ބާސެލޯނާގައި ގަވީ މަޑުކުރާނެކަން ޔަގީން؛ އަލެމަނީ

ބާސެލޯނާއަށް ކުޅެމުން އަންނަ ގަވީގެ ކޮންޓްރެކްޓް އައުކޮށް އެޓީމުގައި މަޑުކުރާނެ ކަމުގެ 100 ޕަސެންޓް ޔަގީންކަން އެބައޮތްކަމަށް ބާސެލޯނާގެ ސްޕޯޓިންގ ޑިރެކްޓަރު މެތިއު އަލެމަނީ ބުނެފިއެވެ.

އަލެމަނީ ބުނީ ގަވީއާއިއެކު އައު އެއްބަސްވުމެއް މިހާރު ހަދާފައިވާ ކަމަށެވެ. އަދި އެއްބަސްވުމުގައި ސޮއިކުރުން ވަރަށް އަވަހަށް އޮންނާނެ ކަމަށްވެސް އޭނާ ބުންޏެވެ. ބާސެލޯނާއާއެކު ގަވީ މިހާރު ހަދާފައިވާ އެއްބަސްވުމުގެ މުއްދަތު ހަމަވާނީ މިއަންނަ އަހަރުގެ ޖޫން މަހުގެ ނިޔަލަށެވެ.

މިދިޔަ މަހާއި ހަމައަށް ގަވީގެ ރިލީޒް ކްލޯސް އަކީ 50 މިލިއަން ޔޫރޯއެވެ. ނަމަވެސް 2020 ވަނަ އަހަރުގެ ސެޕްޓެމްބަރު މަހު ބާސެލޯނާއާއެކު ގަވީ ހަދާފައިވާ އެއްބަސްވުމުގައި، މިދިޔަ މަހު ރިލީޒް ކްލޯސް 100 މިލިއަންއަށް ބޮޑުކުރަން ހިމަނާފައިވެއެވެ. މިއާއެކު އޭނާ ހޯދަން ބޭނުންވާ ކްލަބަކުން ބާސެލޯނާއަށް 100 މިލިއަން ޔޫރޯގެ ބޮޑު އަގެއް ދައްކަން ޖެހޭނެއެވެ.

ބާސެލޯނާގައި މަޑުކުރަން ގަވީ ބޭނުންވި ނަމަވެސް އޭނާގެ އެޖެންޓު އިވާން މަސައްކަތް ކުރަމުން ދަނީ މިހާރު ގަވީއަށް ލިބޭވަރަށްވުރެ ބޮޑު މުސާރައެއްގައި އެއްބަސްވުން އައު ކުރުމަށެވެ.

ބާސެލޯނާގެ ކޯޗު ޒަވީއަށް ގަވީއަކީ ވަރަށް މުހިންމު ކުޅުންތެރިއެކެވެ. އެގޮތުން ނިމުނު ސީޒަންގައިވެސް އޭނާ ވަނީ ގަވީގެ ބޭނުން ވަރަށް ބޮޑަށް ހިފާފައެވެ.