ޕެރިސް ސެއިންޓް ޖާމައިން (ޕީއެސްޖީ)ގެ ކޯޗުކަމުން މައުރީސިއޯ ޕޮޗެޓީނޯ ވަކިކޮށްފިއެވެ.

ޕޮޗެޓީނޯ މަގާމުން ދުރުކުރީ އޭނާގެ ކޮންޓްރެކްޓްގައި ބާކީ އެއް އަހަރު އޮއްވައެވެ. ރިޕޯޓުތައް ބުނާ ގޮތުން ޕޮޗެޓީނޯ މަގާމުން ދުރުކުރުމުގެ އެންމެ ބޮޑު އެއް ސަބަބަކީ މިދިޔަ ސީޒަންގެ ޗެމްޕިއަންސް ލީގު ޕީއެސްޖީއަށް ކާމިޔާބު ނުކުރެވުމެވެ.

ޕޮޗެޓީނޯގެ ކޯޗުކަމުގައި ޕީއެސްޖީއަށް ޗެމްޕިއަންސް ލީގު ކާމިޔާބު ނުކުރެވުނު ނަމަވެސް އޭނާ ވަނީ 2020 ވަނަ އަހަރުގެ ޓްރޮފީ ޑެސް ޗެމްޕިއަންސް އަދި މިދިޔަ ސީޒަންގެ ކޫޕް ޑި ފްރާންސްއާއި ފްރާންސް ލީގު ކާމިޔާބުކޮށްދީފައެވެ. ޕޮޗެޓީނޯ މަގާމުން ދުރުކުރިކަން ޕީއެސްޖީން ރަސްމީކޮށް އިއުލާނުކުރީ އަންގާރަ ދުވަހު އެކްލަބުން ނެރުނު ބަޔާނެއްގައެވެ.

މިދިޔަ އަހަރުގެ ޖެނުއަރީ މަހު ޕީއެސްޖީއާ ހަވާލުވި ޕޮޗެޓީނޯ ޓީމަށް ކޮށްދިން މަސައްކަތަށްޓަކައި އެކްލަބުން ޝުކުރު އަދާކުރިއެވެ. ޕޮޗެޓީނޯގެ ކޯޗުކަމުގައި ޕީއެސްޖީ 84 މެޗު ކުޅުނެވެ.

ޕީއެސްޖީގެ ކޯޗުކަމުން ޕޮޗެޓީނޯ ވަކިކޮށްފައިވާއިރު، އެމަގާމަށް ގެނައުމަށް ހަމަޖެހިފައިވަނީ ކްރިސްޓޮފް ގަލްޓިއޭއެވެ. މި ހަފުތާގެ ތެރޭގައި ގަލްޓިއޭއާ ޓީމު ހަވާލުކޮށް އެކަން ރަސްމީކޮށް ހާމަކުރާނެކަމަށް މީޑިއާ ރިޕޯޓުތައް ބުނެއެވެ.

ގަލްޓިއޭ ވަނީ 2020/21 ވަނަ ސީޒަންގައި ލިލްއަށް ފްރާންސް ލީގު ކާމިޔާބުކޮށްދީފައެވެ. އޭގެ ފަހުން، މިދިޔަ އަހަރު އޭނާ ކޯޗުކޮށްދިނީ ފްރާންސް ލީގުގައި ކުޅެމުން އަންނަ ނީސްއަށެވެ. ރިޕޯޓުތައް ބުނާގޮތުން ގަލްޓިއޭއާއެކު ޕީއެސްޖީން ހަދާނީ ދެއަހަރުގެ އެއްބަސްވުމެކެވެ. ޕީއެސްޖީގެ ކޯޗުކަމާ ހަވާލުވުމަށްފަހު ގަލްޓިއޭގެ އެންމެ ބޮޑު ޓާސްކަކަށް ވާނީ މިއަންނަ ސީޒަންގެ ޗެމްޕިއަންސް ލީގު އެޓީމަށް ކާމިޔާބުކޮށްދިނުމެވެ.