އެމްއެންޕީގެ މަޤާމުތަކަށް ކުރިމަތިލުމަށް ހުޅުވާލައިފި
5 ޖޫން 2022 | އާދީއްތަ 02:23މިމަޤާމްތަކަށް ކުރިމަތިލުމަށް ޝައުގުވެރިވާ އެމްއެންޕީގެ މެންބަރުންނަށް 27 ޖޫންގެ 14:00 އާ ހަމައަށް އެފުރުސަތު ވަނީ ހުޅުވާލެވިފައި
އެމްއެންޕީން ބޭއްވި ނޫސްވެރިންގެ ބައްދަލުވުމުގެ ތެރެއިން
މޯލްޑިވްސް ނެޝަނަލް ޕާޓީ(އެމްއެންޕީ)ގެ ޤައުމީ ހިންގާ ކައުންސިލްގެ މަޤާމުތަކަށް ކުރިމަތިލުމުގެ ފުރުސަތު ހުޅުވާލައިފިއެވެ.
އެޕާޓީން ބޭއްވި ނޫސްވެރިންގެ ބައްދަލުވުމެއްގައި އެމްއެންޕީގެ ސްޕޯކްސްޕަރސަން އަސްރާ އަޙްމަދު ވިދާޅުވީ، އެމްއެންޕީގެ ޤައުމީ ހިންގާ ކައުންސިލްގެ އިންތިޚާބު 6 އޮގަސްޓް ވާ ހޮނިހިރު ދުވަހު ބާއްވާގޮތަށް ހަމަޖައްސާފައިވާ ކަމަށެވެ. އަދި މިމަޤާމުތަކަށް ކުރިމަތިލުމަށް ޝައުގުވެރިވާ އެމްއެންޕީގެ މެންބަރުންނަށް 27 ޖޫން ވާ (ހޯމަ) ދުވަހުގެ 14:00 އާ ހަމައަށް އެފުރުސަތު ހުޅުވާލެވިފައިވާ ކަމަށް އަސްރާ ވިދާޅުވިއެވެ. އެގޮތުން އެމްއެންޕީގެ އޮފީހަށް ނުވަތަ އެމްއެންޕީއަށް އީ-މެއިލް ކުރެއްވުމުންވެސް ފޯމް ބަލައިގަނެވޭނެ ކަމުގައި އަސްރާ ފާހަގަކުރެއްވިއެވެ.
އިތުރަށް ވާހަކަދައްކަވަމުން އެމްއެންޕީގެ ސްޕޯކްސްޕަރސަން ވިދާޅުވީ ޕާޓީގެ އެތެރޭގެ އިންތިޚާބުގައި ޕާޓީގެ ރައީސްގެ މަޤާމުގެ އިތުރުން ޕާޓީގެ 6 ރީޖަންގެ ނާއިބު ރައީސުންގެ މަޤާމަށް ކުރިމަތިލުމަށް ހުޅުވާލާފައިވާ ކަމަށެވެ. އޭގެ އިތުރުން ރާއްޖޭގެ އިންތިޚާބީ 87 ދާއިރާގެ ރައީސްގެ މަޤާމަށް ވެސް ކުރިމަތިލުމުގެ ފުރުސަތު ވަނީ ހުޅުވާލާފައެވެ.
އަދި 27 ޖޫން އިން ފެށިގެން ފޯމްތައް ޕްރޮސެސްކުރުމަށް 9 ދުވަސް ދިނުމަށްފަހު، އިންތިޚާބުގެ މަޤާމުތަކަށް ކުރިމަތިލާ ކެންޑިޑޭޓުންގެ ނަންތައް އިޢުލާނުކޮށް، ނަންބަރު ތަރުތީބުކޮށް ކެމްޕޭން ކުރުމުގެ ފުރުސަތު 7 ޖުލައި ގައި ހުޅުވާލެވިގެންދާނެ ކަމަށް އޭނާ ވިދާޅުވިއެވެ. އަސްރާ އިތުރަށް ފާހަގަކުރެއްވި ގޮތުގައި ކެންޑިޑޭޓުންނަށް އިންތިޚާބުގެ ކެމްޕޭނަށް މަހެއްހާ ދުވަސް ލިބިގެންދާނެ ކަމަށާއި 6 އޮގަސްޓްގައި އޮންނަ އިންތިޚާބުގައި ވޯޓްލާނީ ވޯޓް ފޮށި ބަހައްޓައިގެން ވޯޓް ކަރުދާސް ބޭނުންކޮށްގެން ކަމުގައާއި އެމްއެންޕީން މިއިންތިޚާބުގައި ބަލާނީ އެމްއެންޕީގެ މެންބަރުންގެ ދަފްތަރަށް ކަމުގައި ވިދާޅުވިއެވެ.
އެމްއެންޕީގެ ޤައުމީ ހިންގާ ކައުންސިލްގެ އިންތިޚާބުގެ މަޤާމުތަކަށް ކުރިމަތިލުމަށް އެދޭ ފޯމާއި އިޤުރާރު، އެމްއެންޕީގެ މެމްބަރޝިޕް ފޯމް، އިންތިޚާބަށް ކުރިމަތިލުމަށް އެދޭ ފޯމު، އިންތިޚާބަށް ކުރިމަތިލާ މީހާގެ ދަރަނީގެ ރެކޯޑާއި، ކުށުގެ ރެކޯޑް ސާފުކުރަން އެދޭ ފޯމް އެމްއެންޕީގެ ވެބްސައިޓުން ލިބޭނެކަމަށް އެޕާޓީން ބުނެއެވެ.
