ޒައިތޫނި ތެލުގެ ފައިދާ

އޮލިވްސް ނުވަތަ ޒައިތޫންޏަކީ މެދު އިރުމަތިން މަޝްހޫރުވެގެން ދިޔަ މޭވާއެކެވެ. މީގެ 8000 އެއްހާ އަހަރު ކުރިން ފެށިގެން އެކި ބޭނުންތަކުގައި ޒައިތޫނި ބޭނުން ކުރަމުންދާއިރު، ޤަދީމީ ގްރީކް މީހުންވެސް ގިނަ އަދަދަކަށް ޒައިތޫނި ބޭނުންކޮށް އުޅުނެވެ.

ހުޅަނގަށް ޒައިތޫނި މޭވާ ފެތުރިގެން ދިޔައީ ރޯމަނުންގެ ފަރާތުންކަމަށް ތާރީޚީ ލިއުންތަކުން ދައްކައެވެ.

ޒައިތޫނި އެކި ގޮތްގޮތަށް ބޭނުންކުރާއިރު، ޒައިތޫނި ތެލަކީވެސް އޭގައި ގިނަ ފައިދާތަކެއް އެކުލެވޭ އެއްޗެކެވެ. ހީޓްއާއި ތަފާތު އެކި ކެމިކަލްތައް ބޭނުން ނުކޮށް، ޤުދުރަތީ އުފެއްދުންތަކާއެކު ތައްޔާރުކުރާ މި ތެލަކީ އޭގައި އެތައް ގިނަ ބޭނުންތަކެއްވެސް ހިފޭ އެއްޗެކެވެ.

ކެއުމުގައި ޒައިތޫނި ތެޔޮ ބޭނުން ކުރުމަކީ ހިތުގެ ބަލިތަކާއި، ޑައިބެޓީސް އާއި، ކެންސަރުގެ އިތުރުން، ނޭވާ ހިއްލުން ފަދަ ކަންކަމާވެސް ދުރުކޮށްދޭ ކަމެއްކަމަށް ދި ހެލްތް ބްލޮގްގައި ޝާއިއުކޮށްފައިވެއެވެ.

ދިރާސާތަކުން ދައްކާ ގޮތުގައި ބަޓަރާއި، މާޖިރީން ނުވަތަ މަޔޮނައިޒްގެ ބަދަލުގައި ޒައިތޫނި ތެޔޮ ބޭނުން ކުރުމުން ހިތުގެ ބަލިތަކުން މީހާ ދުރުކޮށްދެއެވެ.

ދުވާލެއްގެ މައްޗަށް ސައި ސަމުސަލެއްގެ ޒައިތޫނި ތެޔޮ ކެއުމުގެ ބާވަތްތަކުގެ ތެރޭގައި ބޭނުންކުރާނަމަ، ހިތުގެ ބަލިތައް ޖެހުން 15 އިންސައްތައަށް ދަށް ކޮށްދެއެވެ.

ތެޔޮ ހޫނު ކުރުމުން އޭގެ ޒާތައް ބަދަލު އައިސް ކެންސަރާ ހަކުރު ބައްޔާއި ހިތުގެ ބަލި ފަދަ ނުރައްކާތެރި ބަލިތަކަށް މަގު ފަހި ކުރާ ކެމިކަލްތައް އުފެދޭކަން ހާމަވާ އެތައް ދިރާސާއެއް މީގެ ކުރިން ވަނީ ޝާއިއު ކޮށްފައެވެ.

ތަޖުރިބާކާރުން ބުނަނީ، ތެޔޮ ހޫނު ކުރުމުން އުފެދޭ ނުރައްކާތެރި ކެމިކަލްތައް ބިނާ ވަނީ އެ ތެލެއްގެ މޮޅު ދެރަ މިނަށާއި ތެޔޮ ހޫނުވާ ނިސްބަތެއްގެ މައްޗަށް ކަމުގައެވެ.

ތެޔޮ ހޫނު ވުމުން ނުރައްކާތެރި ކެމިކަލްތައް އުފެދޭކަން ފާހަގަ ވެފައިވާއިރު، ޒައިތޫނި ތެޔޮ މި ގޮތުން ނިސްބަތުން އެންމެ ރަނގަޅުވަނީ އޭގައި މަތީ މިންވަރަކަށް އެންޓި އޮކްސިޑަންޓްސް އެކުލެވިފައިވާތީ ކަމަށް ތަޖުރިބާކާރުން ބުނެއެވެ.

އެންމެ ފުރަތަމަ ޒައިތޫނި ތެޔޮ އުފެއްދީ ސްޕެއިނުން ކަމަށްވެއެވެ. އެއަށްފަހު އިޓަލީއާއި ގްރީސްއިންވެސް ޒައިތޫނި ތެޔޮ އުފެއްދިއެވެ. މިހާރު އިނގިރޭސިވިލާތް، އެމެރިކާ އަދި އޮސްޓްރޭލިއާ ފަދަ ޤައުމުތަކުގައިވެސް ފުޅާ ދާއިރާއެއްގައި ޒައިތޫނި ތެޔޮ އުފައްދާއިރު، އެކި ޤައުމުތަކުގައި އުފައްދާ ތެލުގައިވެސް ތަފާތުތަކެއް ހުރެއެވެ.