ކާ އެއްޗެހީގެ ސަބަބުންވެސް މޫޑް ރަނގަޅު ކޮށްލެވިދާނެ

ކެއުމަށް ބޭނުންކުރާ ތަކެތީގެ ސަބަބުންވެސް މީހާގެ މޫޑަށް ބަދަލު އަންނަކަމަށް ސިއްޙީ މާހިރުން ބުނެއެވެ. ދި ހެލްތް ބްލޮގްގައި ބަޔާންކޮށްފައިވާ ގޮތުން ސިއްޙަތު ރަނގަޅު ދުޅަހެޔޮ ޑައިޓަކަށް ބަދަލު ކޮށްލުމަކީ މީހާގެ ސިކުނޑިއާއި މޫޑަށްވެސް އޭގެ ރަނގަޅު އަސަރު ކުރާ ކަމެކެވެ.

އެކަމާ ގުޅޭ ދިރާސާއަކާއި ޙަވާލާދީ ހެލްތް ބްލޮގްގައި ރިޕޯޓުކޮށްފައިވާ ގޮތުން، މީހާ ހިތާމަ ކުރުމާއި މާޔޫސްވުމުގެ އިތުރުން، ޑިޕްރެޝަން ފަދަ ނަފްސާނީ ޙާލަތްތަކުން އަރައިގަތުމުގައިވެސް މީހާގެ ކެއުމަށް ބަދަލު ގެނައުން މުހިއްމު ރޯލެއް އަދާ ކުރެއެވެ. މިސާލަކަށް ޖަންކް ފުޑާއި އެކި ބާވަތްތަކުގެ ތައްޔާރީ ކާނާތައް ބޭނުން ކުރުމާއި، ސިއްޙީ ގޮތުން ދުޅަހެޔޮ ކާނާގެ ބާވަތްތައް ބޭނުން ކުރުމުން މީހާގެ ސިކުނޑިއާއި ހިތްހަމަޖެހުމަށް އަސަރު ކުރާ މިންވަރު ތަފާތުކަމަށް ސިއްޙީ މާހިރުން ވިދާޅުވެއެވެ.

ދިރާސާގައި ބަޔާންކޮށްފައިވާ ގޮތުން، ކާތަކެއްޗާއި މީހާގެ މޫޑާއި ގުޅޭ ސައިންޓިފިކް ސަބަބުތައްވެސް ބައިވަރެވެ. އެގޮތުން މީހާއަށް އުފާވެރިކަން ގެނެސްދޭ ހޯރމޯނެއްކަމަށްވާ "ސެރޮޓޮނިން" ގެ 90 އިންސައްތަ އުފައްދައިދެނީ ބަނޑުގައި ހިމެނޭ "ގަޓް މައިކްރޯބް" ތަކުންނެވެ.

މިސާލަކަށް ބިހަކީ މީހާގެ ހަށިގަނޑަށް އެމިނޯ އެސިޑް ގެ ބާވަތެއް ކަމަށްވާ "ކްރިޕްޓޮފަން" ލިއްބައިދޭ އެއްޗެކެވެ. އެއީވެސް ސެރޮޓޮނިން އުފެއްދުމުގައި އެހީއަަކަށްވާ މާއްދާއެކެވެ. އޭގެ އެއް މިސާލަކީ ޕިސްޓާޝިއޯ ކެއުމެވެ.

ސަލްމަން އަކީވެސް އޮމެގާ 3 ފެޓީ އެސިޑް އެކުލެވޭ ބާވަތުގެ މަހެކެވެ. އޭގެ ސަބަބުން ސިކުނޑިއާއި، ސިކުނޑީގެ އެކި މަސައްކަތްތަކަށް ލުއި ފަސޭހަވެ، މީހާގެ މޫޑަށްވެސް އޭގެ ރަނގަޅު އަސަރު ކުރެއެވެ.

ކެޝިއު ނަޓްއަކީ ހަށިގަނޑަށް "ޒިންކް" ލިއްބައިދޭ އެއްޗެކެވެ. ސިއްޙީ ތަޖުރިބާކާރުން ބުނާ ގޮތުގައި ޒިންކް މަދުނަމަ، ޑިޕްރެޝަނަށް މަގުފަހިވުމަށް އެކަށީގެންވެއެވެ.

ބަރަބޯ އޮށަކީވެސް ނުކައި ދޫކޮށްލާ ވަރުގެ އެއްޗެއް ނޫނެވެ. މެގްނީޝިއަމް މާއްދާއިން މުއްސަނދި ވެފައިވާ ބަރަބޯ އޮށް ކެއުމަކީ މީހާގެ މޫޑާއި ގުޅޭ ގޮތުން އަންނަ ބަދަލުތަކާއި ނުހަނު ބޮޑަށް ގުޅިގެންދާ ކަމެއްކަމަށް ސިއްޙީ މާހިރުން ބުނެއެވެ.

ޔޯގަޓަކީ ހަށިގަނޑަށް ކެލްޝިއަމް ލިއްބައިދޭ އެއްޗެކެވެ. ހަށިގަނޑުން ކެލްޝިއަމް މަދުވުމަކީ ޑިޕްރެޝަނާއި ގުޅުންހުރި އަލާމާތެއްކަން ސިއްޙީ ތަޖުރިބާކާރުން ފާހަގަ ކުރެއެވެ.

މިއީ ހައްތަހާވެސް މީހާގެ މޫޑު އިތުރަށް ރަނގަޅު ކޮށްލުމަށް ކެއުމުގައި ހިމެނިދާނެ ބާވަތްތަކެވެ.