އެސްޓޯނިއާ ދަތުރު އަދި މޯލްޑިވްސް 2.0 ގެ ފަހަތުގައި އޮތް ސިއްރަކީ އިލެކްޓްރޯނިކް ވޯޓިން: މަޚްލޫފް
މަޚްލޫފް ވިދާޅުވީ ޚަރަދު ކުޑަކުރުމުގެ ނަމުގައި ރިޔާސީ އިންތިޚާބުގެ ދެ ވަނަ ބުރު އުވާލުމަށް ވަކާލާތު ކުރަނީ ރައްޔިތުންގެ ފަންސާސް އިންސައްތަ ވޯޓު ނުލިބޭނެކަން ޔަގީންވާ ބޭފުޅުން ކަމަށެވެ.
ކުރީގެ ކުޅިވަރު ވަޒީރު އަޙުމަދު މަޚްލޫފް
ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އެސްޓޯނިއާ އަށް ކުރެއްވި ދަތުރުފުޅާއި، ސަރުކާރުން މިފަހުން އިއުލާން ކުރި މޯލްޑިވްސް 2.0ގެ ފަހަތުގައި އޮތް ސިއްރަކީ އިލެކްޓްރޯނިކް ވޯޓިން ކަމަށް، އެމްޑީޕީ ސަރުކާރުގެ ޔޫތު މިނިސްޓަރު އަޙުމަދު މަޚްލޫފް ވިދާޅުވެއްޖެ އެވެ.
މަޚްލޫފް މިހެން ވިދާޅުވީ، ރިޔާސީ އިންތިޚާބުގެ ދެ ވަނަ ބުރު އުވާލައި، ޕްރިފެރެންޝަލް ވޯޓިން ސިސްޓަމެއް ގެނައުމުގެ ވިސްނުން ގެންގުޅުއްވާ ކަމަށް ރައީސް މުޢިއްޒު ވިދާޅުވުމާ ގުޅިގެން އެކަމަށް ފާޑު ވިދާޅުވެ އެކްސްގައި ކުރެއްވި ޕޯސްޓެއްގަ އެވެ.
މަޚްލޫފް ވިދާޅުވީ ޚަރަދު ކުޑަކުރުމުގެ ނަމުގައި ރިޔާސީ އިންތިޚާބުގެ ދެ ވަނަ ބުރު އުވާލުމަށް ވަކާލާތު ކުރަނީ ރައްޔިތުންގެ ފަންސާސް އިންސައްތަ ވޯޓު ނުލިބޭނެކަން ޔަގީންވާ ބޭފުޅުން ކަމަށެވެ. ނަމަވެސް އެކަމުގެ ފަހަތުގައި އޮތް އެންމެ ބޮޑު ސިއްރަކީ އިލެކްޓްރޯނިކް ވޯޓިން ތަޢާރަފު ކުރުން ކަމަށް ވެސް މަޚްލޫފް ވިދާޅުވި އެވެ.
އެގޮތުން ރައީސް މުޢިއްޒު އެސްޓޯނިއާ އަށް ކުރެއްވި ދަތުރުފުޅާއި، މޯލްޑިވްސް 2.0 ގެ ފަހަތުގައި އޮތީ ވެސް އިލެކްޓްރޯނިކް ވޯޓިން ކަމަށް މަޚްލޫފް ވަނީ ތުހުމަތު ކުރައްވައިފަ އވެެ.
މީގެ އިތުރުން މިހާރު ރާއްޖޭގައި ވޯޓު ލަމުން އަންނަ ނިޒާމަަށް އިޝާރާތް ކުރައްވައި އޭނާ ވިދާޅުވީ، ވޯޓުލާ ގޮތާއި، އަދި ވޯޓު ގުނާ ގޮތަށް އެއްވެސް ބަދަލެއް ގެންނަން ނުޖެހޭ ކަމަށެވެ. އަދި މިހާރު އިންތިޚާބުގެ ކަންކަން ރޭވިފައިވާ ގޮތުން، ފާޅު ގައި ނޫން ގޮތަކަށް ނަތީޖާ ބަދަލުވާ ކަމެއް ނުކުރެވޭނެ ކަމަށް ވެސް ފާހަގަ ކޮށްފައިވެ އެވެ.
ރިޔާސީ އިންތިޚާބުގެ ނަތީޖާ ދެ ގަޑިއިރު ނުވަތަ ތިން ގަޑިއިރުގެ ތެރޭގައި މިހާރު ވެސް ލިބޭއިރު، އިލެކްޓްރޯނިކް ވޯޓިން މެދުވެރިކޮށް ނަތީޖާ ބަދަލު ކުރަން ފުރުސަތެއް ނުދެވޭނެ ކަމަށް ވެސް މަޚްލޫފް ވަނީ ވިދާޅުވެފަ އެވެ.
ރިޔާސީ އިންތިޚާބުގެ ދެ ވަނަ ބުރު އުވާލައި، ޕްރިފެރެންޝަލް ވޯޓިން ސިސްޓަމެއް ތައާރަފު ކުރުމުގެ ވިސްނުން ގެންގުޅުއްވާ ކަމަށް ރައީސް މުޢިއްޒު ހާމަކުރެއްވުމާ އެކު، ގިނަ ބަޔަކު އަންނަނީ އެކަމަށް ފާޑު ވިދާޅުވެ ވާހަކަ ދައްކަމުންނެވެ.
އަދި އެކަން ގޮތުގައި ކުރުމުގެ ފުރުސަތު ދީގެން ނުވާނެ ކަމަށް ވެސް ސިޔާސީ މީހުން އަދި ބައެއް އާންމު ރައްޔިތުން ވެސް އަންނަނީ ބުނަމުންނެވެ.
