ބާސާ ދޫކޮށްލާކަށް ޑި ޔޯން ބޭނުމެއް ނުވޭ

ބާސެލޯނާ ދޫކޮށް އެހެން ޓީމަކަށް ދާން ބޭނުންނުވާ ކަމަށް އެ ޓީމަށް ކުޅޭ ނެދަލޭންޑްސްގެ މިޑްފީލްޑަރު ފްރެންކޯ ޑި ޔޯން ބުނެފިއެވެ.

ޔުނައިޓެޑުގެ އައު ކޯޗު ޓެން ހާގު ބޭނުންވެގެން ޔުނައިޓޑުން އަންނަނީ ޑި ޔޯން ހޯދުމުގެ މަސައްކަތް ކުރަމުން ކަމަށް މީޑިއާ ރިޕޯޓުތައް ބުނެފައިވެއެވެ. އަދި ޔުނައިޓެޑުން ބާސާއާއެކު އެކަމަށް މަޝްވަރާކުރި ކަމަށް ވެސް ރިޕޯޓުތައް ބުނެފައިވެއެވެ.

މިކަމާ ގުޅިގެން ޑި ޔޯން ބުނީ ބޮޑެތި ޓީމުތަކުން ކުޅުންތެރިންނަށް ހުށައެޅުން އަންނާނެކަމަށެވެ. ނަމަވެސް މިވަގުތު އޭނާ ހުރީ ދުނިޔޭގެ އެންމެ ބޮޑު ކުލަބުގައި ކަމަށް ޑި ޔޯން ބުންޏެވެ. އަދި ބާސާގައި އޭނާ ހުންނަނީ ނުހަނު ހިތްހަމަޖެހިގެން ކަމަށް ޑި ޔޯން ބުންޏެވެ. އެހެން ކަމުން އިތުރު އެހެން ޓީމަކާ މެދު ވިސްނުން ނުގެން ގުޅޭކަމަށް ވެސް އޭނާ ބުންޏެވެ.

އަޔެކްސްގައި ހުރުމަށްފަހު ޑި ޔޯން ބާސާއަށް ބަދަލުވީ 2019 ވަނަ އަހަރުއެވެ. އޭގެ ފަހުން އޭނާ ވަނީ އެ ޓީމަށް ކުޅެދިން 140 މެޗުގައި 13 ލަނޑު ޖަހާފައެވެ. ބާސާއާއެކު ޑި ޔޯންއަށް މިހާތަނަށް ހޯދުނީ އެންމެ ތައްޓެކެވެ. އެއީ 21-2020 ވަނަ ސީޒަނުގެ ކޮޕާ ޑެލްރޭއެވެ.