ސްޓެލްކޯއިން ދެލައްކަ ޑޮލަރު ގަންނަން ދިން ފައިސާ ގެއްލިއްޖެ
ސްޓެލްކޯ އަތުން ފައިސާ ނެގީވެސް ފެނަކަ އަތުން ފައިސާ ނެގި ކުންފުނިން
ސްޓެލްކޯ: ޑޮލަރު ގަންނަން ދިން ފައިސާ އަނބުރާ ނުދިނުމުން މައްސަލަ މިހާރު ވަނީ ކޯޓަށް ހުށަހަޅާފައި
ސްޓެލްކޯއިން ދެލައްކަ ޑޮލަރު ގަތުމަށް ކުންފުންޏަކަށް ހަވާލުކުރި ފައިސާއަށް ޑޮލަރުވެސް ނުލިބި އަދި އެ ފައިސާ ވެސް ލިބިފައިނުވާ ކަމަށް ރާއްޖެ އެމްވީއަށް މައުލޫމާތު ލިބިއްޖެއެވެ.
ރާއްޖެ އެމްވީއަށް ސްޓެލްކޯގެ އޮފިޝަލަކުވެސް ވަނީ އެކަން ކަށަވަރުކޮށް ދެއްވާފައެވެ.
ރާއްޖެ އެމްވީއަށް މައުލޫމާތު ލިބިފައިވާ ގޮތުގައި "އިއްތިފާގުން" ސްޓެލްކޯއަތުންވެސް ޑޮލަރު ހޯދަ ދިނުމަށް ފައިސާ ނަގާފައިވަނީ ފެނަކަ ކޯޕަރޭޝަނަށްވެސް އެއްމިލިއަން ޑޮލަރު (17 މިލިއަން ރުފިޔާ)ގެ ޗެކްތަކެއް ދޫކުރި ޝަރޫ ލޯންޗް ސާވިސަސްއެވެ.
ސްޓެލްކޯގެ އޮފިޝަލް ވިދާޅުވީ އެ ފައިސާ ނުލިބުމުން ސިވިލް ކޯޓަށް ހުށަހެޅި ކަމަށާއި މި މައްސަލަ ސިވިލް ކޯޓުގެ ޑިސްޕިއުޓް ރިޒޮލޫޝަން ޑިވިޝަނުގައި ކުރިއަށް ގެންގޮސް، ދެ ކުންފުނިން ވާހަކަ ދައްކައިގެން ހައްލު ނުވުމުން މިހާރު ވަނީ ޝަރީއަތަށް ފޮނުވާފައި ކަމަށެވެ.
ސްޓެލްކޯ އިން ސިވިލް ކޯޓަށް ހުށަހަޅާފައިވާ ދައުވާގައި ބުނެފައި ވަނީ 200،000 ޑޮލަރު ގަންނަން ސްޓެލްކޯ އިން ޝަރޫ ލޯންޗް ސާވިސް އަށް ދިން 3،084،000ރ. ގެ ބަދަލުގައި ދޫކުރި ޑޮލަރު ޗެކް ބައުންސް ވެފައިވާ ކަމަށެވެ. އަދި ޑޮލަރު ގަންނަން ދިން ފައިސާ ވެސް އަނބުރާ ލިބިފައި ނުވާ ކަމަށް ދައުވާގައި ބުނެ އެވެ.
ސްޓެލްކޯއިން ދައުވާކޮށްފައި ވަނީ ޑޮލަރު ގަންނަން ދިން ހުރިހާ ފައިސާ އެއްފަހަރާ ނަގައިދިނުމަށް އެދި އެވެ.
މައުލޫމާތު ލިބިފައިވާ ގޮތުގައި މި މައްސަލަ ކޯޓަށް ބަލައިގަތީ ނޮވެމްބަރު 9، 2016ގަ އެވެ. ދެކުންފުނިން ވާހަކަ ދައްކައިގެން ހައްލު ނުވުމުން ޑިސްޕިއުޓް ޑިވިޝަނުން ޝަރީއަތަށް މި މައްސަލަ ފޮނުވީ ޑިސެމްބަރު 26، 2016ގަ އެވެ.
