ހައުސިން މިނިސްޓްރީގައި ސީދާ ރައީސް މުއިއްޒާއި ގުޅުންހުރި ލިޔެކިއުންތައް ހުންނާނެ
ކުރީގެ ރައީސް އަބްދުﷲ ޔާމީން ޕީއެންއެފްގެ ޖަލްސާގެ އޯޑިއަންސްގައި އިންނަވައި ވާހަކަދައްކަވަނީ
ހައުސިންގ މިނިސްޓްރީ ހިންގަމުންދިޔަ ޓިނު އިމާރާތުގައި ރޯވެ އަނދާހުލިވެގެން ދިޔައީ އިއްތިފާގަކުން ނޫން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
އާދިއްތަ ދުވަހުގެ ރޭ ކުރިއަށް ގެންދިއަ ޕީއެންއެފްގެ ޖަލްސާގެ އޯޑިއަންސްގައި އިންނަވައިގެން ޔާމީން ވިދާޅުވީ، ރައީސް ޑރ.މުހައްމަދު މުއިއްޒު މާލޭގެ މޭޔަރުކަން ދެއަހަރާއި ބައި، އަދި ހައުސިންގ މިނިސްޓަރުކަން 7 އަހަރު ކުރެއްވި ކަމަށެވެ.
ހައުސިން މިނިސްޓްރީ ހިންގަމުންދިޔަ އިމާރާތުގައި ރައީސް މުއިއްޒު މަސައްކަތް ކުރެއްވި ކަމަށާއި އަދި ސީދާ ރައީސް މުއިއްޒާއި ގުޅުންހުރި ލިޔެކިއުންތައް ހުންނާނެ ކަމަށެވެ. އެ ލިޔެކިއުންތަކުގެ ތަފްސީލާއި، އެހުރި ތަންތަން ސާފުކޮށް ރައީސް މުއިއްޒަށް އެނގިވަޑައިގަންނަވާނެ ކަމަށެވެ. އަދި އެއިމާރާތުގައި ރޯވެ އަނދާހުލިވެގެންދިޔައީ އިއްތިފާގަކުން ނޫން ކަމަށް ޔާމީން ވިދާޅުވިއެވެ.
މިހާދިސާ ފުލުހުން ތަހުގީގު ކުރަމުންދާތީ އެކަމަށް އިޝާރާތް ކުރައްވައި ޔާމީން ވިދާޅުވީ ކްރައިމް ސީންއެއްކޮށް ސާފުކޮށް ނިންމުމަށްފަހު، އިންޑިއާގެ ޓީމެއް ގެނެސްގެން ތަހުގީގު ކުރިއަށް ގެންދާ ކަމަށެވެ. އަދި އެޓީމުން ދިވެހި ދައުލަތް އެދޭ ގޮތަށް ތަހުގީގީ ރިޕޯޓު ލިޔެދޭނެ ކަމަށް ޔާމީން ވިދާޅުވިއެވެ.
މީގެ އިތުރުން ޔާމީން ވަނީ ހައުސިންގ މިނިސްޓްރީގެ އަލިފާނުގެ ހާދިސާއާއި ގުޅޭ މައުލޫމާތު ހިއްސާކުރުމަށް ފުލުހުން އެދިފައިވާތީ އެކަމަށް ފާޑު ވިދާޅުވެފައެވެ. ގައުމުގައި ހިނގާ ބޮޑެތި މައްސަލަތަކުގައި ފުލުހުން އަމަލުކުރާ ގޮތުން އެމަސައްކަތްތަކާއި މެދު ރައްޔިތުން ސުވާލު އުފައްދާ ކަމަށް ޔާމީން ވިދާޅުވިއެވެ.
18 ޑިސެންބަރ 2024 ވަނަ ދުވަހު ފުލުހުން ވަނީ 12 ޑިސެންބަރު 2024 ވަނަ ދުވަހުގެ ހެނދުނުގެ ވަގުތެއްގައި ތިން މިނިސްޓްރީއެއް ހިންގަމުންދިޔަ އިމާރާތުގައި ހިނގާދިޔަ އަލިފާނުގެ ހާދިސާގެ ތަހުގީގަށް ބޭނުންކުރެވިދާނެ އެއްވެސް މައުލޫމާތެއް ލިބިފައިވާނަމަ މޭޖަރ ކްރައިމް އިންވެސްޓިގޭޝަންގެ ނަންބަރު 9911099 އަށް ގުޅައި ހިއްސާ ކުރުމަށް އެދިފައެވެ.
ހައުސިން މިނިސްޓްރީ ހިންގަމުން އައި އިމާރާތުގައި ރޯވި އަލިފާން ކޮންޓްރޯލް ނުކުރެވި އެ ބްލޮކްގައި ހުންނަ ކޮންސްޓްރަކްޝަން މިނިސްޓްރީއާއި، އެންވަޔަރަމަންޓް މިނިސްޓްރީގެ އިތުރުން އެންވަޔަރަމަންޓަލް ޕްރޮޓެކްޝަން އެޖެންސީ އަދި މާލެ ސިޓީ ކައުންސިލްގެ ވައިޓަލް އައި ލޭންޑް ސެކްޝަން ވަނީ ބޭނުން ނުކުރެވޭ ވަރަށް ހަލާކުވެފައެވެ.
