ބެނާޑޯ ސިލްވާ ހޯދުމަކީ ބާސެލޯނާއަށް އުނދަގޫކަމެއް: ގާޑިއޯލާ

މެންޗެސްޓަރ ސިޓީއަށް ކުޅެމުން އަންނަ ބެނާޑޯ ސިލްވާ ހޯދުން ބާސެލޯނާއަށް ވަރަށް އުނދަގޫވާނެކަމަށް ސިޓީގެ ކޯޗު ޕެޕް ގާޑިއޯލާ ބުނެފިއެވެ.

ސިލްވާއަކީ ބާސެލޯނާއިން މިއަންނަ ސީޒަން ފެށެންވާއިރަށް ހޯދުމަށް މަސައްކަތް ކުރަމުން އަންނަ އެންމެ މުހިންމު އެއް ކުޅުންތެރިޔާއެވެ. ނަމަވެސް އޭނާގެ ސޮއި ހޯދުމަކީ ބާސެލޯނާގެ މާލީ ހާލަތަށް ބަލާ މިވަގުތު ކުރެވެން އޮތް ކަމެއް ނޫނެވެ. ބާސެލޯނާއިން އަންނަނީ މިއަންނަ ސީޒަން ފެށެންވާއިރަށް ކުޅުންތެރިން ގަތުމަށް ލާރި ލިބޭނެ މަގެއް ހޯދަމުންނެވެ.

މެންޗެސްޓަރ ސިޓީއާއެކު ސިލްވާ ހަދާފައިވާ އެއްބަސްވުމުގެ މުއްދަތު ހަމަވާނީ 2025 ވަނަ އަހަރުއެވެ. އޭގެ ކުރިން އޭނާ ހޯދަން ބޭނުންވާނަމަ 100 މިލިއަން ޔޫރޯގެ ފީއެއް ދައްކަން ޖެހޭނެކަމަށް ސިޓީން ވަނީ ބުނެފައެވެ.

ސިލްވާގެ އިތުރުން ބާސެލޯނާއިން އަންނަނީ ބަޔާން މިއުނިކަށް ކުޅެމުން އަންނަ ރޮބަޓް ލެވަންޑޯސްކީ ހޯދުމަށްވެސް މަސައްކަތް ކުރަމުންނެވެ. ލެވަންޑޯސްކީ ވަނީ އިތުރަށް ބަޔާންގައި މަޑުކުރަން ބޭނުން ނުވާކަން ހާމަކޮށްފައެވެ. އަދި އޭނާގެ ޝައުގުވެރިކަން ހުރީ ބާސެލޯނާއަށް ބަދަލުވުމަށެވެ.

ނަމަވެސް ލެވަންޑޯސްކީ ހޯދުމަށްވެސް ބާސެލޯނާއަށް އޮތް ހުރަހަކީ މާލީ ދަތިކަމެވެ. އަދި މާލީ ގޮތުން އެވަރުގެ ފުދުންތެރިކަމެއް ހޯދުނު ނަމަވެސް ބަޔާންއިން ލެވަންޑޯސްކީ ދޫކުރާނެކަމާމެދު މިހާރު އޮތީ ސުވާލު އުފެދިފައެވެ.