ބާސެލޯނާއިން ރަފީނިއާގެ ޑީލް ކާމިޔާބުކޮށްފި

ބާސެލޯނާއިން ބްރެޒިލްގެ ވިންގަރ ރަފީނިއާ ހޯދުމުގެ ޑީލް ކާމިޔާބުކޮށްފިއެވެ.

މީޑިއާ ރިޕޯޓުތައް ބުނާ ގޮތުގައި ބާސާއިން ރަފީނިއާގެ ޑީލް ކާމިޔާބުކުރީ އިނގިރޭސި ޕްރިމިއަރ ލީގުގެ ޗެލްސީ އާއި އާސެނަލުން ވެސް އޭނާ ހޯދުމުގެ މަސައްކަތް ކުރަމުން ދަނިކޮށެވެ.

ރަފީނިއާ ހޯދުމަށް ބާސާއިން ކުރި ބިޑު ލީޑްސް ޔުނައިޓެޑުން ވަނީ ގަބޫލުކޮށްފައެވެ. އޭނާ ހޯދުމަށް ބާސާއިން ކުރި ބިޑުގެ ޖުމުލަ އަގަކީ 67 މިލިއަން ޔޫރޯއެވެ. ކުޅިވަރު ނޫސްވެރިޔާ ފެބްރީޒިއޯ ރޮމާނޯ ބުނި ގޮތުގައި ބާސާއަކީ ރަފީނިއާ ބަދަލުވާން ބޭނުންވި ކުލަބެވެ. އަދި އެ ޓީމާއެކު އޭނާ ފަސް އަހަރު ދުވަހުގެ އެއްބަސްވުމެއްގައި ސޮއިކުރާނެ ކަމަށެވެ. އެހެންކަމުން 2025 ވަނަ އަހަރުގެ ޖޫން މަހުގެ ނިޔަލަށް ރަފީނިއާ ބާސާގައި މަޑުކުރާނެއެވެ.

މީގެ އިތުރުން ރޮމާނޯ ބުނި ގޮތުގައި ރަފީނިއާގެ އެޖެންޓު ޑެކޯ ވަނީ އޭނާ ބާސާއަށް ބަދަލުވުމަށް މީގެ ފަސް މަސް ދުވަސް ކުރިން އެއްބަސްވެފައެވެ. ޑެކޯއަކީ ކުރިން ބާސާ އާއި ޗެލްސީއަށް ވެސް ކުޅުނު މިޑްފީލްޑަރެކެވެ. ބާސާއަށް ބަދަލުވުުގެ ގޮތުން ހަދަން ޖެހޭ މެޑިކަލް ޓެސްޓުތަކާއި، އެއްބަސްވުމުގައި ސޮއިކުރުމަށް ރަފީނިއާ ބާސާއަށް ދަތުރުކުރުމުގެ ތައްޔާރީތައްވަމުންދާ ކަމަށް ރޮމާނޯ ވަނީ ބުނެފައެވެ.

އުމުރުން 25 އަހަރުގެ ރަފީނިއާ ލީޑްސް ޔުނައިޓެޑަށް ބަދަލުވީ 2020 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް 67 މެޗު ކުޅެދީ 17 ލަނޑު ޖަހާފައެވެ. 2019 ވަނަ އަހަރުން ފެށިގެން ރަފީނިއާ އަންނަނީ ބްރެޒިލްގެ ޤައުމީ ޓީމަށް ވެސް ކުޅެމުންނެވެ. ޤައުމީ ޓީމަށް ކުޅެދިން ނުވަ މެޗުގައި އޭނާ ވަނީ ތިން ލަނޑު ޖަހާފައެވެ.

ކުރިއަށް އޮތް ސީޒަނަށް ބާސާ ވަރުގަދަ ކުރުމުގެ މަސައްކަތުގެ ތެރެއިން އެ ޓީމުން ވަނީ ޗެލްސީއަށް ކުޅެމުން އައި ޑެންމާކުގެ ޑިފެންޑަރު އަންދްރެސް ކްރިސްޓެންސަން އާއި އޭސީ މިލާނަށް ކުޅެމުން އަައި އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭގެ ސޮއި ހޯދާފައެވެ. މީގެ އިތުރުން އެ ޓީމުން އަންނަނީ ޖަރުމަނުގެ ބަޔާން މިއުނިކަށް ކުޅެމުން އަންނަ ރޮބާޓް ލެވަންޑޯސްކީ ހޯދުމުގެ މަސައްކަތް ވެސް ކުރަމުންނެވެ. ލެވަންޑޯސްކީ ވަނީ ބަޔާން ދޫކޮށްލަން ބޭނުންވާކަމަށް ބުނެފައެވެ. އަދި އޭނާ ވަނީ ބާސާއަށް ގުޅުމުގެ ޝައުގުވެރިކަން ވެސް ފާޅުކޮށްފައެވެ.