ޚަލީލުގެ މައްޗަށް މަނީ ލޯންޑަރިންގެ ދައުވާ ނުއުފުލޭނެ ގޮތަކީ ނެތް ގޮތެއް، ފައިސާކޮޅަށްވުރެން 15 އަހަރު ޖަލުގައި އޮންނަން ޖެހުމުން ލިބޭ ހިތްދަތިކަން މާ ބޮޑުވާނެ: ޔާމީން
ރައީސް ޔާމީން ވަނީ ޚަލީލަކީ ކޮން ތަނަވަސް ކަމެއް ހުރި މީހެއްތޯ ސުވާލު އުފައްދަވާފައި
ރައީސް މުޢިއްޒު އަދި ރައީސް އޮފީހުގެ ކޮމިއުނިކޭޝަން މިނިސްޓަރު ޚަލީލް
ރައީސުލްޖުމްހޫރިއްޔާ މުޙައްމަދު މުއިއްޒުގެ މި ދައުރު ބަދަލުވުމުން ރައީސް އޮފީހުގެ ކޮމިއުނިކޭޝަން މިނިސްޓަރ އިބްރާހީމް ޚަލީލުގެ މައްޗަށް މަނީ ލޯންޑަރިންގެ ދައުވާ ކުރާނެ ކަމަށާއި، ފައިސާކޮޅަކަށްވުރެން 15 އަހަރު ޖަލުގައި އޮންނަން ޖެހުމުން ލިބޭ ހިތްދަތިކަން މާ ބޮޑުވާނެ ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރައީސް ޔާމީން މިހެން ވިދާޅުވީ ޕީއެންއެފް އިން ބުރާސްފަތި ދުވަހުގެރޭ ބޭއްވި އެ ޕާޓީގެ ފްރަންޓް އޮފީސް ޖަލްސާގައި ވާހަކަފުޅު ދައްކަވަމުންނެވެ.
މިހާރު ފެންމަތިވެގެން އުޅޭ "އެމްއެމް ޓީވީ" ގެ ނަމުގައި ޗެނަލް ހިންގާ ކުންފުނިން ކުއްޔަށް ދޫކުރާ ފަންގިފިލާތަކެއްގައި ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) ހިންގަން އެވޯޑްކުރި މައްސަލައިގެ ކޮރަޕްޝަން އާ ގުޅޭ ގޮތުން ވާހަކަ ދައްކަވަމުން ރައީސް ޔާމީން ވިދާޅުވީ، މަގާމުގައި ހުންނަވައިގެން ފައިސާކޮޅެއް ލިބިދާނެ ކަމަށާއި، އެކަމަކު އެ ފައިސާ ކޮޅަށްވުރެ 15 އަހަރު ޖަލުގައި އޮންނަން ޖެހުމުން ލިބޭ ހިތްދަތިކަން މާ ބޮޑުވާނެ ކަމަށެވެ. އެހެންކަމުން މި ދައުރު ބަދަލުވުމުން ޚަލީލުގެ މައްޗަށް މަނީ ލޯންޑަރިންގެ ދައުވާ ކުރާނެ ކަން ޚަލީލަށް އެގެން ވާނެ ކަމަށެވެ.
" ޚަލީލުގެ މައްޗަށް މަނީ ލޯންޑަރިންގެ ދައުވާ ނުއުފުލޭނެ ގޮތަކީ ނެތް ގޮތެއް. އެހެންވެ ސާހިބު މީހާ ބުންޏަސް ނުކުރާނެ ކަންތައް ހުންނަވާނެ" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، އެ ޓީވީ ސްޓޭޝަންގެ ސްޓޫޑިއޯ ރޫމްގެ ފެންވަރު އަލްޖަޒީރާގައި ވެސް ނުހުންނާނެ ކަމަށެވެ. މި ހުރިހާ ކަމެއް ކުރާއިރު ކޮންމެވެސް ކަހަލަ ޓޭސްޓެއް ފެންވަރެއް ހުންނަންވާނެ ކަމަށާއި، މިކަމުގެ އަޑި ބަލާލާއިރު މި އޮންނަނީ ޚަލީލުގެ ނަމުގަައި އެ ޓީވީ ސްޓޭޝަން ރަޖިސްޓްރީ ކޮށްފައި ކަމަށެވެ. ރައީސް ޔާމީން ވަނީ ޚަލީލަކީ ކޮން ތަނަވަސް ކަމެއް ހުރި މީހެއްތޯ ސުވާލު އުފައްދަވާފައެވެ.
"ދެން ޚަލީލަކީ ކޮން ތަނަވަސްކަމެއް އޮތް މީހެއްތޯ. ދެން ޚަލީލު ކަމެއް ކުރަންޏާ އެސްޓިއޯއިންނާ އެތަން މިތަނުން އެންސްޕާއިން އެވަރުގެ ފަންޑެން ދޭނެތޯ. ކަމެއް ކުރިއަސް ވަށާޖެހޭ ގޮތަށް ކަމެއް ކޮށްލަން ނޭނގެނީ ނޫންތޯ. ޚަލީލު ނަމުގައި އެތަން އެހުރީ. ދެން މިބުނަނީ މިއީ މުއިއްޒާ ބެހޭ ތަނެއް ނޫނޭ. އެކަމަކު އެމްއެމް އަކީ ކޮންއެއްޗެއް ކަމެއް ނޭނގެ. ހަމަ ގައިމުވެސް މިލިމީޓަރެއް ނޫން. މުހައްމަދު މުއިއްޒޭ ބުނިއްޔާ މާ ފަސޭހަވާނެ" ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ ޚަލީލަކީ ރައީސް އޮފީހުގެ މިނިސްޓަރެއް ކަމަށާއި، މި ތުހުމަތުތަކަށް ޖަވާބުދޭން ޚާލީލަށް ކެރިވަޑައިގަންނަވާނެތޯ ސުވާލު އުފައްދަވާފައެވެ.
"އޭނާގެ ނަމުގައި ރަޖިސްޓްރީ ކޮށް އޭނަގެ މުދަލަކަށް އެމްއެމް ޓީވީ ވެގެން ދާއިރު އޭނައަށް ކެރޭނެތޯ އެމްއެމްޓީވީއަށް މިދިއަ ޚަރަދު ތަކާއި ލާރި ލިބުނު ގޮތާ، ކީއްވެތޯ އެސްޓިއޯއިން ހުރިހާ ޓީވީ ސްކްރީންތަކެއް.. އޭނައަށް ކެރޭނެތޯ ޖަވާބުދާރީވެފައި މިވެނިގޮތަކަށް ލިބިފަ ހުރި ލާރިއޭ ބުނަން ކެރޭނެތޯ" ޔާމީން ވިދާޅުވިއެވެ.
އަދި މި ދެ މައްސަލައިގައިވެސް ޖަވާބުދާރީވާން ހުންނެވީ އެންސްޕާގެ ސީއީއޯ އަދި ސަރުކާރުގެ ތަރުޖަމާނު ހީނާ ވަލީދު ކަމަށާއި، އެހެންކަމުން އެންސްޕާގެ ބަޖެޓުން މިވަރުގެ ކަމެއް މިކުރީ އެއީ ޚަލީލުގެ އިންވެސްޓްމަންޓަކަށް ވާތީއޭ ވިދާޅުވެ އެކަން ސާފުކޮށްދޭން ހީނާ އަށް ކެރިވަޑައިގަންނަވާނެތޯ ޔާމީން ސުވާލު ކުރެއްވިއެވެ.
އެންސްޕާ ހިންގުމަށް އޮފީސް އިމާރާތެއް ހޯދަން 34.8 މިލިއަން ރުފިޔާގެ މުއާމަލާތެއް ގޭގެ ވެރިފަރާތް ނޫން އެހެން ފަރާތަކާ ކުރިކަމަށް ބުނެ ބޮޑެތި ތުހުމަތުތަކެއް ވަނީ އެ އެޖެންސީއަށް ކުރެވިފައިވެއެވެ.
މީގެ އިތުރުން ރައީސް ޔާމީން ވިދަޅުވީ، އެމަނިކުފާނު މިނިވަންކަމާއެކު ދޫކޮށްލާފައި ބަސްކިޔޭ ގޮތަށް އެނބުރޭ ކަމަށްވަންޏާ މިހިންގާ ކޮރަޕްޝަންގެ ޖަރީމާތަކެއް ނުހިންގޭނެ ކަމަށާއި، އެއީކީ ވާނެ ކަމެއް ނޫން ކަމަށެވެ.
" ރައްޔިތުންގެ މަޖިލީހުގައި ތިބި ރައްޔިތުންގެ މަންދޫބުން ކަމުގައި ބުނާ މީހުން ބޭނުމެއް ނޫން މީގެއިން އެއްވެސް ކަމެއް ބަލާކަށް. އެކަމަކު އެތަނުގައި އިންތިހާއަށް ހިތް ނުތަނަވަސްކަން އޮތްކަން އިނގޭ. ފައިސާ އަކީ އިންތިހާއަށް މީހުންގެ ޝައުގުވެރިކަން ދަމާ އެއްޗެއް. މިހާރު މުއިއްޒު ހީފުޅު ކުރައްވަނީ ގާނޫނު އަސާސީ އަށް އިސްލާހު ގެންނަވައިގެން ކުރެއްވީމަ މުއިއްޒު ކޮންޓްރޯލަށް އެމީހުން ދިއައީ އޭ. އެ ގޮތަށް ހީވެސް ކޮށްގެން ނުވާނެ. މިހާލަތު ފުރޮޅިގެން ދާކަށް ވަގުތެއް ނުނަގާނެ. އަޅުގަނޑުމެން އަދިވެސް އެދެނީ މުއިއްޒު އަމިއްލަ އަށް އެންމެންނަށް ދެއްވާ ނަސޭހަތް އަމިއްލަ އަށް ގަބޫލު ކުރައްވަން. ހެޔޮ ބަސް އަހާ ހެޔޮ ބަސް ގަބޫލު ކުރާ މީހަކަށް ވާށޭ" ރައީސް ޔާމީން ވިދާޅުވިއެވެ.
ރައީސް މުއިއްޒުގެ ބައްޕާފުޅުގެ ފޮތުގައި އެވާހަކަ ނެތީތޯ ވިދާޅުވެ ރައީސް ޔާމީން ވަނީ ފޮތުގެ ވަކި ބައިތަކެއް ނުނެއްގެވުމަށް ވިދާޅުވެފައެވެ.
