މީގެ ކުރިން ކ.ގުރައިދޫން ފުޓުބޯޅައިގައި ހޯދާފައިވާ ކާމިޔާބީއާ ހަމަޔަށް އަލުން ދިޔުމަށް އެރަށުގައި ގާއިމުކުރި ޓާފު ފުޓުބޯޅަ ދަނޑުގެ ބޭނުން ހިފާނެ ކަމަށް އުންމީދުކުރައްވާ ކަމަށް ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެއެވެ.

އެމަނިކުފާނު މިހެން ވިދާޅުވީ ސަރުކާރުގެ ފަރާތުން ކ.ގުރައިދޫގައި ގާއިމުކުރި ޓާފް ދަނޑު ހުޅުވުމަށް އާދިއްތަ ދުވަހުގެ ހަވީރު އެރަށުގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ. މިނިސްޓަރު ވިދާޅުވީ އިއްޔެއަކީ ގުރައިދޫގެ ރައްޔިތުންނާއި، ޚާއްސަކޮށް ކުޅިވަރަށް ލޯބިކުރާ ޒުވާނުންނަށް އުފާވެރި ދުވަހަކަށް ވާނެ ކަމަށެވެ. ނަމަވެސް ދަނޑުގެ މަސައްކަތް ކުރިއަށް ދިޔައީ އެމަނިކުފާނު ބޭނުންފުޅުވި ސްޕީޑުގައި ނޫންކަމަށް މިނިސްޓަރު ވިދާޅުވިއެވެ.

މީގެ އިތުރުން މިނިސްޓަރު ވަނީ އެ ދަނޑުގެ ރޮސްޓްރަމް އަދި ލައިޓިން ސިސްޓަމް ގާއިމުކުރުމުގެ މަަސައްކަތް އިއުލާންކޮށްފައިވާކަން ވެސް ހާމަކުރައްވާފައެވެ. އަދި އުންމީދުކުރައްވާ ގޮތުގައި އެ މަސައްކަތް ނިމުމުން، އެ ދަނޑުގައި ދިވެހި ޕްރިމިއަރ ލީގުގެ މެޗުތައް ވެސް ކުޅެވުން ކަމުގައި ވިދާޅުވިއެވެ. އަދި އެކަމަށްޓަަކައި ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް)އާއެކު މަސައްކަތް ކުރައްވާނެ ކަމަށް ވެސް ވިދާޅުވިއެވެ.

ދަނޑުގެ މަސައްކަތް ކުރިއަށް ގެންދިޔުމުގައި ގުރައިދޫ ކައުންސިލްގެ ފަރާތުން ދެއްވި އެހީތެރިކަމަށް މިނިސްޓަރު ވަނީ ޝުކުރު އަދާ ކުރައްވާފައެވެ. މީގެ އިތުރުން މިނިސްޓަރު ވިދާޅުވީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހު ވެރިކަމަށް ވަޑައިގަތީ 25 ޓަރފް ދަނޑުގެ ވައުދުފުޅާއެކު ނަމަވެސް، މިހާރު ގާތްގަނޑަކަށް 40 ދަނޑުގެ މަސައްކަތް ނިންމާލެވިއްޖެކަމަށެވެ. އަދި ރާއްޖޭގެ އެކި ކަންކޮޅުތަކުގައި 85 ދަނޑުގެ މަސައްކަތް ކުރިއަށްދާކަމީ ލިބިވަޑައިގަންނަވާ އުފަލެއް ކަމަށެވެ.

މިނިސްޓަރު ވިދާޅުވީ އެންމެން ގުޅިގެން ކުރެވޭ މަސައްކަތުގައި ގައުމަށާއި، ރަށަށް ފައިދާއާއި ރީތި ނަން ލިބުމަށް އެދިވަޑައިގަންނަވާކަމަށެވެ.