ހިތާއި ބިސް

ދުވާލަކު އެއް ކުކުޅު ބިސް ކެއުމަކީ ހިތުގެ ހިނގުމަށް އޭގެ ރަނގަޅު އަސަރު ކުރާ ކަމެއްކަމަށް ދިރާސާތަކުން ދައްކައެވެ. އެއީ ހިތުގެ ތަފާތު ބަލިތަކާވެސް ދުރުވުމަށް މަގު ފަހި ކޮށްދޭ ކަމެއްކަމަށް "ދި ހެލްތް ބްލޮގް" ގައި ޝާއިއުކޮށްފައިވާ ލިއުމެއްގައި ބަޔާންކޮށްފައިވެއެވެ.

ބިހަކީ އޭގައި ކޮލެސްޓްރޯލް އެކުލެވޭ އެއްޗެއް ނަމަވެސް، އެއީ ހަށިގަނޑަށް ބޭނުންވާ އެތައް ނިއުޓްރިޝަނަކުން މުއްސަނދި ވެފައިވާ އެއްޗެއްވެސް މެއެވެ.

2018 ގައި 500،000 ބައިވެރިން ބޭނުންކޮށްގެން ހަދާފައިވާ ދިރާސާއަކާ ޙަވާލާދީ ހެލްތު ބްލޮގްގައި ރިޕޯޓުކޮށްފައިވާ ގޮތުން، ދުވާލަކު ކުކުޅު ބިހެއް ކާ މީހުންނަށް ހިތުގެ ބަލިތަކާއި ސްޓްރޯކް ޖެހުން ނިސްބަތުން މަދެވެ. އެކަން އިތުރަށް ކަށަވަރު ކުރުމަށް ދިރާސާ ކުރި ފަރާތްތަކުން ވަނީ އާބާދީއަށް އަމާޒުކޮށްވެސް އެކަމާ ގުޅޭ އިތުރު ދިރާސާތައް ކުރިއަށް ގެންގޮސްފައެވެ.

ދިރާސާކުރި ފަރާތްތަކުން ވަނީ 4778 ބައިވެރިން ބޭނުންކޮށްގެން އަނެއްކާވެސް ތަހުލީލުތަކެއް ކުރިއަށް ގެންގޮސްފައެވެ. އޭގެ ތެރެއިން 3401 މީހުންނަކީ ހިތުގެ ކޮންމެސް މައްސަލައެއް ކުރިމަތިވެފައިވާ މީހުންނެވެ. 1377 މީހުންނަކީ ސިއްޙަތު ރަނގަޅު މީހުންނެވެ.

އެ ދިރާސާއިން ދައްކާ ގޮތުގައި އާދައިގެ މިންވަރަކަށް ކެއުމުގައި ބިސް ބޭނުން ކުރާ މީހުންގެ ލޭގައި "އެޕޯލިޕޯ ޕްރޮޓީން" (އޭ-1) ނަމަކަށް ކިޔާ ޕްރޮޓީންއެއް ހިމެނޭ މިންވަރު ގިނައެވެ. އެއީ ހަށިގަނޑަށް ފައިދާހުރި ރަނގަޅު ކޮލެސްޓްރޯލް އުފެއްދުމުގައި މުހިއްމު މާއްދާއެކެވެ.

އެމީހުންގެ ހަށިގަނޑުގައި ލޭ ހޮޅިތަކުން ކޮލެސްޓްރޯލްއާއި އެކި ބްލޮކޭޖްތައް ބޭރު ކުރުމަށް ބޭނުންވާ މާއްދާތައްވެސް ގިނަކަން ދިރާސާގެ ނަތީޖާއިން ވަނީ ދައްކާފައެވެ.

އޭގެ އިތުރުންވެސް ހިތުގެ ބަލިތަކާއި ގުޅުންހުރި 14 "މެޓަބޮލައިޓްސް" އެއް ވަނީ ފެނިފައެވެ. އެގޮތުން ގިނައިން ބިސް ބޭނުން ކުރާ މީހުންގެ ލޭގައި ހަށިގަނޑަށް ފައިދާ ހުރި މެޓަބޮލައިޓްސް ހިމެނޭ މިންވަރު އިތުރުކަން ވަނީ ދިރާސާއިން ދައްކާފައެވެ.

ހިތުގެ ބަލިތަކުން ދުރުކޮށްދިނުމުގެ އިތުރުންވެސް ބިހަކީ އޭގެ ޒާތުގައި ހަށިގަނޑަށް އެކި ކަހަލަ ފައިދާތައް ލިއްބައިދޭ އެއްޗެކެވެ. އެގޮތުން ބިހުގައި ހިމެނޭ "ކޮލިން" ކިޔާ މާއްދާއަކީ ސިކުނޑީގެ ސެލްތަކުގެ ވަރުގަދަކަން ދެމެހެއްޓުމަށް މުހިއްމު މާއްދާއެކެވެ.

ތަފާތު އެކި ގޮތްގޮތަށް ބިސް ކެއުމުގައި ބޭނުން ކުރެއެވެ. އެގޮތުން ހާޑް ބޮއިލްޑް، ސޮފްޓް ބޮއިލްޑް، ސްކްރޭމްބަލްޑް، ހަމައެއާއެކު، ބިސްގަނޑު ތަފާތު އެކި ގޮތްގޮތަށް ތައްޔާރު ކޮށްގެންވެސް ކެއުމުގައި ބިސް ބޭނުން ކުރެއެވެ.