މިއަދު ގައުމު ވެއްޓިފައި މިއޮތް ހާލަތަށް ދިއުމުގައި އަޅުގަނޑު ވެސް ހިމެނޭ ގޮތަށް ރައްޔިތުންގެ މަޖިލީހުގެ ވަރަށް ބޮޑު އިހުމާލުތަކެއް އެބައޮތް: ޤާސިމް

މިއަދު ގައުމު ވެއްޓިފައި މިއޮތް ހާލަތަށް ދިއުމުގައި އޭނާވެސް ހިމެނޭ ގޮތަށް ރައްޔިތުންގެ މަޖިލީހުގެ ވަރަށް ބޮޑު އިހުމާލުތަކެއް އެބައޮތް ކަމަށާއި، އެހެންނޫންނަމަ މިއަދު މިހާ ހިސާބަކަށް ނުދާނެ ކަމަށް މާމިގިލިދާއިރާގެ މެންބަރު ޤާސިމް އިބްރާހިމް ވިދާޅުވެއްޖެއެވެ.

ބަޖެޓް ދިރާސާ ކޮމިޓީގައި ވާހަކަދައްކަވަމުން ޤާސިމް ވިދާޅުވީ 2008ން ފެށިގެން ބަދަލުވަމުން މި އަންނަނީ އެއްވާހަކައެއް ކަމަށެވެ. މިދާ ގޮތުން އަޅުގަނޑުމެންގެ ގައުމު ސަލާމަތުގެ އައްސޭރިއަކަށް ނުދެވޭނެ ކަމަށާއި ހިތާމަކުރައްވާ ކަމަށް ޤާސިމް ވިދާޅުވިއެވެ.

މިއަހަރުގެ ޖުލައި ނުވަތަ ޖޫންގެ ތެރޭގައި ރައީސް މުއިއްޒު ބަދަލުތަކެއް ގެންނަވާނެކަމަށް ދެއްކެވި ވާހަކަފުޅަޅަށް އިޝާރާތްކުރައްވާ ގާސިމް ވިދާޅުވީ އެ ބަދަލު މިއަދާ ހަމައަށް ވެސް ނުގެނެވިގެން ދާކަމަށެވެ. އަދި ޚަރަދު ކުޑަކުރަން ޑިސިޕްލިން ފިޔަވަޅު އަޅުއްވާނެކަމަށް ވިދާޅުވި ނަމަވެސް އެކަން ނުކުރެވިގެން ދިޔަ ސަބަބު، މިނިސްޓަރުގެ ވާހަކައިން ސާފުވާ ކަމަށެވެ.

ޤާސިމް ވިދާޅުވީ ދަންނަވަން ބޭނުންވަނީ ގައުމު އިނދަ ޖައްސާނުލާ މިއަދު އޮތް ސަރުކާރުން ސަލާމަތްކޮށްދެއްވުމަށެވެ. އަދި ސަލާމަތްކޮށްދެއްވަން އަޅުއްވަންޖެހޭ ކޮންމެ ފިޔަވަޅެއް ވެސް އަޅުއްވައިގެން ނޫންގޮތަކަށް މިކަމުން ސަލާމަތެއް ނުވާނެ ކަމަށާއި ސަލާމަތްކޮށްދޭން އެހެން ބަޔަކު ނާންނާނެ ކަމަަށެވެ.

ޤާސިމް ވިދާޅުވީ މިއަދު ގައުމު ވެއްޓިފައި މިއޮތް ހާލަތަށް ދިއުމުގައި އޭނާވެސް ހިމެނޭ ގޮތަށް ރައްޔިތުންގެ މަޖިލީހުގެ ވަރަށް ބޮޑު އިހުމާލުތަކެއް އެބައޮތް ކަމަށެވެ. އެހެންނޫންނަމަ މިއަދު މިހާ ހިސާބަކަށް ނުދާނެ ކަމަށާއި، ބަޖެޓް ފާސްކޮށްދިނުމާ ޕްރޮޖެކްޓްތައް ދިނުމާ މި ހުރިހާ އިޚްތިޔާރެއް މި އޮންނަނީ ރައްޔިތުންގެ މަޖިލީހަށް ކަމަށެވެ.