެސްޖީގެ އެންމެ ބޮޑު ޓާގެޓަކީ ޔުއެފާ ޗެމްޕިއަންސް ލީގު ކާމިޔާބުކުރުމެވެ.

ސްޕެއިންގެ ބާސެލޯނާ ދޫކޮށް 2017 ވަނަ އަހަރު ނޭމާ ޕީއެެސްޖީއަށް ބަދަލުވީ ބޮޑު އަގަކަށެވެ. ޕީއެސްޖީއަށް ބަދަލުވި ފަހުން އޭނާ ވަނީ އެ ޓީމަށް ކުޅެދިން 144 މެޗުގައި 100 ލަނޑު ޖަހާފައެވެ. މީގެ އިތުރުން ނޭމާ ވަނީ ކުލަބާއެކު ފްރާންސް ލީގާއި، ފްރާންސް ކަޕާއި އަދި ލީގު ކަޕް ކާމިޔާބުކޮށްފައެވެ.