ބާސެލޯނާގެ ކަޅި ޑިމާރިއާއަށް!

ސްޕެއިންގެ ބާސެލޯނާއިން އާޖެންޓީނާގެ އެންހެލް ޑިމާރިއާއަށް ޝައުގުވެރިކަން ހުރިކަމަށް ރިޕޯޓުތައް ބުނެފިއެވެ.

ނިމުނު ސީޒަނަށްފަހު ޑިމާރިއާގެ ކޮންޓްރެކްޓް ހަމަވުމުން އޭނާ ވަނީ ޕީއެސްޖީއާ ވަކިވެފައެވެ. މިއާއެކު އޭނާ ހޯދުމަށް ގިނަ ކްލަބުތަކަކުން ޝައުގުވެރިކަން ފާޅުކުރިއެވެ. މީގެ ތެރެއިން އޭނާ ދިއުން އެންމެ ގާތްކަމަށް ބެލެވިފައި އޮތީ އިޓަލީގެ ޔުވެންޓަސްއަށެވެ. ޔުވެންޓަސްއިން އޭނާއަށް ހުށަހަޅާފައި ވަނީ ދެއަހަރުގެ ކޮންޓްރެކްޓެކެވެ. ނަމަވެސް ޑިމާރިއާ ބޭނުންވަނީ އެއް އަހަރުގެ ކޮންޓްރެކްޓެއް ކަމަށް ރިޕޯޓުތައް ބުނެއެވެ. މިއާއެކު ޑިމާރިއާ ޔުވެންޓަސްއަށް ދާނެކަމަށް ބެލެވިފައި އޮތް އޮތުމަށް މިހާރު މިވަނީ ސުވާލު އުފެދިފައެވެ.

ފުޓްބޯޅަ ޓްރާންސްފާގައި އިތުބާރުހުރި ކުޅިވަރު ނޫސްވެރިޔާ ފަބްރީޒިއޯ ރޮމާނޯ ބުނީ ބާސެލޯނާއިން ޑިމާރިއާއަށް ފާރަލަމުން އަންނަ ކަމަށެވެ. ޑިމާރިއާ މީގެ ކުރިން ވަނީ ރެއާލް މެޑްރިޑްއަށްވެސް ކުޅެފައެވެ. ރެއާލްގައި އޭނާ ވަނީ 124 މެޗު ކުޅެ 22 ލަނޑު ޖަހާފައެވެ.

އޭގެ ފަހުން މެންޗެސްޓަރ ޔުނައިޓެޑްއަށް ބަދަލުވެ ޑިމާރިއާ 27 މެޗުން ތިން ލަނޑު އެޓީމަށް ޖަހައިދިނެވެ. 2015 ވަނަ އަހަރުން ފެށިގެން ޑިމާރިއާ ކުޅެމުން އައީ ޕީއެސްޖީއަށެވެ. ޑިމާރިއާވަނީ ޕީއެސްޖީގައި 197 މެޗު ކުޅެގެން 56 ލަނޑު ޖަހާފައެވެ.

ބާސެލޯނާއިން މިހާރު އެންމެ ބޮޑަށް މަސައްކަތް ކުރަމުން އަންނަނީ އެޓީމުގެ އެޓޭކިންގ ލައިން ވަރުގަދަ ކުރުމަށެވެ. އެގޮތުން އެޓީމުން ވަނީ ބަޔާންގެ ލެވަންޑޯސްކީ ހޯދުމުގެ މަސައްކަތްވެސް ފަށާފައެވެ.