ގަލްޓިއޭ ބޭނުންވަނީ ނޭމާ ޕީއެސްޖީގައި މަޑުކުރަން
ޕީއެސްޖީގެ ކޯޗުކަމަށް ގަލްޓިއޭ ހަމަޖެއްސިކަން އިއުލާންކުރީ އަންގާރަ ދުވަހު
ޕީއެސްޖީގެ އައު ކޯޗު ގަލްޓިއޭ
އޭނާ ބޭނުންވަނީ ނޭމާ ޖޫނިއަރ ޕެރިސް ސެއިންޓް ޖާމަން (ޕީއެސްޖީ)ގައި މަޑުކުރަން ކަމަށް އެ ޓީމުގެ އައު ކޯޗު ކްރިސްޓޮފް ގަލްޓިއޭ ބުނެފިއެވެ.
އެ މަގާމަށް ގަލްޓިއޭ ހަމަޖައްސާފައިވަނީ ކުރިން އެ މަގާމުގައި ހުރި އާޖެންޓީނާގެ މައުރީސިއޯ ޕޮޗެޓީނޯ ވަކިކުރުމަށްފަހުއެވެ. ޕޮޗެޓީނޯ މަގާމުން ވަކިކޮށްފައިވަނީ ޕީއެސްޖީން އޭނާއާއެކު ހަދާފައިވާ އެއްބަސްވުމުގައި ބާކީ އެއް އަހަރު އޮއްވައެވެ.
ޕީއެސްޖީން ވަނީ އެ ޓީމުގެ އައު ކޯޗެއްގެ ގޮތުހައި ގަލްޓިއޭ ހަމަޖެއްސިކަން އަންގާރަ ދުވަހު ރަސްމީކޮށް އިއުލާންކޮށްފައެވެ. ޕީއެސްޖީގެ ކޯޗުކަމާ އޭނާ ހާވާލުވީ ދެ އަހަރު ދުވަހުގެ އެއްބަސްވުމެއްގެ ދަށުންނެވެ. އެހެންކަމުން 2024 ވަނަ އަހަރުގެ ޖޫން މަހުގެ ނިޔަލަށް އޭނާ އެ ކުލަބަށް އިރުޝާދު ދޭނެއެވެ.
ޕީއެސްޖީގެ ކޯޗުކަމާ ހަވާލުވުމަށްފަހު ފުރަތަމަ ފަހަރަށް ވާހަކަ ދައްކަމުން ގަލްޓިއޭ ބުނީ ޕީއެސްޖީގެ ސްޕޯޓަރުން އުފާކޮށްދިނުމަށް މަސައްކަތް ކުރަން ޖެހޭނީ އެންމެން އެކުގައި ކަމަށެވެ. އޭނާ ބުނީ އެކަނި އެ މަސައްކަތް ކުރުމަކީ އުނދަގޫ ކަމަކަށް ވާނެ ކަމަށެވެ. އޭނާ ބުނީ ޕީއެސްޖީގެ ކޯޗުކަމަކީ ވަރަށް ކެތްތެރިވެގެން ކުރެވޭނެ ކަމެއް ކަމަށެވެ. މީގެ އިތުރުން ގަލްޓިއޭ ބުނީ ކުޅުންތެރިން ޕީއެސްޖީއަށް ގެނައުމާ ބެހޭ ގޮތުން އެ ޓީމުގެ ސްޕޯޓިން ޑިރެކްޓަރު ލުއިސް ކަމްޕޯސްއާ ވާހަކަ ދެއްކިކަމަށެވެ. އޭނާ ބުނީ ތަށި ކާމިޔާބުކުރުމަށް ޕީއެސްޖީއަށްވުރެ ރަނގަޅު އެހެން ޓީމެއް ނޯންނާނެކަމަށެވެ.
ޕީއެސްޖީއަށް ކުޅެމުން އަންނަ ބްރެޒިލްގެ ތަރި ނޭމާއާ ގުޅޭ ގޮތުން އޭނާ ބުނީ، ބޭނުންވަނީ ނޭމާ ޕީއެސްޖީގައި މަޑުކުރަން ކަމަށެވެ. ނޭމާއަކީ ދުނިޔޭގެ ފެންވަރުގެ ކުޅުންތެރިއެއްކަން ފާހަގަކުރަމުން ގަލްޓިއޭ ބުނީ ދުނިޔޭގެ ހުރިހާ ކޯޗުން ވެސް ނޭމާ ކަހަލަ ޓޮޕް ކުޅުންތެރިން ބޭނުންވާނެ ކަމަށެވެ. އިތުރަށް ވާހަކަ ދައްކަމުން ގަލްޓިއޭ ބުނީ ޕީއެސްޖީގައި އޭނާގެ ޕްލޭންގައި ނޭމާއަކީ ހިމެނޭ ކުޅުންތެރިއެއް ކަމަށެވެ.
ރިޕޯޓުތައް ބުނާ ގޮތުން ޕޮޗެޓީނޯ މަގާމުން ވަކިކޮށް، އެ މަގާމަށް ގަލްޓިއޭ ހަމަޖެއްސުމުގެ އެންމެ ބޮޑު އެއް ސަބަބަކީ މިދިޔަ ސީޒަންގެ ޗެމްޕިއަންސް ލީގު ޕީއެސްޖީއަށް ކާމިޔާބު ނުކުރެވުމެވެ.
