ޗާގޯސްގެ މައްސަލަގައި އދ ގައި ވޯޓު ނެގި އިރު ޔާމީންގެ ވެރިކަމުގައި އެއްފަހަރުވެސް އެތަނަކީ ރާއްޖޭގެ ތަނެކޭ ބުނެ ވާހަކަ ނުދައްކާ - ޝާހިދު

ޗާގޯސްގެ ސިޔާދަތީ ބާރުގެ މައްސަލައިގައި 2016 ވަނަ އަހަރު އދ ގެ އާންމު މަޖިލީހުގައި ވޯޓު ނެގި އިރު ޔާމީންގެ ވެރިކަމުގައި އެއްފަހަރުވެސް އެތަނަކީ ރާއްޖޭގެ ތަނެކޭ ބުނެ ވަކާލާތު ކޮށްފައި ނުވާ ކަމަށް ކުރީގެ ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެއެވެ.

ޝާހިދު ވިދާޅުވީ މި ސަރުކާރުން ޗާގޯސް މައްސަލައިގައި ގަސްދުގައި ދޮގު ހަދަމުންދާ ކަމަށެވެ.

Advertisement

ޗާގޯސް މައްސަލައާއި ގުޅުންހުރި ބައެއް ކަންކަން ހާމަ ކުރައްވަމުން ޝާހިދު ވިދާޅުވީ 2010 ގައި އދގެ މަޖިލީހަށް ލިޔުންތަކާއި، ޗާޓުތައް ކުރަހާފައި ހުށަހެޅުއްވި އިރު އޭރުގެ ރައީސުލްޖުމްހޫރިއްޔާއަށް، އޭރުގެ ސަރުކާރަށް، ޗާގޯސް ހިމެނޭ ގޮތަށް ކުރަހާފައި ފޮނުވަން ފުރުސަތު އޮންނާނެ ކަމަށެވެ. ނަމަވެސް ހުށަހެޅުއްވި ކުރެހުމުގައި ވަނީ އައްޑުއަތޮޅުން ފެށިގެން 200 މޭލު ކަމަށާއި، ޗާގޯސް އޭގެ ތެރޭގައި ނުހިމެނޭ ކަމަށެވެ.

އަދި އދ އަށް ކުރެހުންތައް ހުށަހެޅުމުން، މޮރިޝަސް އަދި އިނގިރޭސި ވިލާތުންވެސް ބުނެފައިވަނީ 200 މޭލު ރާއްޖެއަށް ލިވޭނެކަމަށް ގަބޫލެއް ނުކުރާ ކަމަށެވެ. ޝާހިދު ވިދާޅުވީ އެއިރުވެސް މޮރިޝަސް އިން ޗާގޯސްގެ ސިޔާދަތީ ބާރާއި މެދު ދައުވާކުރާ ކަމަށެވެ.

ޝާހިދު ވިދާޅުވީ ރާއްޖެއިން ފުރުސަތުގެ ބޭނުން ނުހިފުމުން، ބައިލްއަޤާމީ ޤާނޫނުގެ ދަށުން ކަނޑައެޅީ، ޗާގޯސްއަކީ އަދި އޭގައި ދެކުނުން ހުރި ރަށްތަކަކީ މޮރިޝޮސްގެ ޙައްގެއް ކަމަށެވެ. އަދި އެމްޑީޕީގެ ސަރުކާރާ ހަމައަށް އައިއިރު އޮތީ އިންޓަނޭޝަނަލް ކޯޓު ޖަސްޓިސުން ނިންމާ، އދ ގެ އާންމު މަޖިލީހުން ނިންމާފައި ކަމަށެވެ. ސަރުކާރަށް އައީ ޗިޓް ކަމަށް ޝާހިދު ވިދާޅުވިއެވެ.

ޝާހިދު ވިދާޅުވީ ސަރުކާރަށް ލިބުނު ޗިޓާއެކު ދިވެހި ސަރުކާރަށް އޮތީ ދެ ޗޮއިސް ކަމަށެވެ. އެއީ ކޯޓަށް ގޮސް ރާއްޖޭގެ ޕޮޒިޝަން ދިފާޢުކުރުން ކަމަށާއި، އަނެއް ޕޮޒިޝަނަކީ އަޅާނުލާ ތިބުން ކަމަށެވެ. އަދި އެތަނަށް ގޮސް ވަކީލުން ބަންޑާރަނައިބު ހިމެނޭ ގޮތަށް ދުނިޔޭގައި ތިއްބެ އެންމެ މޮޅު ލޯޔަރން ހިމެނިގެން ވަކާލާތުކުރީ ކޯޓަކަށް އެކަން ބަލާކަށް ހައްގެއް ނެތް ކަމަށާއި، ނަމަވެސް ކޯޓުން ނިންމީ އެ މައްސަލަ ބަލަން ކޯޓަށް ޙައްޤު ލިބިގެންވާ ކަމަށާއި، އެކަން އޮތީ ބަލަން ނިންމާފައި ކަމަށެވެ.

ޝާހިދު ވިދާޅުވީ ރާއްޖެއިން ވަކާލާތުކުރީ އެންމެ ބޮޑެތި ލޯޔަރުންނާއެކީ ކަމަށާއި، ރާއްޖެއަށް ބޮޑުބައި ލިބި ކާމިޔާބުވި ކަމަށެވެ. ނަމަވެސް އެހިސާބަށް ކަންތައް ދިޔާމަވެސް މި ސަރުކާރުން ބުނަނީ ކަނޑު ދޫކޮށްލީ ކަމަށާއި ވިއްކާލި ކަމަށެވެ. އަދި އެއީ ރައްޔިތުންގެ މެދުގައި ފިތުނަ އުފައްދަން ދައްކާ ވާހަކައެއް ކަމަށް ޝާހިދު ވިދާޅުވިއެވެ.