މާލެ އަތޮޅު ގުރައިދޫގައި ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ފަށާފައިވާ ހޭންޑްބޯޅަ ކޯޓު މި ސަރުކާރުން ރަސްމީކޮށް ހުޅުވައިފި އެވެ.

ކުޅިވަރާއި ހަށިހެޔޮ ކަމާ ބެހޭ ވަޒީރު ޢަބްދުﷲ ރާފިޢު ވަނީ ގުރައިދޫގެ ހޭންޑްބޯޅަ ކޯޓު ރަސްމީކޮށް ހުޅުވައިދެއްވައިފަ އެވެ. އެކަމަށްޓަކައި ގުރައިދޫގައި ޚާއްސަ ރަސްމިއްޔާތެއް ވެސް ވަނީ ބާއްވައިފަ އެވެ. އެކަން ހާމަކޮށް ކުޅިވަރު ވުޒާރާ އިން ކޮށްފައިވާ ޕޯސްޓެއްގައި ބުނެފައި ވަނީ، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ވަޢުދުތަކުގެ ތެރޭގައި ހިމެނޭ، ހުއްޓިފައިވާ ކުޅިވަރު މަޝްރޫޢުތައް ފުރިހަމަކުރުމުގެ ޕްރޮގްރާމުގެ ތެރެއިން، ގުރައިދޫ ހޭންޑުބޯޅަ ކޯޓުގެ މަސައްކަތް ނިންމާ ރަސްމީކޮށް ހުޅުވާފައިވާ ކަމަށެވެ.

ގުރައިދޫގެ ހޭންޑުބޯޅަ ކޯޓުގެ މަސައްކަތަކީ ރައީސް ޞާލިޙުގެ ސަރުކާރުގައި އޭރުގެ ކުޅިވަރު ވުޒާރާ އިން އެ ރަށު ކައުންސިލާ ހަވާލުކޮށްގެން ކުރިއަށް ގެންދިޔަ މަޝްރޫޢެކެވެ. އެގޮތުން އެ ރަށުގައި ހޭންޑުބޯޅަ ކޯޓުގެ މަސައްކަތް ކުރުމަށް އިއުލާނުކޮށް، ހުށަހަޅާ ބިޑުތައް އިވެލިއުއޭޓް ކުރުމަށްފަހު މިނިސްޓްރީއަށް ހުށަހެޅުމަށް އެރަށުގެ ކައުންސިލާ ހަވާލުކޮށްފައި ވަނީ 2022 ވަނަ އަހަރުގެ ޖަނަވަރީ މަހުގެ 20 ވަނަ ދުވަހު އެވެ. އެގޮތުން އެ މަސައްކަތަށް ވަނީ 1،502،440.78 (އެއް މިލިއަން، ފަސް ލައްކަ ދެ ހާސް، ހަތަރު ސަތޭކަ ސާޅީސް ރުފިޔާ، ހަތް ދިހަ އަށް ލާރި)ގެ ބަޖެޓެއް ހަމަޖައްސައިފަ އެވެ.

ކުރީގެ ސަރުކާރުން ރާއްޖޭގެ އެކި އެކި ކަންކޮޅުތަކުގައި ފަށާފައިވާ ކުޅިވަރުގެ އުމުރާނީ ވަސީލަތްތަތައް ޤާއިމު ކުރުމުގެ މަޝްރޫޢުތައް، މި ސަރުކާރުން އަންނަނީ ހުޅުވަމުންނެވެ. އެގޮތުން މި ސަރުކާރުން އެކަން ކުރިއަށް ގެންދަނީ، ހުއްޓިފައިވާ ކުޅިވަރު މަޝްރޫޢުތައް ފުރިހަމަ ކުރުމުގެ ޕްރޮގްރާމްގެ ދަށުންނެވެ. ނަމަވެސް ރައީސް ޞާލިޙުގެ ސަރުކާރު ނިމި، ރައީސް މުޢިއްޒުގެ ސަރުކާރު ފެށުނުއިރު އޭގެ ތެރެއިން ގިނަ މަޝްރޫޢުތަކަކީ ނުހުއްޓި ހިނގަ ހިނގާ ހުރި މަޝްރޫޢުތަކެވެ.

މިދިޔަ ޖަނަވަރީ މަހުގެ ތެރޭގައި ރައީސް މުޢިއްޒު އަތޮޅު ތެރޭގެ ބައެއް ރަށްތަކަށް ކުރެއްވި ދަތުރުފުޅުގައި ވެސް ވަނީ، ކުރީ ސަރުކާރުގެ ބައެއް މަޝްރޫޢުތައް ހުޅުވައިދެއްވައިފަ އެވެ.