ޔޯގާ ހަރަކާތް ހުއްޓުވަން ދިން ހަމަލާއަކީ އިންޑިއާ އައުޓް ކެމްޕެއިނަށް ރައްޔިތުންގެ ތާއިދު ނެތުމުން ކުރި ކަމެއް – އެމްޓީޑީ
ކެމްޕޭނުގައި، އިންޑިއާ އާއި ދެކޮޅަށް ދިވެހިންގެ ހިތްތަކުގައި ނަފްރަތު އުފައްދަން ދީނީ އެކި ޖަމާއަތްތަކަށް ހިތްވަރުދޭ
އިންޓަރނޭޝަނަލް ޔޯގާ ޑޭ ރާއްޖޭގައި ފާހަގަކުރުމަށް ބޭއްވި ޙަރަކާތުގެ ތެރެއިން ހިންގި ހަމަނުޖެހުން
ބައިނަލްއަގުވާމީ ޔޯގާ ދުވަސް ފާހަގަކުރުމަށް ގަލޮޅު ރަސްމީ ދަނޑުގައި ބޭއްވި ހަރަކާތަށް ވަދެ ހިންގި ހަމަނުޖެހުން މޯލްޑިވްސް ތާޑްވޭ ޑިމޮކްރެޓްސް (އެމްޓީޑީ) އިން ކުށްވެރިކޮށްފިއެވެ.
އެ އަމަލު ކޮށްވެރިކޮށް އެމްޓީޑީން ނެރުނު ނޫސްބަޔާނުގައި ބުނެފައިވަނީ އިންޑިއާ އިން އދ އަށް ބައިނަލްއަގުވާމީ ޔޯގާ ދުވަސް ގޮތުގައި 21 ޖޫން ހަމަޖައްސަން 2014 ވަނަ އަހަރު ހުށަހެޅި ގަރާރު ރައީސް އަބްދުﷲ ޔާމީނުގެ އިރުޝާދުގެ ދަށުން އޭރުގެ ސަރުކާރުން ކޯ ސްޕޮންސަރ ކުރައްވައި ވޯޓްލައިގެން ފާސްވެފައިވާ ކަމަށެވެ.
އަދި 2015 ވަނަ އަހަރުން ފެށިގެން ބައިނަލްއަގުވާމީ ޔޯގާ ދުވަހަކީ ދިވެހި ސަރުކާރާއި އިންޑިއަން ހައިކޮމިޝަން އަދި އދ އާއި ގުޅިގެން ރާއްޖޭގައި ކޮންމެ އަހަރަކު ފާހަގަކުރާ ދުވަހެއް ކަމަށެވެ. ނަމަވެސް ރައީސް ޔާމީން އިންޑިއާއާމެދު ހިންގަވާ ޒާތީ ކެމްޕޭނުގައި، އިންޑިއާއާ ދެކޮޅަށް ދިވެހިންގެ ހިތްތަކުގައި ނަފްރަތު އުފައްދައި ދީނީ އެކި ޖަމާއަތްތަކަށް ހިތްވަރުދެއްވައި ހައްދުފަހަނައަޅާފައިވާ ދަރަޖައަށް ޕީޕީއެމް މެދުވެރިކޮށް މިކަންކަން ގެންގޮސްފައިވަނީ ރައީސް ޔާމީންގެ އިންޑިއާ އައުޓް ކެމްޕޭން އެއްވަރެއްގައި ހިފަހައްޓާނުލެވި އަދި ރައްޔިތުންގެ ތާއިދު ނެތި ނާކާމިޔާބުވުމުން ކަމަށެވެ.
މެދުއިރުމަތީގެ މުސްލިމް ގިނަ ގައުމުތަކެއް ހިމެނޭ ގޮތަށް ދުނިޔޭގެ ގިނަ ގައުމުތަކެއްގައި ވެސް މި ދުވަސް ފާހަގަކުރި ކަމަށާއި، ނަމަވެސް ސިޔާސީ މަންފާއަށްޓަކައި ޕީޕީއެމުން އަޑީގައި އޮވެ މި ހަމަނުޖެހުން ހިންގައި ރާއްޖޭގެ ނަން ކިލަނބުކޮށްފައިވާ ކަމަށް އެމްޓީޑީގެ ބަޔާނުގައި ބުނެފައިވެއެވެ. އަދި ޓޫރިޒަމަށް ބަރޯސާވާ އަދި ދުނިޔޭގެ އެންމެންނަށް ސުލްހަވެރި މެމާންދާނީކަން ވިއްކަމުން އަންނަ މި ރީތި ގައުމަށް އެތައް ގެއްލުމެއް މިކަމުގެ ސަބަބުން ވާނެކަމަށް ބުނެފައިވެއެވެ. ދުނިޔެއަށް އިގްތިސާދީ ތަދުމަޑުކަމެއް އައިސް އޮތް ދުވަސްވަރެއްގައި އެންމެން ދިވެހި ގައުމާމެދު ފުންކޮށް ވިސްނަން ޖެހޭކަމަށް ބަޔާނުގައި ބުނެފައިވެއެވެ.
މީގެ އިތުރުން ދިވެހިރާއްޖެފަދަ ސުލްހަވެރި އަމާން ޑިމޮކްރަޓިކް މުޖްތަމައުއެއްގައި މި ބާވަތުގެ ހަމަނުޖެހުމާއި އަނިޔާވެރި އަމަލުތަކަށް ޖާގައެއް ނެތް ކަމަށް ބަޔާނުގައި ބުނެފައިވެއެވެ. މި މައްސަލައިގައި ރައީސް ސާލިހު ދައުލަތުގެ އިދާރާތައް މެދުވެރިކުރައްވާ ސީރިއަސް ތަހުގީގެއް ފެށުމަށް އަމިއްލަފުޅަށް އިސްނަންގަވާ ވަގުތުން ނިންމެވި ނިންމެވުމަށް އެ ޕާޓީން ވަނީ މަރުހަބާ ދަންނަވާފައެވެ. އަދި އަވަސް ފިޔަވަޅުތަކެއް އަޅުއްވައި މިފަދަ ކަމެއް ރާއްޖޭގައި ތަކުރާރު ނުވާނޭގޮތަށް ކަންކަން އިންތިޒާމު ކުރުމަށް އެ ޕާޓީން ވަނީ ގޮވާލާފައެވެ.
