އަންނަ ސީޒަނަށް ޓީމު ވަރުގަދަ ކުރުމަށް ކުރާ މަސައްކަތުގެ ތެރެއިން ބާސެލޯނާއިން ދެ ކުޅުންތެރިއެއްގެ ސޮއި ހޯދައިފިއެވެ.
ބާސާއިން ސޮއި ހޯދި ކުޅުންތެރިންނަކީ ޗެލްސީއަށް ކުޅެމުން އައި ޑެންމާކުގެ ޑިފެންޑަރު އަންދްރެސް ކްރިސްޓެންސަން އާއި އޭސީ މިލާނަށް ކުޅެމުން އަައި އައިވަރީ ކޯސްޓުގެ މިޑްފީލްޑަރު ފްރޭންކް ކެސިއޭ އެވެ. މި ދެ ކުޅުންތެރިން ވެސް ބާސާއާ ގުޅުނީ ހިލޭ ޓްރާންސްފާއެއްގައި، ހަތަރު އަހަރުގެ އެއްބަސްވުމެއްގެ ދަށުންނެވެ.
ކްރިސްޓެންސަން ބާސާއާ ގުޅުނުއިރު އޭނާ ޗެލްސީއާއެކު ހަދާފައިވަ އެއްބަސްވުމުގެ މުއްދަތު ވަނީ ހަމަވެފައެވެ. 26 އަހަރުގެ ކްރިސްޓެންސަން އޭނާގެ ސީނިއަރ ކެރިއަރު ފަށާފައިވަނީ 2014 ވަނަ އަހަރު ޗެލްސީއިންނެވެ. ޗެލްސީގައި ހޭދަކުރި މުއްދަތުގައި އޭނާ ވަނީ އެ ޓީމަށް 161 މެޗު ކުޅެދީ، ދެ ލަނޑު ޖަހާފައެވެ. މީގެ އިތުރުން އޭނާ ވަނީ ޗެލްސީއާއެކު ޔުއެފާ ޗެމްޕިއަންސް ލީގު، ޔުއެފާ ޔޫރޮޕާ ލީގު، ޔުއެފާ ސުޕަ ކަޕް އަދި ފީފާ ކުލަބް ވޯލްޑް ކަޕް ކާމިޔާބުކޮށްފައެވެ. ޑެންމާކުގެ ގައުމީ ޓީމަށް ވެސް ކުޅެމުން އަންނަ ކްރިސްޓެންސަން ވަނީ ގައުމީ ޓީމަށް ކުޅެދިން 56 މެޗުގައި ދެ ލަނޑު ޖަހާފައެވެ.
މީގެ އިތުރުން ދެން ބާސާއާ ގުޅުނު 25 އަހަރުގެ ކެސިއޭ ވަނީ އޭސީ މިލާނަށް 224 މެޗު ކުޅެދީ 39 ލަނޑު ޖަހައިދީފައެވެ. އޭސީ މިލާނުން ނިމުނު ސީޒަނުގެ ލީގު ޗެމްޕިއަންކަން ހޯދިއިރު، އޭނާ ވަނީ އިސް ދައުރެއް އަދާކޮށްފައެވެ. މީގެ އިތުރުން ކެސިއޭ އަންނަނީ 2014 ވަނަ އަހަރުން ފެށިގެން އައިވަރީ ކޯސްޓްގެ ގައުމީ ޓީމަށް ވެސް ކުޅެމުންނެވެ. އޭނާ ވަނީ މިހާތަނަށް ގައުމީ ޓީމަށް 58 މެޗު ކުޅެދީ ހަ ލަނޑު ޖަހާފައެވެ.
އަންނަ ސީޒަނަށް ޓީމު ވަރުގަދަ ކުރުމަށް ކުރަމުން އަންނަ މަސައްކަތުގެ ތެރެއިން ބާސާއިން އަންނަނީ ބަޔާން މިއުނިކަށް ކުޅެމުން އަންނަ ޕޮލޭންޑުގެ ރޮބާޓް ލެވަންޑޯސްކީ ހޯދުމުގެ މަސައްކަތް ވެސް ކުރަމުންނެވެ. ލެވަންޑޯސްކީ ވަނީ އޭނާ ބަޔާން ދޫކޮށްލަން ބޭނުންވާކަން ހާމަކޮށްފައެވެ.
