ކަރަންޓު ދިނުމުގައި ފެނަކަ ފެއިލް، ހިންގަން ނޭނގޭނަމަ ކުރީގެ އެމްޑީ ސައީދުގެ މަޝްވަރާ ހޯއްދަވާ: މޭޔަރު ނިޒާރު
މުއާޒު ހަވާލުވެލެއްވީ ފެނަކަ ހިންގަވަން، ފެނަކަ އޮޑިޓް ކުރާކަށް ނޫން
އައްޑޫ ސިޓީގެ މޭޔަރު އަލީ ނިޒާރު
އައްޑޫ ކަރަންޓު މެދު ނުކެނޑި ދިނުމަށް ފެނަކަ ފެއިލްވެ ފެނަކަ ހިންގަން ނޭގޭނަމަ ކުރީގެ ފެނަކަ ކޯރަޕޭޝަންގެ ކުރީގެ މެނޭޖިންގ ޑިރެކްޓަރު (އެމްޑީ) އަހުމަދު ސައީދު މުހައްމަދުގެ މަޝްވަރާ ހޯދުމަށް އައްޑޫ ސިޓީގެ މޭޔަރު އަލީ ނިޒާރު ފެނަކަ އެމްޑީ މުއާޒު އަރިހުގައި އެދިވަޑައިގެންފިއެވެ.
އައްޑޫ ކަރަންޓުގެ މައްސަލައާ ގުޅިގެން ފެނަކަ އެމްޑީ މުއާޒު ވަނީ އައްޑޫ ސިޓީއަށް ދިމާވަމުންދާ ކަރަންޓުގެ މައްސަލަތަކުގެ ސަބަބުތަކަށް އިޝާރާތް ކުރައްވައި ޕޯސްޓެއް ކުރައްވާފައެވެ. އެ ޕޯސްޓުގައި މުއާޒު ވިދާޅުވީ މާކެޓު ރޭޓުގައި 44 މިލިއަން ރުފިޔާއަށް ނިންމޭނެ އިމާރާތެއް 76 މިލިއަން ރުފިޔާއަށް ހަރަދު ކުރިއެރު ވެސް ނުނިންމުނު ކަމަށެވެ. އަދި ނާޖާއިޒުކޮށް އެތައް މިލިއަން ރުފިޔާއަކަށް ހިޔާނާތްތެރިވެފައިވާ ކަމަށެވެ.
މި ޕޯސްޓަށް ރައްދު ދެއްވައި އައްޑޫ ސިޓީގެ މޭޔަރު ނިޒާރު ވިދާޅުވީ އެންޓި ކޮރަޕްޝަން ކޮމިޝަން (އޭސީސީ) އިން ދައްކަން ޖެހޭ ވާހަކަ ދައްކަން ނުޖެހޭ ކަމަށާއި، އައްޑޫގެ ކަރަންޓުގެ މައްސަލަ ހައްލު ކޮށްދޭންޖެހޭ ކަމަށެވެ. މުއާޒު ހަވާލުވެލެއްވީ ފެނަކަ ހިންގަވަން ކަމަށާއި، ފެނަކަ އޮޑިޓް ކުރާކަށް ނޫން ކަމަށެވެ. އަދި އައްޑޫގައި އަޅަން ފަށާފައިވާ ޕަވަރ ހައުސް ނިންމަން ޖަނަރޭޓަރު ގެންނަންޖެހޭ ކަމަށާއި، ފައިސާ ހޯދަން އެނގެންޖެހޭ ކަމަށް ނިޒާރު ވިދާޅުވިއެވެ.
ނިޒާރު ވިދާޅުވީ ސަރުކާރުން ފައިސާ ލިބޭނެ ކަމަށާއި، ފެނަކަ ހިންގަން ނޭނގޭނަމަ އަދި ފައިސާ ހޯދަން ނޭނގޭނަމަ ކުރީގެ އެމްޑީ ސައީދުގެ މަޝްވަރާ ހޯދަންޖެހޭ ކަމަށެވެ.
އައްޑޫ ސިޓީގެ ކަރަންޓާ ގުޅޭގޮތުން ރާއްޖެއެމްވީއަށް ފެނަކައިގެ ކުރީގެ އެމްޑީ ސައީދު ވިދާޅުވީ އައްޑޫގެ ކަރަންޓުގެ މައްސަލަ ހައްލު ކުރުމަށް ފުރިހަމަ ޕްލޭނެއް އެކުލަވާލެވިފައިވާ ކަމަށެވެ. އެ މަސައްކަތުގެ ލިޔެކިއުންތައް ފެނަކަ އަދި ފިނޭންސް މިނިސްޓްރީގައި ހުންނާނެ ކަމަށާއި، ގެންނަންޖެހޭ އިންޖީނުތައް ގެނައުމަށް ވާޓްސިލާ ކުންފުންޏާއެކު އެއްބަސްވުމެއް އެކުލަވާލެވި ސޮއި ކުރުމަށް ތައްޔާރުވެފައިވާ ކަމަށެވެ. އަދި އެމަގުން މަސައްކަތްކުރި ނަމަ 2024 ވަނަ އަހަރުގެ މެއި މަހުގެ ތެރޭގައި އައްޑޫގެ ކަރަންޓުގެ މައްސަލައަށް ކުރިއަށް އޮތް 50 އަހަރަށް ހައްލުވެގެންދާނެ ކަމަށް ސައީދު ވިދާޅުވިއެވެ.
މީގެ އިތުރުން ސައީދު ވިދާޅުވީ އައްޑޫގެ ކަރަންޓުގެ ހާލަތަށް ރިޔާއަތްކޮށް ކޮންމެ ފަދަ އަގެއްގައި ނަމަވެސް އެސިޓީގެ ކަރަންޓުގެ މައްސަލަ ހައްލުކުރުމަކީ ދިވެހި ދައުލަތުގެ ޒިންމާއެއް ކަމަށެވެ.
އައްޑޫގެ ޕަވަރ ޕްރޮޖެކްޓްގެ މަސައްކަތް ނިންމަން ކަނޑައަޅާފައިވަނީ 2024 ވަނަ އަހަރުގެ ޖޫން މަހަށެވެ. ނަމަވެސް މިއަދާ ހަމައަށް އައި އިރު، އިންޖީނު އިންސްޓޯލް ކުރެވިފައިނުވެއެވެ.
