2024 ވަނަ އަހަރަށް ފާސްކުރި ބަޖެޓު މިހާތަނަށް ޚަރަދު ކުރި ގޮތް ރައްޔިތުންނަށް ސިއްރުކުރަން ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީ އިން ފާސްކުރި އިރު މާމިގިލީ ދާއިރާގެ މެމްބަރު ޤާސިމް އިބްރާހިމް އެކަމަށް އެއްބާރުލުން ދެއްވާފައިވާތީ އެކަމަށް ކުރީގެ ރައީސް އަބްދުﷲ ޔާމީން ފާޑު ވިދާޅުވެއްޖެއެވެ.

19 ވަނަ ރައްޔިތުންގެ މަޖިލީހުން ފާސްކުރި 2024 ވަނަ އަހަރުގެ 49 ބިލިއަން ރުފިޔާގެ ބަޖެޓުގެ އިތުރަށް ސަރުކާރުން ސަޕްލިމެންޓަރީ ބަޖެޓެއް މަޖިލީހަށް ހުށަހެޅުމުން، އެ ބަޖެޓް ދިރާސާ ކުރުމަށް ނެގި މަޖިލީހުގެ ކޮމިޓީގެ އާދިއްތަ ދުވަހުގެ ބައްދަލުވުމުގައި، ބަޖެޓުން މިއަދާ ހަމައަށް ހަރަދުކުރި ގޮތުގެ ތަފުސީލު ހާމަ ކުރުމަށް ހަނިމާދޫ ދާއިރާގެ އެމްޑީޕީ އަށް ނިސްބަތްވާ މެމްބަރ އަބްދުލް ޣަފޫރު މޫސާ ހުށަހަޅުއްވާ، ހުޅުމާލެ ދެކުނު ދާއިރާގެ މެމްބަރު ޑރ. އަހްމަދު ޝަމްހީދު ތާއީދު ކުރެއްވުމުން އެ ހުށަހެޅުން، ސަރުކާރަށް ނިސްބަތްވާ ޕީއެންސީގެ މެމްބަރުންނާއި ޖުމްހޫރީޕާޓީގެ ލީޑަރުގެ ވޯޓުން ވަނީ ފެއިލު ކޮށްލާފައެވެ.

މެމްބަރު ޣަފޫރުގެ ހުށަހެޅުއްވުމަށް ތާއީދު ކުރައްވާ އެމްޑީޕީ އަށް ނިސްބަތްވާ 3 މެމްބަރުންނާއި އެމްޑީއޭ އަށް ނިސްބަތްވާ މެމްބަރު މުހައްމަދު އައްބާސް ވޯޓު ދެއްވި އިރު، އެ ހުށަހެޅުން ފާސްކުރަން ނުފެންނަ ކަމަށް ޖުމްހޫރީ ޕާޓީގެ ލީޑަރު ގާސިމް އިބްރާހިމް އާއި ޕީއެންސީ އަށް ނިސްބަތްވާ 14 މެމްބަރުން ވަނީ ވޯޓު ދީފައެވެ. ބުރާސްފަތި ދުވަހުގެ ރޭ ޕީއެންއެފްގެ ޖަލްސާގައި ވާހަކަދައްކަވަމުން ރައީސް ޔާމީން ވިދާޅުވީ ޤާސިމް އަކީ އަބަދުވެސް އިސްލާހަށް މަސައްކަތް ކުރާ ބޭފުޅެއް ކަމަށް ޤާސިމް ވިދާޅުވާ ކަމަށެވެ. އެހެންނަމަވެސް ބަޖެޓް ހޭދަކުރި ގޮތް ސިއްރުކުރަން ސަރުކާރަށް އެއްބާރުލުން ދިނުމުން އާ މެމްބަރުންނަށް އެ ދެއްކެނީ ކޮންކަހަލަ މިސާލެއްތޯ ޔާމީން ވަނީ ސުވާލު އުފައްދަވާފައެވެ. އެ މަނިކުފާނު ވިދާޅުވީ ބަޖެޓް ސިއްރު ކުރަނީ ޚަރަދުތައް ދިމާނުވާތީ ކަމަށެވެ. އަދި އެކަން ސިއްރުކުރުމަކީ ވަރަށް ލަދުވެތި ކަމެއް ކަމަށް ޔާމީން ވަނީ ވިދާޅުވެފައެވެ.

5.1 ބިލިއަން ރުފިޔާގެ ސަޕްލިމެންޓަރީ ބަޖެޓް ކޮމިޓީން ފާސްކުރީ ހޯމަ ދުވަހުއެވެ. އަދި އަންގާރަ ދުވަހުގެ މަޖިލީހުގެ ޖަލްސާގައި އަހަރަށް ލަފާކޮށް ހުށަހަޅާފައިވާ ސަޕްލިމެންޓަރީ ބަޖެޓު، ރައްޔިތުންގެ މަޖިލީހުން ވަނީ ފާސްކޮށްފައެވެ. އެގޮތުން 5.1 ބިލިއަން ރުފިޔާގެ ސަޕްލިމެންޓްރީ ބަޖެޓު ފާސްކުރުމަށް އަންގާރަ ދުވަހުގެ މަޖިލީހުގައި ނެގި ވޯޓުގައި ބަޖެޓް ފާސްކުރުމަށް 75 މެމްބަރުން ވޯޓު ދެއްވިވެއެވެ. އަދި ބަޖެޓް ފާސް ކުރުމާއި ދެކޮޅަށް 11 މެމްބަރުން ވޯޓު ދެއްވާފައެވެ. އެ ސަޕްލިމެންޓްރީ ބަޖެޓް ފާސްކުރި އިރު ބަޖެޓަށް ވީ ގޮތް ސާފު ނުވާކަމަށް ފާހަގަކުރައްވާ ޔާމީން ވަނީ އެކަމާއި މެދު ކަންބޮޑުވުން ފާޅުކުރައްވާފައެވެ. އަދި މާލިއްޔަތު ޤަވާއިދާއި އެއްގޮތަށް މާލީ މައުލޫމާތުތައް ހާމަކުރަން ޖެހޭނެ ކަމަށް އެ މަނިކުފާނު ވަނީ ވިދާޅުވެފައެވެ.

2024 ވަނަ އަހަރަށް ފާސްކުރި ބަޖެޓު މިހާތަނަށް ޚަރަދު ކުރި ގޮތް ރައްޔިތުންނަށް ސިއްރުކުރަން ރައްޔިތުންގެ މަޖިލީހުގެ ބަޖެޓް ދިރާސާ ކުރާ ކޮމިޓީގައި ހިމެނޭ ސަރުކާރު މެމްބަރުން ވޯޓު ދީގެން ފާސްކުރުމުން އާއްމުންނާއި އިދިކޮޅު ފަރާތްތަކުން އައީ ކަންބޮޑުވުން ފާޅުކުރަމުންނެވެ. އަދި މާލީ ދާއިރާގެ މާހިރުންނާއި މަޖިލީހުގެ ކުރީގެ މެމްބަރުން ވެސް ވަނީ ބަޖެޓް ހޭދަ ކުރި ގޮތް ހާމަ ނުކޮށް، ސަޕްލިމެންޓްރީ ބަޖެޓް ހުށަނޭޅޭނެ ކަމަށް ބުނެފައެވެ. ނަމަވެސް އެއިން އެއްވެސް ޝަކުވާއަކަށް ސަރުކާރުގެ ފުރިހަމަ މެޖޯރިޓީ އޮތް، މި މަޖިލީހުން އިޖާބައެއް ނުދެއެވެ.