ދިރާސާތަކުން ދައްކާ ގޮތުގައި ފޮނިތޮށި ކެއުމަކީ ބައެއް ބާވަތްތަކުގެ ބެކްޓީރިއާއިން ދުރުކޮށްދޭ ކަމެކެވެ. އެގޮތުން އަނގައިގެ އިންފެކްޝަންތަކާއި، ހިރުގަނޑުގެ މައްސަލަތަކާއި، ދަތުގެ މައްސަލަތަކުގެ އިތުރުން، އަނގައިން ނުބައިވަސް ދުވުން ފަދަ ކަންކަމުން ދުރުވުމަށް ނިކަން މޮޅު ފަރުވާއެކެވެ.

ފޮނިތޮށި ނުވަތަ އިނގިރޭސި ބަހުންނަމަ "ސިނަމަން" ގައި އެކުލެވޭ "ސިނަމަލްޑިހައިޑް" އަކީ އޭގެ ޒާތުގައިވެސް ބެކްޓީރިއާއިން ދިފާއުވުމުގެ ބާރު ލިއްބައިދޭ މާއްދާއެކެވެ. އޭގެ ސަބަބުން އަނގައިގައި ހުންނަ ބެކްޓީރިއާވެސް މަރާލައެވެ.

އޭގެ އެއް މިސާލަކީ ސިނަމަން ރަހަ ލިއްބައިދޭ ޗުއިންގަމެވެ. އެއީވެސް އަނގައިގައި ހުންނަ ނުބައިވަސްގަނޑު ކަނޑުވާލުމަށް ބޭނުން ކުރެވިދާނެ އެއްޗެކެވެ.

ދިރާސާތަކުން ދައްކާ ގޮތުގައި ސިނަމަލްޑިހައިޑްގެ ސަބަބުން ހިތުގެ ބަލިތަކުން ދުރުކޮށްދިނުމަށްވެސް މަގުފަހިކޮށްދެއެވެ. އަދި ލޭގެ ޕްރެޝަރު މަތިވުން ދުރުކޮށްދީ ލޭގެ ހިނގުންވެސް ފަސޭހަ ކޮށްދެއެވެ. ހަމައެއާއެކު، ހަށިގަނޑުގެ ޓިޝޫތައް މަރާމާތު ކުރުމުގައި އެހީވެދޭއިރު، އެކަމުގެ ސަބަބުންވެސް ހިތުގެ ޓިޝޫތައް ފަސޭހައިން މަސައްކަތް ކުރުމަށް މަގުފަހިކޮށްދެއެވެ.

ދުފުމުގެ އިތުރުންވެސް ފޮނިތޮށި ތަފާތު އެކި ގޮތްގޮތަށް ކެއުމުގައި ބޭނުން ކުރެއެވެ.

ހޫނު ކަޅު ސަޔަށް އަޅައިގެންވެސް ފޮނިތޮށި ބޭނުން ކުރެވިދާނެއެވެ. އެގޮތުން ކަޅުސައި ނުވަތަ ގްރީންޓީ ބޯއިރު، އެއް ނުވަތަ ދެ ސައި ސަމުސާގެ ހިމުންކުރި ފޮނިތޮށި އެޅިދާނެއެވެ.

ފޮނިތޮއްޓަކީ ފިހެގެން ކެއުމަށް ބޭނުންކުރާ ފޮނި ކާއެއްޗެހީގެ ރަހަވެސް އިތުރަށް ފުރިހަމަ ކޮށްލާ އެއްޗެކެވެ. ބޭކިންގ ރެސިޕީތަކަށް ފޮނިތޮށި އިތުރު ކޮށްލުމަކީ ކޮށްލެވިދާނެ ކަމެކެވެ.

ސީރިއަލް ކެއުމުގައިވެސް ފޮނިތޮށި އިތުރު ކޮށްލެވިދާނެއެވެ. ކޮންމެ ދުވަހެއްގެ ހެނދުނު ސީރިއަލް ނުވަތަ އޯޓްމީލް ބޭނުންކޮށްގެން ހެނދުނުގެ ނާސްތާ ނަގާއިރު، އެ ތައްޓަށް ކުޑަ ފޮނިތޮށިކޮޅެއް އެޅުމަކީ ސިއްޙީ ގޮތުންވެސް އޭގެ ފައިދާ ލިއްބައިދޭނެ ކަމެކެވެ.

ސޫޕް ތައްޔާރުކުރާއިރުވެސް މީހުން ފޮނިތޮށި ބޭނުން ކުރެއެވެ. އެގޮތުން ސޫޕް ތައްޔާރުކުރާއިރު، ފޮނިތޮށި ކޮޅެއް ބިންދާލުމަށްފަހު ސޫޕްގެ ތެރެއަށް އަޅައިގެން ހޫނު ކުރެވިދާނެއެވެ.

އެންމެ ސައިސަމުސަލެއްގެ މުގުރި ފޮނިތޮށިންވެސް ހަށިގަނޑަށް ބޭނުންވާ 68 އިންސައްތަ ފައިދާ ލިއްބައިދެއެވެ.

ފޮނިތޮއްޓަކީ ބޭސްވެރިކަމުގައިވެސް ބޭނުންކުރާ އެއްޗެކެވެ. އެހެންނަމަވެސް ފޮނިތޮށި ބޭނުން ކުރުމުގައިވެސް ވަކި މިންގަނޑެއް ގެންގުޅެން ޖެހެއެވެ. ސަބަބަކީ މާ ގިނައިން ފޮނިތޮށި ބޭނުން ކުރުމަކީ ފުރަމޭއަށް އޭގެ ނޭދެވޭ އަސަރު ކޮށްފާނެ ކަމަކަށްވާތީއެވެ.