ބަންގްލަދޭޝްގައި ތިބި ދިވެހި ކިޔަވާ ކުދިން މުޒާހަރާ ކުރަނީ
ހޯމަ ދުވަހުން ފެށިގެން ދަރިވަރުން ދަނީ މުޒާހަރާ ކުރަމުން
ބަންގްލަދޭޝްގައި ތިބި ދިވެހި ކިޔަވާ ކުދިން މުޒާހަރާ ކުރަނީ
ބަންގްލަދޭޝްގެ ޗިޓަގޮންގްގައި ހުންނަ ޔުނިވަރސިޓީ އޮފް ސައިންސް އެންޑް ޓެކްނޮލޮޖީގައި މެޑިސިން ކިޔަވަމުންދާ ގިނަ އަދަދެއްގެ ދިވެހި ކިޔަވާ ކުދިން މުޒާހަރާ ކުރަން ފަށައިފި އެވެ.
ޔުނިވަރސިޓީގައި މެޑިސިން ކިޔަވަމުންދާ ދަރިވަރަކު ރާއްޖެ އެމްވީއަށް މައުލޫމާތު ދެމުން ބުނީ މިދިޔަ ހޯމަ ދުވަހުން ފެށިގެން އެ ދަރިވަރުން މުޒާހަރާ ކުރަމުން ދަނީ އެގައުމުގެ މެޑިކަލް އެންޑް ޑެންޓަލް ކައުންސިލްގައި ދަރިވަރުން ރަޖިސްޓްރީކޮށް ދީފައި ނުވާތީއެވެ.
ކަނޑައެޅިފައި އޮންނަ އުސޫލުން ބަންގްލަދޭޝްގެ މެޑިކަލް ބޯޑުގައި ދަރިވަރުން ރެޖިސްޓްރީ ކުރަނީ ޔުނިވަރސިޓީގެ ފަރާތުންނެވެ.
އެހެން ނަމަވެސް އެ ޔުނިވާރސިޓީގެ 25 އަދި 26 ވަނަ ބެޗްގެ ދަރިވަރުން ޔުނިވަރސިޓީގެ ފަރާތުން ރަޖިސްޓްރީ ކޮށްދީފައި ނުވާއިރު އެކަން ދަރިވަރުންނަށް އަންގާފައިވެސް ނުވާ ކަމަށް ރާއްޖެ އެމްވީއާ ވާހަކަ ދެއްކި ދަރިވަރު ބުންޏެވެ.
މިހިނގާ ޖެނުއަރީ މަހުގެ 23 ގައި އެމްބީބީއެސް އިމްތިހާންތައް ފަށާއިރު ބަންގްލަދޭޝް މެޑިކަލް ކައުންސިލްގައި ރެޖިސްޓްރީ ނުކޮށްދޭ ހާހެއްހާ ދަރިވަރުން އެބަ ތިއްބެވެ. އޭގެ ތެރޭގައި ރާއްޖޭގެ އިތުރުން އިންޑިޔާ ސްރީ ލަންކާ އަދި ބޫޓާންގެ ދަރިވަރުން ހިމެނެއެވެ.
އެކަމަށް ހައްލެއް ގެނައުމަށް އެހެން ގައުމުތަކުގެ ސަރުކާރުން ޔުނިވާރސިޓީ އާއި ވާހަކަ ދައްކަމުންދާ ކަމަށް އޭނާ ބުންޏެވެ.
ރަޖިސްޓްރޭޝަން ކަންކަން ފުރިހަމަ ނުވަނީސް ޔުނިވާރސިޓީގައި ކިޔެވުމުގެ ހަރަކާތްތަކާއި އިމްތިހާންތައް ބޭއްވުމަށް ދަރިވަރުންނަށް ފުރުސަތެއް ނުދޭނެ ކަމަށް ވެސް އެ ދަރިވަރު ބުންޏެވެ.
މި މައްސަލާގައި ބަހެއް ހޯދުމަށް ފޮރިން މިނިސްޓްރީއަށް ގުޅުމުން ފޯނަށް ޖަވާބު ނުދެއްވާތީ މިނިސްޓްރީގެ ބަހެއް ވަނީ ލިބޭ ގޮތް ނުވެފައެވެ.
