ނަލަގެ ތައުރީފު ސިޓީގެ ބިދޭސީ ކުޅުންތެރިންނަށް

ސްޕޯޓްސް ކުލަބް ސިޓީއަށް ލިބުނު ބިދޭސީ ތިން ކުޅުންތެރިންނަށް އެ ޓީމުގެ ކޯޗު ޙުސެއިން ޝަރީފް (ނަލަ) ވަރަށް ބޮޑަށް ތައުރީފުކޮށްފިއެވެ.

ވޮލީ ސީޒަނަށް ގެނެވުނު ބަދަލާއެކު ސިޓީއަށް ލިބުނު ބިދޭސީ ތިން ކުޅުންތެރިންނަކީ އެޓޭކަރ ހަރްދީފް ސިންގް، ވިނީތު ކުމާރު އަދި ސެޓަރ ވިޔާނަކުއެވެ. މި ތިން ކުޅުންތެރިންނާއެކު ނުކުމެ ސިޓީން ވަނީ މިއަހަރުގެ އެސޯސިއޭޝަން ކަޕާއި، ޤަައުމީ ވޮލީ ލީގު ކާމިޔާބުކޮށްފައެވެ. މި ތިން ކުޅުންތެރިން ވެސް އަންނަނީ ސިޓީ ޓީމާއެކު ރަނގަޅު ކުޅުމެއް ދައްކަމުންނެވެ. ދާދި ފަހުން ނިމުނު އެސޯސިއޭޝަން ކަޕްގެ އެންމެ މޮޅު އިންޓަރނޭޝަނަލް ޓެލެންޓަކަށް ހޮވުނީ ވެސް ސިޓީގެ ވިނީތުއެވެ.

ޤައުމީ ލީގުގެ ތަށި ކާމިޔާބުކުރުމަށްފަހު ނަލަ ބުނީ ލިބުނު ކާމިޔާބަށް ޝުކުރު ކުރާ ކަމަށެވެ. ނަލަ ބުނީ ލިބުނު ކާމިޔާބަކީ ޓީމުހެ ހުރިހާ ކުޅުންތެރިންގެ އިތުރުން، ކޯޗިން ސްޓާފުންނާއި، މެނޭޖުމަންޓު އަދި ސިޓީގެ އެންމެހާ ސަޕޯޓަރުންގެ މަސައްކަތުން ލިބުނު ކާމިޔާބެއް ކަމަށެވެ. މީގެ އިތުރުން ނަލަ ބުނީ ނަސީބު ކަންދިމާކުރި ގޮތުން ސިޓީއަށް ލިބުނީ ވަރަށް ރަނގަޅު ބިދޭސީ ކުޅުންތެރިންތަކެއް ކަމަށެވެ. އޭނާ ފާހަގަކުރި ގޮތުގައި ސިޓީއަށް އެހާ ފަސޭހަކަމާއެކު ދެ މުބާރާތް ކާމިޔާބު ކުރެވުމުގެ އެއް ސިއްރަކީ ވެސް އެއީ ކަމަށެވެ.

މީގެ އިތުރުން ނަލަ ބުނީ ޤައުމީ މުބާރާތަށް ވެސް ނުކުންނާނީ ގޯސްކޮށް ހުރި ކަންކަން ރަނގަޅުކޮށްގެން އިރާދަކުރެއްވިއްޔާ މޮޅުވާން ކަމަށެވެ. ނަލަ ބުނީ ޤައުމީ މުބާރާތަކީ ވަރުގަދަ މުބާރާތެއް ކަމަށާއި، ޓީމުތައް ވެސް ވަރުގަދަ ވާނެ ކަމަށެވެ. ނަލަ ބުނީ ސެމީ ފައިނަލްގައި ވާދަކުރަންޖެހޭ ދިވެހި ސިފައިންގެ ކުލަބަކީ މޮޅު ޓީމެއް ކަމަށާއި، މެޗަށް ނުކުންނާނީ އެކަން ދަނެގެން ކަމަށެވެ. މީގެއިތުރުން ޓީމު އެކުލަވާލާނީ ވެސް އެކަން ކަމަށް ބަލައިގެން ކަމަށް ނަލަ ވަނީ ބުނެފައެވެ.

ސިޓީގެ ކެޕްޓަން އަލީ ހުޒާމް (ހުޒަންޓެ) ވެސް ވަނީ ބިދޭސީ ކުޅުންތެރިންގެ މޮޅު ކުޅުމާއި، އެ މީހުންގެ އަޚުލާގު ރަނގަޅުކަން ފާހަގަކޮށްފައެވެ. އޭނާ ބުނި ގޮތުގައި އެ ޓީމުގެ ބިދޭސީ ކުޅުންތެރިންގެ ފަރާތުން ޓީމަށް ވަރަށް ބޮޑު އެހީތެރިކަމެއް ވެސް ލިބޭ ކަމަށެވެ.

މީގެ އިތުރުން މުބާރާތުގައި ވާދަކުރާ އެހެން ޓީމުތަކުގެ ކޯޗުންނާއި ކެޕްޓަނުން ވެސް ވަނީ ސިޓީގެ ކުޅުންތެރިންގެ މޮޅު ކުޅުން ފާހަގަކޮށްފައެވެ. ސިޓީގެ އެންމެ ބޮޑު އެއް ތަފާތަކީ އެ ޓީމުގެ ބިދޭސީ ކުޅުންތެރިންކަމަށް އެ ފަރާތްތަކުން ވެސް ފާހަގަކޮށްފައިވެއެވެ.

ސީޒަނުގެ ދެ މުބާރާތް ކާމިޔާބުކޮށް، ޤައުމީ މުބާރާތަށް ނުކުންނައިރު، މިއީ ސިޓީގެ ތާރީޚުގައި ވެސް އެ ޓީމަށް އެންމެ ކާމިޔާބު އަހަރެވެ.