2008 ވަނަ އަހަރުން ފެށިގެން ރާއްޖޭގައި މިހާތަނަށް 3 ވެރިކަމެއް ކޮށްފިއެވެ. އަދި މިހާރު އޮތީ 4 ވަނަ ވެރިކަމެވެ. ނަމަވެސް ކޯލިޝަނަކާއެކު ކުރިއަށް ދެވުނު ވެރިކަމެއް އަދި މިހާތަނަށް ފެނިފައެއްނެތެވެ. 2008 ވަނަ އަހަރު އޮތް ވެރިކަން ރޫޅިގެން ދިޔައީ އެއިރު އޮތް ވެރިކަން ބަޔަކު ނިކުމެ ބަޣާވާތަކުން ވައްޓާލި ހަމައިންނެވެ.

ދެން އައީ ބަޣާވާތުގެ ވެރިން އެކުލަވާލި ވެރިކަމެކެވެ. ކޯލިޝަން ވެރިކަމެކޯލައެވެ. އެ ވެރިކަމުގައި ވެސް ކޯލިޝަން ހަދާ ޖަހާނެހާ ސަކަރާތެއް ޖެހިއެވެ. އެޔެއް މިޔެއް ވާއެއް ނުވާއެއް އެނގޭމީހަކު ނެތެވެ. ދެން އައި 2013 ވަނަ އަހަރުގެ ރިޔާސީ އިންތިހާބުގައި ވެސް ވެރިކަމަށް ބަޔަކަށް އާދެވުނީ ކޯލިޝަން ހަދައިގެންނެވެ. ނަމަވެސް ކޭކު ބަހާނެ ގޮތެއް ނޭނގި އެންމެ ފަހުން ވެރިކަމުގެ ގަދަ ބާރު ހިންގި މީހާ މުޅި ވެރިކަން ކުރަން ނިންމިއެވެ. ހުދު މުހުތާރުކޮށެވެ. އެހާހަމައިން ކޯލިޝަން ދިޔައީ ހަވަޔަށެވެ.

ކުރީގެ ރައީސް އަބްދުﷲ ޔާމީންގެ ވެރިކަމުގައި ކޯލިޝަން ޕާޓުނަރުންނަށް ހިއްސާ ބަހަން ޖެހުނު ކޮންމެ ފަހަރު ރައީސް ޔާމީނަށް ސީދާ އެކަން ކުރައްވާނެ ގޮތެއް ވިދާޅެއް ނުވެވެއެވެ. ކޮންމެވެސް ގައުމެއްގެ މިސާލެއްދައްކަވާ ނުވަތަ އެއިރު ކޯލިޝަނުން ދިން ނަންތަކަކީ ނުކިޔަވާ ތިބި ބަޔަކަށް ހައްދަވާ ވާހަކަފުޅު ދައްކަވަމުން ގެންދެވިއެވެ. މިފަދަ އެއް ކަންތަކަށް ބަލާލާ އިރު އިންޑިއާއަށް އެމަނިކުފާނު ކުރެއްވި ދަތުރުފުޅެއްގެ ތެރެއިން ދެއްކެވި ވާހަކަ ފުޅަކަށް ބަލާލާނަމެވެ.

އެމަނިކުފާނު ވިދާޅުވީ ޖޭ.ޕީ. އަށް ދަންނަވައިގެން، ޖޭ.ޕީ އަށް ގޮނޑިއަށް ނަންތަކެއް ހުށަނޭޅުއްވިގެން އެތަންތަން ޕީ.ޕީ.އެމް. އިން ފުރާފައި ހުންނާނެ ކަމަށެވެ. ސަރުކާރު ހިންގާތާ 7 މަސްވެއްޖެ ކަމަށާއި، ކުންފުނިތަކުގެ ބޯޑަށް، ޕާޓީތަކުން ދޭންވާ ނަންތައް ނުލިބިގެން، ބޯޑުގެ މެންބަރުން ހަމަނުވެ އޮންނަންވާނެ ކަމަކަށް، ގަބޫލު  ނުކުރައްވާ ކަމަށެވެ.

އަދި ވިދާޅުވީ ކުންފުނިތަކުގެ ބޯޑުތަކަށް އެކަށީގެންވާ ޢިލްމީ ޤާބިލު ބޭފުޅުން ދެއްވިނަމަ، ބޯޑުތައް ހިނގާނެ ކަމަށެވެ.

ރައީސް ޔާމީން ކޯލިޝަން ހައްދަވައިގެން ޕާޓުނަރުންނަށް ދޭންޖެހޭ ވަރު ނުދޭން ގަދަ ހައްދަވާފައި ހުންނެވި މިންވަރަކީ ޖޭޕީގެ ލީޑަރަށް 35 ޕަސެންޓް ނުލިބެއޭ ބުނާއިރު، ދުނިޔޭގެ ކޮންތަނެއްގައިތޯ، ވެރިކަން ކުރާ ޕާޓީން ހޯމް މިނިސްޓްރީ ދޫކޮށްލާނީ ޖޭ.ޕީ. އަށް ކަމަށް ވިދާޅުވެ ސުވާލު އުފެއްދެވިއެވެ.

ފަހުން ފަހުން އައިސް ވެރިކަމުގެ މެދާ ހިސާބަށް ނުދަނީސް ކޯލިޝަން ރޫޅާލާ އެކުވެރިންނާއި ބައިވެރިންވެސް އެއްފަރަތްކޮށްލައްވާ ބޭނުންފުޅު ގޮތަކަށް ހެއްދެވީއެވެ. ހުދުމުހުތާރު ވެރިކަމެއް ކުރައްވަން ވެރިކަމަށް ވަޑައިގެންނެވި އިރު އެކުގައި ތިއްބެވި ބޭފުޅުން ވެސް ދޫކުރައްވާ ކުރެއްވި މަސައްކަތް ވެސް ހަނދާނުން ފޮހެލެއްވީއެވެ.

އަނެއްކާވެސް މި ފެންނަނީ އެފަދަ މަންޒަރެކެވެ. ވެރިކަމަށް ވަޑައިގަންނަވަން ބޭނުންފުޅު ނުވާކަމަށް ވިދާޅުވެ ދައްކަވަނީ އެ ވާހަކައެވެ. ރިޔާސީ އިންތިހާބާއި ކައިރިވާ ވަރަކަށް ކޯލިޝަންގެ ވާހަކަ ވެސް އަޑުގަދަވެއެވެ. އެ ނޫން ގޮތެއް ވެސް ނެތްކަމަށް ވިދާޅުވެ ވާހަކަފުޅު ދައްކަވަމުން ގެންދަވައެވެ.

ނަމަވެސް މިއަދު ފެންނަން އޮތް ހަގީގަތަކީ ރައީސް ޔާމީނަކީ ވެރިކަން ކުރައްވަން އެހެން ބޭފުޅުންނާ އެކީގައި މަސައްކަތް ކުރެއްވޭނެ ވެރިއެއް ނޫންކަމެވެ. ހުދުމުހުތާރުކަން އިސްކުރައްވާތީއެވެ.