ސަލާމަތަށްވުރެ ޗައިނާއަށް މުހިންމީ ޒާތީ މަންފާ ބޮޑު، ދޭދޭ ގުޅުންތަ؟

ހުޅަނގުގެ މީޑިއާގައި މި ދުވަސްވަރު އެންމެ ގަދައަށް ދެކެވެމުންދާ އެއް ވާހަކައަކީ ބައިނަލްއަގުވާމީ އިންޒާރުތަކާ އެކުގައިވެސް، އުތުރު ކޮރެއާއިން ރެކޯޑް އަދަދަކަށް ބެލިސްޓިކް މިސައިލް ޓެސްޓުތައް ލޯންޗު ކުރަމުންދާ ވާހަކައެވެ.

މި ހަފުތާ ތެރޭގައިވެސް އުތުރު ކޮރެއާއިން ރެކޯޑް އަދަދަކަށް މިސައިލް ޓެސްޓުކޮށް، ސަރަހައްދީ މަސްރަހު ނުތަނަވަސް ކުރުވާފައި ވާ އިރު، އެ ފަދަ ޓެސްޓުތައް ކުރިއަށް ގެންދިއުމަކީ އދއިން އެ ގައުމަށް މަނާ ކޮށްފައި އޮންނަ ކަމެކެވެ.

އުތުރު ކޮރެއާގެ ބެލިސްޓިކް މިސައިލް މަޝްރޫއާ ގުޅިގެން އެ ގައުމާ ދެކޮޅަށް ދަތި ކުރުމުގެ ފިޔަވަޅު އެޅުމަށް އދގައި އެންމެ ފަހުން ކުރި މަސައްކަތްވެސް ވަނީ ނާކާމިޔާބުވެފައެވެ. އެއީ އުތުރު ކޮރެއާގެ ބައިނަލްއަގުވާމީ ދޯސްތުން ކަމުގައި ޗައިނާއާއި ރަޝިއާއަށް އދގައި ލިބިފައި އޮންނަ ވީޓޯ ބާރުގެ ސަބަބުންނެވެ.

ކަން މިހެން އޮތް އިރު، އެމެރިކާއިން، ސަލާމަތާއި ރައްކާތެރިކަމުގެ މައްޗަށް، ޗައިނާއާއި ރަޝިއާއިން، "ހައްދެއް ނެތް" އިސްތިރާޖީ ގުޅުންތައް އިސް ކުރަނީތޯ، އދގައި ސުވާލު އުފައްދާފައެވެ.

އުތުރު ކޮރެއާގެ ދިފާއުގައި ޗައިނާއާއި ރަޝިއާއިން ވީޓޯ ކާޑުގެ ބާރުގެ ބޭނުން ކުރުމާ ގުޅިގެން، އެމެރިކާގެ ސީނިއާ ޑިޕްލޮމެޓް ޖެފްރީ ޑިލޮރެންޓިސް ވަނީ، އެ ޗައިނާއާއި ރަޝިއާއިން ކުޅުނު ވީޓޯ ކާޑަކީ "ބައިވެރިޔާ"ގެ ހައްގުގައި ކުރި ކަމަކަށް ނުވާނެ ކަމަށް އުއްމީދު ކުރާ ކަމަށް ވިދާޅުވެފައެވެ.

ޗައިނާއާއި ރަޝިއާއިން "ހައްދެއް ނެތް މިންވަރުގެ" ބަދަހި ގުޅުމެއް ގާއިމުކޮށް އެކަން އިއުލާން ކުރީ މި އަހަރުގެ ފެބުރުއަރީ މަހުގެ ތެރޭގައެވެ. އޭގެ ފަހުން އުތުރު ކޮރެއާއަ ދެކޮޅަށް ދަތި ކުރުމުގެ ފިޔަވަޅު އެޅުމަށް އދއިން ކުރި މަސައްކަތަށް ރަޝިއާއާއި ޗައިނާއިން ވީޓޯ ބާރުގައި ހުރަސް އަޅާ، އދގެ ސަލާމަތީ މަޖިލީސް ބައިބައިކޮށްފައި މި ވަނީ، 2006 ވަނަ އަހަރު އުތުރު ކޮރެއާއާ ދެކޮޅަށް ދަތި ކުރުމުގެ ފިޔަވަޅުތައް ތަންފީޒު ކުރަން ފެށި ފަހުން ފުރަތަމަ ފަހަރަށެވެ.

އެމެރިކާގެ ވާހަކަތަކަށް، ޗައިނާ އަދި ރަޝިއާގެ އދއިން މިޝަންއިން އަދި އިޖާބައެއް ދީފައި ނުވެއެވެ.

ޑިލޮރެންޓިސް ވަނީ ކޮރެއާ ސަރަހައްދުން ނިއުކްލިއާ ހަތިޔާރުގެ ބާރުވެރިކަން ނައްތާލުމަށްޓަކާ، ދަތިކުރުމުގެ ފިޔަވަޅުތަކަށް ލުއި ދިނުމާ ބެހޭ ގޮތުން މަޝްވަރާ ކުރުމަށް އެމެރިކާ ސަރުކާރުން ތައްޔާރަށް އޮތް ކަމަށް އިޝާރާތް ކުރައްވާފައެވެ. އަދި މަޝްވަރާތައް ފެށުމަށް އެމެރިކާއިން ތަކުރާރުކޮށް މަސައްކަތް ކޮށްފައި ވާނެ ކަމަށެވެ.

ސިއްރާއި ފާޅުގައިވެސް މެސެޖުތައް ފޮނުވާފައި ވާނެ ކަމަށާ، ނަމަވެސް އިޖާބައެއް ލިބިފައި ނުވާ ކަމަށް އެމެރިކާގެ ޑިޕްލޮމެޓް ވަނީ ވިދާޅުވެފައެވެ.

ނަމަވެސް ޗައިނާއިން އދއަށް ކަނޑައަޅާފައި ހުންނަވާ މަންދޫބު ޝާންގް ޖުން ވަނީ، ސަރަހައްދީ މަސްރަހު ނުތަނަވަސް ވަމުން ދަނީ އެމެރިކާއިން ގެންގުޅޭ "ހަމައެއް ލަމައެއް ނެތް" ސިޔާސަތުތަކުގެ ސަބަބުން ކަމަށް ވިދާޅުވެފައެވެ.

ޝާންގް ވިދާޅުވީ އެމެރިކާއަށް ކުރެވިދާނެ ކިތަންމެ ކަމެއް އެބަހުރި ކަމަށާ، އެގޮތުން އުތުރު ކޮރެއާއާ ދެކޮޅަށް ތަންފީޒު ކުރަމުންދާ ދަތިކުރުމުގެ ފިޔަވަޅުތަކަށް ލުއި ދިނުމާއި، ގުޅިގެން ހިންގާ އަސްކަރީ ތަމްރީނުތައް ހުއްޓާލުން ހިމެނޭ ކަމަށް މަންދޫބު ވިދާޅުވިއެވެ. މުހިންމީ، ޝަރުތުތަކަކާ ނުލާ މަޝްވަރާއަށް ތައްޔާރަށް އޮތް ކަމަށް ކިޔަކިޔާ އޮތުން ނޫން ކަމަށާ، މުހިންމީ، އަމަލީ ގޮތުން ފިޔަވަޅުތަކެއް އެޅުން ކަމަށްވެސް ޗައިނާގެ މަންދޫބު ވަނީ ވިދާޅުވެފައެވެ.

އުތުރު ކޮރެއާގެ ވާހަކަވެސް ހުރީ އެފަދަ ރޫހެއްގައެވެ. މިސައިލް ލޯންޗްތައް ދިފާއު ކުރަމުން އުތުރު ކޮރެއާއިން ބުނެފައި ވަނީ، އެއީ އެމެރިކާގެ ފަރާތުން ކުރިމަތިވާ "ސީދާ ނުރައްކާތަކުން" ސަލާމަތް ހޯދުމަށް އެ ގައުމުން ކުރިއަށް ގެންދާ މަޝްރޫއެއް ކަމަށެވެ. ނަމަވެސް ޑިލޮރެންޓިސް ވަނީ، އުތުރު ކޮރެއާގެ މިސައިލް ލޯންޗްތަކާއި ނިއުކްލިއާ ޓެސްޓުތަކަކީ، ބަޔަކު ބިރު ދައްކައިގެން ކުރާ ކަމެއް ނޫން ކަމަށް ވިދާޅުވެފައެވެ.